Бейсенбі, 28 Наурыз 2024
Ауыс-түйіс 8329 14 пікір 16 Сәуір, 2021 сағат 11:31

Шпекбаев не үшін қызметінен алынды?

Қазақстанның Сыбайлас жемқорлыққа қарсы іс-қимыл агенттігінің төрағасы Алик Шпекбаев қызметінен босатылды. Бұл туралы Ақорда сайты хабарлады.

Оның орнына Сыбайлас жемқорлыққа қарсы қызмет төрағасы болып Марат Ахметжанов тағайындалды.

«Марат Мұратұлы Ахметжанов Қазақстан Республикасының Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызметтің) төрағасы лауазымына тағайындалсын», - деп жазылған Президент жарлығында.

Президент Қасым-Жомарт Тоқаев Антикор басшылығындағы ауыс-түйіс себебін түсіндіріп, мәлімдеме жасапты.

Қасым-Жомарт Тоқаев:

Менің Жарлығыма сәйкес Алик Жатқамбайұлы Шпекбаев Сыбайлас жемқорлыққа қарсы іс-қимыл агенттігінің төрағасы лауазымынан босатылды.

Агенттікте оның басшылығымен жемқорлықпен күресте ауқымды жұмыс атқарылды. Осы құрылымның қызметі айтарлықтай жаңғырды. Жемқорлыққа қарсы бірқатар жобалар мен бастамалар қолға алынды. Солардың қатарында «ADALDYQ ALANY», «ANTIKOR ORTALYGY», «ADAL BILIM» және тағы басқалары бар.

Алик Жатқамбайұлына осы қызметтегі табысты жұмысы үшін алғыс айтамын.

Бүгін менің Жарлығыма сәйкес Сыбайлас жемқорлыққа қарсы іс-қимыл агенттігінің төрағасы лауазымына Марат Мұратұлы Ахметжанов тағайындалды. Мемлекеттік қызметтегі тәжірибесі мол маман. Әділет министрлігінде, Бас прокуратурада басшылық лауазымдарды атқарды. Кезінде Экономикалық қылмысқа және сыбайлас жемқорлыққа қарсы күрес агенттігінің орынбасары болды. Сондықтан мен оны осы лауазымға тағайындау туралы шешім қабылдадым.

Жалпы, мемлекеттің қауіпсіздігі және халықтың әл-ауқаты жемқорлықпен күресте жүзеге асырылатын жүйелі әрі тиімді шараларға тікелей байланысты.  Осыған орай, Агенттік алдында бірқатар маңызды міндеттер тұр.

Біріншіден, сыбайлас жемқорлыққа қарсы іс-қимылды барлық деңгейде тиімді жүргізу үшін кешенді жұмыс атқару қажет.

Мұндай шаралар қылмыстық қудалау әрекетімен ғана шектелмеуі керек. Ондай тәсілдің кері әсері болады. Мемлекеттік аппарат шешім қабылдаудан тартынып, бюрократияға бой алдырады және лауазымды тұлғалар жеке жауапкершілік алудан жалтарады.

Агенттік жұмыс барысында жіберілетін қателіктерді қасақана жасалған қылмыстардан ажырата білуге тиіс. Сондай-ақ, кінәлі адамды қылмыстың барлық құрамы болған кезде ғана жауапқа тартуы қажет.

Екіншіден, қоғам өкілдерінің белсене атсалысуы және алдын алу шаралары сыбайлас жемқорлыққа қарсы күрестің басты құралдарына айналуы керек.

Қазіргі таңда менің тапсырмам бойынша «Қоғамдық бақылау туралы» заң дайындалып жатыр.

Бұл құжат мемлекеттік органдардың қоғам алдындағы ашықтығы мен есептілігін қамтамасыз етуді көздейді. Сондай-ақ, белсенді азаматтарға құқықтық бақылау құралдарын береді. Осы заң жобасының әлеуетін барынша пайдаланып, қоғамды жемқорлықпен күресуге кеңінен тарту қажет.

Үшіншіден, қылмыстық жолмен алынған мүлікті іздестіру және тәркілеу ісіне баса мән берген жөн. Мұны «follow the money» қағидаты дейді.

