Seysenbi, 19 Qaraşa 2019
Öner 1153 2 pikir 18 Qazan, 2019 sağat 14:16

Äkemteatr 94-şi mausımnıñ şımıldığın aştı

Almatıda Mwhtar Äuezov atındağı akademiyalıq drama teatrı 94-şi mausımnıñ şımıldığın aştı. Jaña mausım "Alaş" ädebi sıylığınıñ laureatı Äliya Böpejanovanıñ audarmasındağı, Grigoriy V. Tomskiydiñ «Attila men Aeciy» qoyılımınıñ prem'erasımen bastaldı. Spektakl'diñ qoyuşı-rejisseri - Qazaqstannıñ eñbek siñirgen qayratkeri Alma Käkişeva.

Ayta keteyik, äkemteatr jaña mausımnıñ aşıluına deyin Pavlodar, Semey jäne Öskemen qalalarına gastrol'dik saparmen barıp keldi. Bwl sapar barısında teatr wjımı körermen qauımğa:

-Mwhtar Äuezovtıñ «Abay» tragediyasın (rejisseri – Qazaqstannıñ halıq artisi Esmwhan Obaev),

-Aleksandr Volodinniñ «Qoştasqım kelmeydi..» dramasın (rejisseri QR eñbek siñirgen qayratkeri Ashat Maemirov),

-Tınımbay Nwrmağanbetovtıñ «Qojanasır tiri eken...» komediyasın (rejisseri QR eñbek siñirgen qayratkeri Orazhan Kenebaev),

-Ğarifolla Esimniñ «Tañswlu» dramasın (rejisseri QR eñbek siñirgen qayratkeri Alma Käkişeva) 

-Baqıt Bedelhannıñ «Mwqağalimen sırlasu» poetikalıq qoyılımın (rejisseri Äridaş Ospanbaeva) wsındı. 

Teatr direktorı Säbit Äbdihalıqovtıñ aytuınşa, bwl mausımnıñ erekşeligi - halıqqa, körermenderge barınşa jaqın bolu maqsatında arnayı mereke sipatında wyımdastırılğan.

Säbit Äbihalıqov, M.Äuezov teatrınıñ direktorı: 

-Biz osı maqsatta teatr foyesinde arnayı "Mwhtar auılı", "Şämşi auılı", "Mwqağali auılı", "Poeziya bwrışı" siyaqtı teatrlandırılğan körinisterdi el nazarına wsınıp jatırmız. Jäne, prem'era spektakline qatısatın akterlardan basqa teatr ärtisteri körermenniñ swraqtarına jauap berip, halıqpen birge jür. Sonımen qatar, sonau 70-90 jıldarı teatrımızda foto tilşi bolıp istegen Ğaliqwmar Qabdeşov aqsaqalımızdıñ arhivte jatqan, bwrın eş jerde jariyalanbağan suretterin el nazarına wsınıp, teatrda ağamızdıñ foto körmesin  ötkizeyin dep jatırmız. Jäne, eñ bastısı - bwl mausımdı jaña prem'eramen aşıp otırmız,- dedi. 

Sonday-aq, Halıq ärtisi Asanäli Äşimov söz alıp, teatrdı jaña mausımnıñ aşıluımen qwttıqtadı. Jäne, qazirgi tañda teatr qoyılımdarına sauattı sın jazılmaytının da aytıp ötti.

Asanäli Äşimov, QR Halıq ärtisi:

-Bwl - sonau 94 jıl bwrın Qızılordada wlılardıñ aşqan teatrı. Wlılar jwmıs istep ketken kieli teatr. Solardıñ izin joğaltpay, solardıñ stilin joğaltpay, ötken ömirin, şeberligin, şeberlik klasın balalarğa siñiru - bizdiñ maqsatımız. Sondıqtan, bwl teatr - ülken qara şañıraq. Sonı qolımızdan kelgenşe qwlatpay, jaña kelip jatqan balalardı sol jolğa salıp, şeberlikterin şıñdap, akterdıñ kim ekenin halıqqa tanıtıp, halıqpen jii kezdestirip, sonday äreket jasaymız. 

Bayağıda Qwndaqbaevtıñ twsında, Qajığwmar Quandıqov twsında Köbetay degen kisi bolğan. Odan soñ, Äşirbek Sığaylardan keyin jaqsı jazılğan, akterlarğa järdem beretin sındardı esti almay jürmiz. Qazir teatr spektakl'derin taldap, sın jazudı köp körmeytin boldım. Teatr - sınşısı bolsa ğana  ösedi. Ol üşin ne isteu kerek? Qoyılımdı birneşe ret körip, mağwlmat alu kerek. Jan-jaqtı zerrteu kerek. Sondıqtan, BAQ ökilderin osı twrğıda bizge kömektesuge şaqıramın. 

Odan soñ, ziyalı qauım ökilderi, körermender men teatr wjımı M.O.Äuezov eskertkişine arnayı gül şoqtarın qoyıp tağzım etti.

Gül qoyu räsiminen soñ, köpşilik qauım Grigoriy V. Tomskiydiñ «Attila men Aeciy» qoyılımın tamaşaladı.

Bwl qoyılımnıñ aytar oyı salmaqtı, köterer jügi auır. Mwnda Attila basqınşı emes, kerisinşe, Europada qwl ielenuşilik qwrılıstıñ şayqaluına äser etken, ondağı halıqtarğa azattıq äpergen wlı qolbasşı, Ğwn-Rim imperiyasın qwrudı armandağan körnekti memleket qayratkeri, diplomat retinde sahnalanğan. Sonday-aq, onıñ süyikti jarı Kere-koğa mahabbatı, rimdik ataqtı general Aeciymen dostığı da körkem körinis tapqan.

Al, teatr direktorı Säbit Äbdihalıqov «Attila men Aeciy» qoyılımın kelesi jılı Italiyağa aparıp qoyuğa niettenip otırğanın ayttı. Ol üşin qazir "Halıqaralıq adam institutınıñ" prezidenti Janwzaq Äkim mırza bastağan birqatar şığarmaşılıq wjım jwmıs istep jatqan körinedi.

Qazaq öneriniñ qara şañırağı atanğan äkem teatrğa şığarmaşılıq tabıs tilep, körermenniñ köñilinen şığatın sübeli tuındılarıñız köp bolsın deymiz!

Nwrbike Bekswltanqızı

Abai.kz

2 pikir