كەشە "You tube" جەلىسىندە بولات باقاۋوۆ مىرزا باسشىلىق ەتەتىن پاۆلودار وبلىسىندا ءبىر دەگەندە 13 كوشە اتاۋىنىڭ قازاقشالانىپ جاتقانى تۋرالى اقپار تارادى. 

رىمبەك قابيدەن ەسىمدى ازامات ءوزىنىڭ "you tube" كانالىندا حابارلاپ ايتقان اقپاردان بىلگەنىمىز، پاۆلوداردا كوشە اتاۋلارىن وزگەرتۋ بويىنشا قوعامدىق تىڭداۋ وتكەن ەكەن. وعان قالالىق ءماسليحاتتىڭ 8 دەپۋتاتىمەن قاتار جەرگىلىكتى تۇرعىندار قاتىسىپ، ءوز پىكىرلەرىن ورتاعا سالىپتى. ناتيجەسىندە، جيىلعاندار قالاداعى 13 كوشەنىڭ اتاۋىن وزگەرتۋگە، وندا دا قازاقشالاۋعا، قازاق قايراتكەرلەرىنىڭ اتىن بەرۋگە ماقۇلداسىپتى.

سونىمەن، كەرەكۋدەگى كەڭەستىك اتاۋدان ارىلعان كوشەلەر:

1. كارل ماركس كوشەسى - ءاليحان بوكەيحانوۆتىڭ اتىنا;

2. 1 ماي كوشەسى - ءماشھۇر ءجۇسىپتىڭ اتىنا;

3. ديميتروۆ كوشەسى - جۇسىپبەك ايماۋىتوۆتىڭ اتىنا;

4. كيروۆ كوشەسى - ەرماحان بەكماحانوۆ اتىنا;

5. كورولەنكو كوشەسى - بۇحار جىراۋ قالقامانۇلىنىڭ اتىنا;

6. ج.ايماۋىتوۆ كوشەسى - اقجول كوشەسىنە;

7. ۆولودارسكي كوشەسى - جەلتوقسان كوشەسىنە;

8. كرۋپسكايا كوشەسى - ەدىگە بي كوشەسىنە;

9. بولشايا وبەزدنايا كوشەسى - جىبەك جولى كوشەسىنە;

10. م.كوپەەۆ كوشەسى - اقبەتتاۋ كوشەسىنە;

11. چكالوۆ كوشەسى - ساعادات نۇرماعامبەتوۆ اتىنا;

12. پاحوموۆ كوشەسى - قابدەش نۇركين اتىنا;

13. بەستۋجەۆ كوشەسى - شاكارىم قۇدايبەردىۇلىنىڭ اتىنا وزگەرگەن.

جيىنعا قاتىسقاندار وسى ارقىلى "پاۆلودار ورىستانىپ كەتكەن" دەگەن ستەوروتيپتى بۇزۋ كەرەك" دەيدى. ال، بىردەن 13 كوشەنىڭ اتىن قازاقشالاپ، ۇلى تۇلعالاردىڭ ەسىمىن ۇلىقتاۋ بۇرىن سوڭدى ءوڭىر تاريحىندا بولماعان كورىنەدى.

بۇگىندە ەلىمىزدىڭ سولتۇستىگىندەگى تۇرعىنداردىڭ باسىم كوپشىلىگى كوشىپ جاتقانى ءمالىم. وندا دا ورىس ۇلتىنىڭ وكىلدەرى تاريحي وتانى رەسەيگە كوشىپ جاتىر دەپ سيپاتتالادى اقپاراتتا.

سايكەسىنشە، سولتۇستىك وڭىرلەرگە وڭتۇستىكتىڭ حالقىن قونىستاندىرۋ تۋرالى ارنايى باعدارلاما قابىلدانعان. ال، وسى جىلدىڭ ءساۋىر ايىندا قر ەڭبەك جانە حالىقتى الەۋمەتتىك قورعاۋ مينيسترلىگى سولتۇستىك وڭىرلەرگە 10 ادامدى كوشىرۋ ءۇشىن 1,7 ملرد. تەڭگە بولىنگەنىن ايتقان بولاتىن. ونىڭ ۇستىنە، جالپى قازىرگى تاڭدا پاۆلودار وبلىسى بويىنشا تۇرعىنداردىڭ شامامەن 51,7 پايىزى قازاق بولسا، وبلىس ورتالىعى تۇرعىندارىنىڭ 46,2 پايىزى عانا جەرگىلىكتى ۇلت وكىلى بولىپ تابىلادى. وسىنداي فاكتورلاردى ەسكەرسەك، قالا كوشەلەرىنىڭ قازاقشالانۋى قوعامدىق قاجەتتىلىك ەكەنى راس.

