بەيسەنبى, 28 ناۋرىز 2024
2221 2 پىكىر 12 قاراشا, 2019 ساعات 09:56

قازاقستاندىق بەلسەندى پروباتسيالىق باقىلاۋدى بۇزعانى ءۇشىن قامالمايتىن بولدى

الماتى وبلىستىق قىلمىستىق اتقارۋ جۇيەسى پروباتسيالىق باقىلاۋدا جۇرگەن جانبولات مامايدىڭ كەزدەيسوق تەكسەرىلگەنىن، ونى تۇرمەگە قامامايتىنىن حابارلادى.

بۇل اقپاراتتى الماتى وبلىسى قاراساي اۋدانىنىڭ پوليتسيا باسقارماسىنىڭ الدىندا بەلسەندى، جۋرناليست جانبولات مامايدىڭ ءوزى تاراتىپ، ادۆوكاتى جانار بالعاباەۆا راستادى.

بۇگىن تاڭەرتەڭ جانبولات ماماي الماتى وبلىستىق قىلمىستىق اتقارۋ جۇيەسى قىزمەتكەرلەرىنىڭ شاقىرۋ قاعازىمەن قاراساي اۋدانى پوليتسيا باسقارماسىنا بارعان. وعان ءبىر توپ بەلسەندى قولداۋ كورسەتكەن.

جانبولات مامايدى قولداۋعا بارعان ساياساتكەر تولەگەن جۇكەەۆتىڭ ايتۋىنشا، "جانبولاتتى سەنبى، جەكسەنبىدە زاڭسىز تەكسەرىپ، پوليتسياعا شاقىرتۋىنىڭ ساياسي استارى بار". بىراق ساياسي داۋعا اينالدىرعىسى كەلمەگەندىكتەن ايىپ تاعۋدان تارتىنعانعا ۇقسايدى.

جانبولات ماماي 9 قاراشادا، سەنبى كۇنى قاراساي اۋداندىق پروباتسيا قىزمەتىنىڭ ءۇش وكىلى كەلىپ، شاقىرۋ قاعازىن تابىستاعانىن حابارلاعان ەدى. بۇل تۋرالى فەيسبۋك الەۋمەتتىك جەلىسىندەگى پاراقشاسى ارقىلى تىكەلەي ەفيردە ايتقان جانبولات ماماي "سەنبى، جەكسەنبى كۇندەرى پروباتسيا قىزمەتكەرلەرىنىڭ تەكسەرۋى زاڭسىز ەكەنىن، بۇل ارەكەتتى وزىنە جاسالعان ساياسي قىسىم دەپ باعالايتىنىن" مالىمدەپ، اقپارات قۇرالدارى مەن بەلسەندىلەردى قولداۋعا شاقىرعان.

- پروباتسيا قىزمەتىندە 2017 جىلدىڭ 29 قىركۇيەگىنەن باستاپ باقىلاۋدامىن. وسى ۋاقىتقا دەيىن بىردە ءبىر رەت كۇندىز تەكسەرگەن ەمەس. زاڭ بويىنشا، ساعات وننان كەيىن تەكسەرەدى. سەنبى كۇنى، رۇقسات ەتىلمەگەن ميتينگىنى كورۋگە كەتكەنىمدە تەكسەرگەنى، رۇقساتسىز كەتتى دەپ ايىپتاعاسى كەلەتىنى ساياسي قىسىم دەپ بىلەمىن. ءالى دە بىرنەشە اي پروباتسيا باقىلاۋىندا بولۋىم كەرەك. كوكتەمدە "پوليتون" كلۋبىن جۇرگىزدى دەپ ەسكەرتۋ بەردى. ەندى تاعى ءبىر ەسكەرتۋ بەرسە، قايتادان تۇرمەگە قامالۋىم مۇمكىن،- دەگەن بولاتىن.

سول كۇنى جانبولات مامايدىڭ ايەلى، قۇقىق قورعاۋشى ينگا يمانباي الەۋمەتتىك جەلىدە جاريالاعان ۆيدەودا "پوليتسيانىڭ ءۇش قىزمەتكەرى سەنبى كۇنى تۇستە جانبولات مامايدى ىزدەپ كەلىپ، حاتتاما تولتىرعانىن" كورسەتكەن. ۆيدەودا پوليتسيا قىزمەتكەرلەرىنىڭ "جانبولات ماماي كۇندىز دە پروباتسيا قىزمەتىنەن سۇرانۋى ءتيىس" دەگەنى ەستىلەدى.

جانبولات ماماي تاياۋدا "قازاقستاننىڭ دەموكراتيالىق پارتياسىن" قۇرۋ تۋرالى باستاما كوتەرگەن. وسى ماقساتتا قازاقستاننىڭ وبلىستارىن ارالاۋعا پوليتسيانىڭ پروباتسيا قىزمەتى رۇقسات بەرمەي وتىرعانىن حابارلاعان.

2017 جىلى اقپاننىڭ 10-ى كۇنى "ابليازوۆتىڭ اقشاسىن گازەت شىعارۋ ارقىلى زاڭداستىرۋعا قاتىستى" دەگەن كۇدىكپەن الماتىدا قاماۋعا الىنعان جانبولات ماماي جەتى ايدان كەيىن، 7 قىركۇيەكتە سوت ۇكىمىمەن بوستاندىعى ءتورت جىلعا شەكتەلىپ، پروباتسيالىق باقىلاۋمەن بوساپ شىققان. زاڭ بويىنشا، بوستاندىعى شەكتەلگەن ادام پروباتسيا باقىلاۋ ءتارتىبىن ساقتاماسا، سوت ۇكىمىمەن بەلگىلەنگەن جازانىڭ قالعان مەرزىمىن تۇرمەدە وتەۋى مۇمكىن.

Abai.kz

2 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3522