ءبىر ءساتى تۇسكەندە بۇرىنعى سولتۇستىك قازاقستان وبلىستىق قارجى پوليتسياسى دەپارتامەنتىنىڭ باستىعىمەن سۇحباتتاسقانىم ويىما ورالىپ وتىر. بايىپتى دا بايسالدى ازامات ەدى. اڭگىمە بارىسىندا:

-بىردە قاراماعىمداعى ءبىر جاس وفيتسەردىڭ ءوزى تەكسەرگەن كاسىپكەردەن پارا دامەتكەنى جايلى سيگنال ءتۇستى. مىنەزى دە، ءتارتىبى دە جاقسى جىگىت ەدى. بالا-شاعاسى دا بار. «بۇعان نە بولدى ەكەن سونشا؟..» -دەگەن ويعا قالىپ، ىشكى قاۋىپسىزدىك قىزمەتىندەگىلەرگە: «باقىلاۋعا الىڭدار. پارا الىپ جاتسا، سۋرەت پەن ۆيدەوعا ءتۇسىرىپ الىڭدار، بىراق ۇستاماڭدار. العان اقشاسىن نەگە جۇمسايتىنىن ءبىلۋ ءۇشىن سوڭىنان ىلەسىپ، اڭدىڭدار...» -دەپ تاپسىردىم.

الگى وفيتسەرىم كاسىپكەردەن شامالى مولشەردە پارا الىپتى دا، بىردەن قالاداعى ازىق-تۇلىك جانە كيىم-كەشەك دۇكەندەرىنە سوعىپ، بالالارىنا تاعام مەن كيىم ساتىپ الىپتى. سودان كەيىن باسقا ەش جەرگە بۇرىلماي، پاتەر جالداپ تۇرىپ جاتقان ۇيىنە بارىپتى.

ەرتەڭىنە جۇمىسقا كەلىسىمەن ونى ءوز كابينەتىمە شاقىرىپ الدىم دا نەگە تۋرا جولدان تايعانىن سۇرادىم. «جالاقىمىز ماردىمسىز عوي، اعا...» - دەدى جىلامسىراپ. «جارايدى، ۇستىڭنەن قىلمىستىق ءىس قوزعاتپاي-اق قويايىن، ءوزىڭ ءوتىنىش جازىپ، قىزمەتىڭمەن قوشتاس...» -دەدىم. ارينە، العان پاراسىنا رەستوران مەن ساۋناعا بارىپ، ساۋىق-سايران قۇرىپ جۇرسە، اياماس ەدىم...» -دەدى اعىنان جارىلىپ.

ءيا، بۇگىن دە بىرەۋ – تويىپ، بىرەۋ توڭىپ سەكىرىپ جۇرگەندىگى انىق. سوندىقتان، ەل پرەزيدەنتى قاسىم-جومارت توقاەۆتىڭ العاشقى جولداۋىندا ۇكىمەتكە مەملەكەتتىك قىزمەتشىلەر سانىن بىرتىندەپ، 2024 جىلعا دەيىن 25 پايىزعا قىسقارتۋ جانە ودان ۇنەمدەلگەن قارجىنى نەعۇرلىم پايدالى قىزمەتكەرلەردى ىنتالاندىرۋعا جۇمساۋ جونىندە بەرگەن تاپسىرماسىنىڭ جەمقورلىقپەن كۇرەستەگى ماڭىزى زور بولار دەپ ويلايمىن.

كارىباي مۇسىرماننىڭ facebook پاراقشاسىنان

Abai.kz