سارسەنبى, 22 قاڭتار 2020
1016 0 پىكىر 15 قاراشا, 2019 ساعات 11:36

نۇر-سۇلتاندا ۇيلەرى سۇرىلەتىن تۇرعىندار وتەماقىنى كوتەرۋىن تالاپ ەتتى

نۇر-سۇلتان قالاسىنىڭ شەتىندەگى ساياجاي قوعامىنىڭ ونداعان تۇرعىنى استانا اكىمدىگىنە كەلىپ، سۇرىلەتىن ۇيلەر ءۇشىن تولەنەتىن وتەماقىنى ءوسىرۋىن تالاپ ەتتى.

ساياجايداعى 150-گە جۋىق باسپانانىڭ ورنىنا بيلىك كەلەسى جىلى اۋرۋحانا سالۋدى كوزدەپ وتىر. تۇرعىندار بيلىك ۇسىنعان وتەماقى نارىقتاعى ءۇي باعاسىنان الدەقايدا تومەن دەپ وتىر.

"زەليونايا روششا — 1" قوعامىنىڭ تۇرعىنى راۋزا شاكەيباەۆا 9,9 ميلليون تەڭگە (شامامەن 25 مىڭ دوللار) وتەماقىعا استانادا مۇنداي ءۇي الا المايتىنىن ايتتى. "ماعان 17–18 ميلليون [تەڭگە] بەرسىن. ارتىق سۇرامايمىن" دەيدى شاكەيباەۆا.

كوپ بالالى انا ايگۇل اسقاروۆانىڭ ءۇيىن 10 ميلليون 300 مىڭ تەڭگەگە باعالاعان. اسقاروۆانىڭ دا وتەماقى كولەمىنە كوڭىلى تولمايدى. ول بۇل ءۇيدى كۇيەۋى ەكەۋى نەسيەگە تۇرعىزعان.

ء"بىر بولمەلى پاتەر دە ساتىپ الا المايمىن. التى بالامەن قايدا بارامىز؟ مەملەكەتكە مەنىڭ جەرىم مەن ءۇيىم كەرەك بولسا، سونداي جاعداي جاساپ بەرمىن، مەن قارسى ەمەسپىن" دەيدى اسقاروۆا.

تۇرعىنداردى نۇر-سۇلتان قالاسى اكىمىنىڭ ورىنباسارى نۇرلان نۇركەنوۆ قابىلدادى. ول باعاسىنا تۇپكىلىكتى كەلىسىپ المايىنشا، باسپانا سۇرىلمەيتىنىنە ۋادە بەردى.

تۇرعىندار كەلىسپەگەن جاعدايدا، ماسەلە سوتتا قارالادى.

Abai.kz

0 پىكىر