ۇلى دالا ەلىنىڭ اۋەندەرىن الەمگە پاش ەتكەن «TURAN» توبى ەلوردالىق كورەرمەندەرگە ءوزىنىڭ 10 جىلدىق مەرەيتويىنا وراي ۇلكەن كونتسەرت ۇسىنادى. 

ونەرسۇيەر قاۋىم «TURAN» ءانسامبلىنىڭ ۇلكەن كونتسەرتىن 1 جەلتوقسان كۇنى ساعات 19:00-دە «Qazaqstan» ورتالىق كونتسەرت زالىندا تاماشالاي الادى. كونتسەرت قر مادەنيەت جانە سپورت مينيسترلىگىنىڭ قولداۋىمەن وتەدى.

«TURAN» ەتنو-فولكلورلىق ءانسامبلى – قازاق حالقىنىڭ ۇلتتىق مۋزىكالىق مۇراسىن جاڭعىرتىپ، ۇمىت بولا باستاعان ءتول اسپاپتاردىڭ سۇيەمەلدەۋىمەن كونە كۇي-جىرلاردى ناسيحاتتايتىن بىرەگەي توپ. ەتنو-فولكلورلىق انسامبل ۇلتتىق مۋزىكالىق اسپاپتاردىڭ دىبىسىن قازىرگى زامانعا ساي لايىقتاپ، جاڭا فورماتتا ۇسىنىپ ءجۇر. ون جىلدىق تاريحى بار ونەر ۇجىمى قازاق مۋزىكاسىن الەمگە ايگىلەپ، 70-تەن استام شەت مەملەكەتتە 600-دەن استام جەكە كونتسەرت بەرگەن. انسامبل «كارنەگي حولل» (نيۋ-يورك، اقش), «كەننەدي تسەنتر» (ۆاشينگتون، اقش), «كونتسەرت حاۋس» (بەرلين، گەرمانيا), «كرەملەۆسكي دۆورەتس» (ماسكەۋ، رەسەي), «كونگرەسس جانە فەستيۆالدار سارايى» (كانن، فرانتسيا), «ساللە كورتو» (پاريج، فرانتسيا) جانە وزگە دە اتاقتى زالداردا ونەر كورسەتتى.

ءانسامبلدىڭ قۇرامىندا ماقسات مەدەۋبەك، سەرىك نۇرمولداەۆ، باۋىرجان بەكمۇحانبەتوۆ، ەرجىگىت اليەۆ، جانتۋ داداباەۆ سىندى تالانتتى مۋلتي ينسترۋمەنتاليست مۋزىكانتتار بار. قازاق حالقىنىڭ وتىزدان استام ۇلتتىق مۋزىكالىق اسپابى بولسا، مۋزىكانتتاردىڭ ارقايسىسى سولاردىڭ بىرنەشەۋىندە ويناۋدى مەڭگەرگەن.

نۇر-سۇلتان قالاسىنىڭ تورىندە وتەتىن «TURAN» ءانسامبلىنىڭ ۇلكەن كونتسەرتى ونەر سۇيەر قاۋىمعا رۋحاني ازىق سىيلاپ، ەستەن كەتپەس اسەر قالدىرماق. كونتسەرتتە كونە تۇركى مادەنيەتى «TURAN» ءانسامبلىنىڭ شىعارماشىلىق جولىمەن ۇندەسە كورىنىس تابادى. كونتسەرتتە نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ سيمفونيالىق وركەسترى، «Astana musical» مەملەكەتتىك تەاترى، قازاق ۇلتتىق حورەوگرافيا اكادەمياسىنىڭ ارتيستەرى، ءانشى مەرۋەرت مۋسرالي ونەر كورسەتەدى.

«TURAN» ءانسامبلىنىڭ ۇلكەن كونتسەرتى «قازاقكونتسەرت» مەملەكەتتىك كونتسەرتتىك ۇيىمىنىڭ ۇيىمداستىرۋىمەن وتەدى، رەسمي سەرىكتەس – قر تۇڭعىش پرەزيدەنتى-ەلباسى قورى.

Abai.kz