Қылмыстық жолмен алынған дүние-мүлікті тәркілеу жөніндегі бұлжымас қағидат сыбайлас жемқорлыққа қатысты кез келген іс-әрекеттен аулақ болуға ынталандыруға тиіс. Бұл жұмысты Агенттік қаржы мониторингі органдарымен бірлесіп атқаруы керек.

Менің тапсырмам бойынша қылмыстық процестің үш буынды моделі енгізіліп жатыр. Мұндай модель айыптаушылық ұстанымды бәсеңдетіп, қылмыстық процеске заңсыз араласуды болдырмайды.

Агенттікке өз қызметін қылмыстық процестің үш буынды моделіне бейімдеуді тапсырамын.

Жалпы, халықаралық озық тәжірибені ескеріп, сыбайлас жемқорлыққа қарсы бастамаларды енгізуді жалғастыра берген жөн.

Қоғам, бизнес және инвесторлар сыбайлас жемқорлық қысымынан сақтайтын мықты қорған бар екенін сезінуге тиіс.

Жаңа басшы Агенттік жұмысының тиімділігін одан әрі арттыра түседі деп сенемін.

Еңбектеріңіз жемісті болсын!

Алик Шпекбаев

Жасы 63-те (4 шілде). Алматы облысындатуған. Шымкенттегі КСРО ІІМ милиция мектебін (1980 ж.), КСРО ІІМ Қарағандыдағы жоғарғы мектебін (1987 ж.) РФ ІІМ Академиясын (1991-1992 жылдары) бітірген.

Еңбек жолын 1978 жылы слесарь-сантехник болып бастаған.

2000-2003 жылдары Алматы облысы ІІБ басшысы,

2003-2008 жылдары ҚР ІІМ вице-министрі,

2008-2014 жылдары Президент әкімшілігінің құықтық жүйелер бөлімінің меңгерушісі,

2014-2015 жылдары ҚР Мемлекеттік қызмет және жемқорлыққа қарсы күрес агенттігі төрағасының орынбасары,

2016-2016 жылдары ҚР Жемқорлыққа қарсмы күрес Ұлттық бюросы төрағасының орынбасары,

2016-2017 жылдары ҚР Мемлекеттік қызмет және жемқорлыққа қарсы күрес агенттігі төрағасының орынбасары,

2017-2019 жылдары ҚР Мемлекеттік қызмет және жемқорлыққа қарсы күрес агенттігі төрағасы,

2019 жылдан бері қарай ҚР Сыбайлас жемқорлыққа қарсы күрес агенттігінің төрағасы қызметтерін атқарған.

Бүгін қызметінен алынған Алик Шпекбаевтың қандай қызметке тағайындалғаны туралы ақпарат әзірге жоқ.

Өзге лауазымдары:

Қазақстан Алпинистері федерациясының президенті,

ҚР Президенті жанындағы Адам құқықтары жөніндегі комиссия мүшесі,

ҚР Президенті жанындағы Құқықтық этика жөнінджегі кеңестің мүшесі,

ҚР Президенті жанындағы Жемқорлықпен күрес жөніндегі комиссия мүшесі,

«Қазақ күресі» федерациясының президенті.

Әскери шені: Генерал-лейтенант (2019 жыл).

Марат Ахметжанов

1964 жылы бұрынғы Жезқазған облысында туған. Қазақ, орыс және ағылшын тілдерін меңгерген.

Қарағанды мемлекеттік университетін тәмамдаған (1991 жылы). Мамандығы – заңгер.

Еңбек жолын Теміртауда прокуратура тергеушісі болып бастаған. Бас прокуратурадағ Атырау, Павлодар, Оңтүстік Қазақстан облыстарында прокуратурада түрлі лауазымдарға тағайындалған.

2016 жылдан бері ҚР Бас прокурорының орынбасары қызметін атқарған.

Өзге лауазымдары:

ҚР Президенті жанындағы Адам құқықтары жөніндегі комиссия мүшесі.

Шені: 2 дәрежелі Мемлекеттік кеңесші (әділет кеңесшісі).

Abai.kz

14 пікір

Үздік материалдар

Алғыс айту күні

Алғыс айту күні және оның шығу тарихы

Жомартбек Нұрман 1562
Алашорда

Қожанов межелеу науқанында (Жалғасы)

Бейбіт Қойшыбаев 2256
Ғибырат

Қайсар рухты ғазиз жан

Мұхтар Құл-Мұхаммед 3530