ايتپاقشى، وسىعان دەيىن Abai.kz پورتالىندا پاۆلودار وبلىسى تىلدەردى دامىتۋ جونىندەگى باسقارماسىنىڭ ونوماستيكا جۇمىستارى ءبولىمى باسشىسى باتىربەك قايىرحان مىرزانىڭ  "قوش بول، سوۆەتتىك اتاۋلار!"  اتتى ماقالاسى جارىق كورگەن ەدى. وندا، وبلىستىق باسقارمانىڭ وڭىردەگى جەر-سۋ، ەلدى-مەكەن مەن كوشە، اۋدان اتاۋلارىن قازاقىلاندىرۋ بويىنشا اتقارىلعان جۇمىستارى ايتىلعان.

ماسەلەن، كەرەكۋ وڭىرىندە سوڭعى ەكى-ءۇشى جىلدىڭ ىشىندە لەنين ەسىمىمەن اتالاتىن 30 كوشە، سوۆەتوۆ اتاۋىمەن اتالاتىن 15 كوشە، وكتيابر اتىنداعى – 12, تسەلينا اتىنداعى – 17, كومسومولسكايا اتىنداعى – 12 كوشە ۇلتتىق تانىمعا قاتىستى اتاۋلارمەن الماستىرىلعان. جالپى العاندا، پاۆلودار وبلىسىندا سوڭعى 2-3 جىل ىشىندە 500-دەن استام كوشەنىڭ اتاۋى، 26 ەلدى مەكەن اتاۋى مەن 2 اۋداننىڭ اتاۋى وزگەرتىلىپ، 5 ءبىلىم بەرۋ مەكەمەسىنە ۇلى تۇلعالاردىڭ ەسىمى بەرىلىپتى.

ءتۇيىن. ەلىمىزدىڭ سولتۇستىك وڭىرلەرىندەگى جەر-سۋ اتاۋلارىنا قاتىستى ەل ىشىندە سىني-پىكىرلەر از ەمەس. سولاردىڭ ءبىرسىپىراسى Abai.kz اقپاراتتىق پورتالىندا جاريالاندى. اسىرەسە، بولات باقاۋوۆ باسشىلىق ەتەتىن پاۆلودار وبلىسىنا، ونداعى تىلدىك ماسەلەلەر، جەر-سۋ اتاۋلارى مەن الەۋمەتتىك ماسەلەلەرگە قاتىستى پورتال بەتىندە وتكىر-وتكىر سىندار جازىلدى. ال كەشە "You tube" جەلىسىندە اتالعان ايماقتا 13 كوشە اتاۋىنىڭ قازاقشالانىپ جاتقانى تۋرالى اقپار تارادى. ءسۇيىنشى سۇرارلىق بۇل اقپاردى ءبىز دە قۋانا بولىسكەندى ءجون كوردىك.

تاۋەلسىزدىك العان 28 جىل ىشىندە مەملەكەتتىك ءتىلدىڭ مارتەبەسى ءۇشىن كۇرەس توقتاعان جوق. استانا جاقتاعى اق جاعالىلاردىڭ دەنى قازاق تىلىنە قىرىن قاراپ، بوتەن ەلدىڭ مەملەكەتتىك تىلىنە مۇقتاجدىقتى قولداپ جاساپ كەلە جاتقانى تۋرالى تالاي رەت ايتتىق، جازدىق. ال، بۇگىن كەرەكۋلىك اعايىننىڭ ءبىر دەگەندە 13 كوشەنىڭ اتىن كەڭەستىك اتاۋلاردان ارىلتىپ، قازاقشالاۋى - اۋەلى قازاق ءتىلىنىڭ ابىرويىن ارتتىرعانى ءسوزسىز. ەندىگىدە مەملەكەتتىك تىلگە دەگەن سۇرانىس ارتپاسا، باسەڭدەمەيدى، راس. مەملەكەتتىك اتاۋى - قازاقستان. مەملەكەتتىك ءتىلى - قازاق ءتىلى. مەملەكەتتى قۇرۋشى ۇلت - قازاقتار. ەندەشە ەلدىڭ ءتىلى دە، جەردىڭ اتاۋى دا قازاقشا بولۋى زاڭدىلىق.

نۇربيكە بەكسۇلتانقىزى

Abai.kz