Бүгін Түркияның Кунду қаласында футболдан Қазақстан ұлттық құрамасы Молдова құрамасымен жолдастық кездесу өткізеді. Аталмыш кездесуге бір күн қалғанда бас командамызда біраз өзгерістердің болғаны анықталды.

Кунду қаласында ауа райы жанға жай­лы. Термометр бағаны +15 градусты көр­се­тіп тұр. Кездесу кезінде де аспан ашық, күн жылы болатынын ғаламтор беттерінен білдік. Тіпті 20 градусқа дейін жылуы да мүмкін.

Жалпы, Кунду - Түркиядағы жылдам қарқынмен дамып келе жатқан курортты жас қалалардың бірі. Жерорта теңізінің жа­ғалауында орналасқан. Анталиядан 30 шақырым, Белектен бес шақырым әріде жатыр. Әдетте, жылдың бұл мезгілінде көбіне күн ашық. Сондықтан да болар, ұлт­тық құрамамыз биыл оқу-жаттығу жиы­нын осы қалада өткізуді шешіпті. Ко­ман­да күніне екі мезгіл жаттығуда. Сон­дай-ақ залдарда атлетикалық гимнастика­мен айналысып, физикалық қалыптарын сақтап жүр.

Өкінішке қарай, ұлттық құрамамыз Кун­дуға төрт көзі түгел жинала алмады. Қорғаушы Мұхтар Мұхтаров пен жартылай қорғаушылар Анатолий Богданов пен Қазбек Гетериевтің аздаған жарақаттары бар екен, дәрігерлер бұл үшеуіне жолдас­тық кездесуге қатысуға рұқсат бермеді. Сондай-ақ денсаулығына байланысты Валерий Коробкиннің де алаңға шықпауы мүмкін. Олардың орнына бас бапкер Ми­рос­лав Беранек жиынға бір-ақ ойыншыны шақыртты. Ол - «Тараз» футбол клубының жас қорғаушысы Елдос Ахметов. Елдос бұ­ған дейін бас команда сапында бір кездесу өткізген. Осыдан тура бір жыл бұрын Ан­та­лияда өткен жолдастық кездесуде ла­тыштарға қарсы сәтті ойнаған болатын.

Дегенмен қарсыластар сапында да өзгеріс бар. Қазақстанның «Ақтөбесінде» өнер көрсететін Сергей Ковальчук жиын­дардың бірінде жарақат алып қалыпты. Оның орнына Молдованың бас бапкері Ион Карас Милсамиден жартылай қорғау­шы Мариан Столеруді жедел түрде ша­қырт­ты. Бұл футболшы бұған бас команда сапында алаңға шықпаған екен. Молдова футболшылары Анталияда жаттығу жиы­нын 2 ақпанда бастап кеткен.

Жалпы, Молдова құрамасының бізден мықтылығы шамалы. Тіпті ФИФА рейтин­гінде де Қазақстан құрамасынан алысқа ұзай қойған жоқ. Яғни біз 142-орында бол­сақ, олар - 128-орында. Таяуда, нақ­ты айт­сақ, осы айдың басында Молдо­ва фут­бол федерациясында үлкен конгресс ұй­ым­дастырылып, президенттік сайлау өтті. Конгресс барысында 50-ден астам жан­күйер ғимараттың сыртын торуылдап, ел футболының баяу дамуына байланыс­ты наразылық шеруін өткізді. Дегенмен соған қарамастан Павел Чебану бесінші рет қатарынан жеңімпаз атанып, қай­тадан ел футболының басшысы болып сайланды.

Ал енді қос құраманың футболшы­ларын салыстырып көрейік. Әлем футбол­шы­ларының бағасын анықтаумен айна­лысатын Еуропадағы беделді transfer­markt.de сайтының мәліметі бойынша, Қазақстанның ең қымбат ойыншысы - Ген­рих Шмидтгаль. «Гройтер Фюрт» қор­ғаушысы 1,750 миллион евро тұрады. Мол­дованың ең қымбат ойыншысы - Александр Епуряну. Мәскеудің «Дина­мосында» өнер көрсететін қорғаушының нарықтағы бағасы 3 миллион евро.

Дегенмен қос құраманың құны қан­ша­лықты болса да, жасыл алаңда кездесу тағ­дырын футболшылардың бағасы емес, шеберліктері шешеді. Ендеше, жігіттері­мізге жарқын ойын мен сәттілік тілейміз!

Тransfermarkt.de сайтының мәліметі бойынша, осы жиынға шақыртылған МОЛДОВА ұлттық құрамасы футболшыларының нарықтағы бағалары:

Қақпашылар: Станислав Немашко - 300 мың €, Сергей Пащенко - 150 мың €, Адриан Негай - ? €: Барлығы - 450 мың €.

Қорғаушылар: Александр Епуряну - 3 млн €, Игорь Армаш - 1,5 млн €, Виктор Головатенко - 650 мың €, Семен Булгару - 400 мың €, Петр Раку - 200 мың €, Ион Жардан - ? €: Барлығы - 5, 750 миллион €.

Жартылай қорғаушылар: Александр Гацкан - 2 млн €, Станислав Иванов - 400 мың €, Александр Оникэ - 300 мың €, Александр Суворов - 300 мың €, Артур Ионице - 300 мың €, Артур Патраш - 250 мың €, Сергей Георгиев - 200 мың €, Александр Пащенко - 150 мың €, Мариан Столеру - ? €: Барлығы - 3,9 миллион €.

Шабуылшылар: Игорь Пикащук - 800 мың €, Игорь Бугаев - 400 мың €, Анатолий Дорош - 250 мың €, Александр Дедов - 200 мың €, Сергей Даду - 100 мың €: Барлығы - 1,750 миллион €.

Барлығы - 11,850 миллион евро.

Тransfermarkt.de сайтының мәліметі бойынша, осы жиынға шақыртылған ҚАЗАҚСТАН ұлттық құрамасы футболшыларының нарықтағы бағалары:

Қақпашылар: Андрей Сидельников - 200 мың €, Антон Цирин - 150 мың €, Александр Мокин - 150 мың €: Барлығы - 500 мың €.

Қорғаушылар: Виктор Дмитриенко - 350 мың €, Юрий Логвиненко - 300 мың €, Қайрат Нұрдәулетов - 250 мың €, Марк Гурман - 200 мың €, Дмитрий Шомко - 200 мың €, Александр Киров - 150 мың €, Елдос Ахметов - ? €: Барлығы - 1,450 миллион €.

Жартылай қорғаушылар: Жамбыл Көкеев - 500 мың €, Марат Шахметов - 300 мың €, Бауыржан Жолшиев - 300 мың €, Ұлан Қонысбаев - 200 мың €, Марат Хайруллин - 150 мың €, Павел Шабалин - 150 мың €, Мақсат Байжанов - 100 мың €: Барлығы - 1,750 миллион €.

Шабуылшылар: Таңат Нөсербаев - 500 мың €, Сергей Остапенко - 300 мың €, Сергей Гридин - 100 мың €, Тимур Байжанов - 50 мың €: Барлығы - 950 мың €.

Барлығы - 4, 650 миллион евро.

Автор: Әзиз ЖҰМАДІЛ

"Алаш айнасы" газеті