Seysenbi, 12 Qaraşa 2019
Bilik 1825 7 pikir 11 Qazan, 2019 sağat 12:32

Memleket basşısı: Äbiş Kekilbay - qazaq halqınıñ wlı perzenti

Memleket basşısı Aqtau qalasına jwmıs saparmen barıp, jazuşı, qoğam jäne memleket qayratkeri Äbiş Kekilbaydıñ 80 jıldıq mereytoyı ayasında ornatılğan eskertkişiniñ aşılu räsimine qatıstı. Qasım-Jomart Toqaev qalamgerdiñ müsinin saltanattı türde aşıp berdi,-dep habarlaydı Aqorda saytı. 

Tau twlğalı talant, ğwlama oyşıl Äbiş Kekilbaywlınıñ eren eñbegi qanday qwrmetke de layıq ekenin aytqan Qasım-Jomart Toqaev, zañğar jazuşı, asa körnekti memleket jäne qoğam qayratkeriniñ ruhına tağzım etu tek Mañğıstau öñiriniñ ğana emes, bükil elimiz üşin mañızdı oqiğa dep bağaladı.

– Biz bügin ruhın wlıqtap otırğan Äbiş Kekilbay – adamzattıq bolmıstıñ joğarı deñgeyine köterilgen birtuar twlğa, qazaq halqınıñ wlı perzenti. Halqımızdıñ maqtanışına aynalğan azamattardıñ esimin jadımızdan şığarmau – barşamızdıñ parızımız. Elbasınıñ «Şirkin-ay, osınday qazaqtar köbirek bolsa eken» dep Äbiş ağağa rizaşılıq bildirui tegin emes. Ziyalı qauım oğan ayrıqşa qwrmet körsetip, «Qazaqtıñ tañdayı» dep atadı,– dedi Qazaqstan Prezidenti.

Memleket basşısı «Qazaqstannıñ Eñbek Eri» atağına ie bolğan twñğış qalamgerdiñ ädebiet älemine kelgennen bastap wlttıq sananı saqtau üşin mol üles qosqanına, ana tilimizdi, salt-dästürimizdi jäne töl mädenietimizdi däriptep, halqına adal qızmet etkenine toqtaldı. Wlttıq bolmıs pen wlttıq ruh Ä.Kekilbay şığarmaşılığınıñ diñgegine aynalğanın ayttı.

– «Añızdıñ aqırı», «Eleñ-alañ», «Ürker», «Şıñırau» – qaytalanbas tuındılar. Klassik qalamgerdiñ bwl eñbekteri älem ädebietiniñ altın qorına tiesili. Jazuşı qara sözdiñ qwdireti arqılı eldiñ namısın oyatıp, ruhın köterdi,– dep bağa berdi Qasım-Jomart Toqaev.

Prezident memleketimizdiñ jetistikteri qalamgerdiñ wlt tağdırı turalı maqalalarında tolıq körinis tauıp, qoğamnıñ şınayı sipatın tanıtqan Äbiş Kekilbaywlınıñ kösemsözi halıqtıñ ruhani azığına aynalğanın, zañğar jazuşınıñ tuındılarına tarih pen täuelsizdiktiñ arqau bolğanın tilge tiek etti.

– Onıñ bilimi, közqarası, şın mäninde, şeksiz, biregey jäne ämbebap. Äbiş Kekilbay – qazaqtıñ bolmıs-bitimine älemdik keñistikten köz salğan kemel oydıñ iesi. Wlı Abay «Öldi deuge bola ma, oylañdarşı, Ölmeytwğın artında söz qaldırğan» deydi. Äbiş Kekilbaydıñ şığarmaları ğasırdan ğasırğa wlasatın ruhani qwndılıq bolıp qalatını sözsiz,– dedi Memleket basşısı.

Qasım-Jomart Toqaev Äbiş Kekilbaywlınıñ ğwlama jazuşı ğana emes, asa körnekti memleket jäne qoğam qayratkeri ekenin, Elbasınıñ senimdi serigi retinde Täuelsiz Qazaqstannıñ negizin qalauğa qosqan ülesi orasan zor dep atap ötti.

Memleket basşısı jazuşınıñ elimizdegi joğarı lauazımdarda qızmet istep, halıqtıñ ıqılasına bölengenin, Joğarğı Keñes törağası, Memlekettik hatşı, Senator qızmetterin abıroymen atqarğanın ayttı.

– Äbiş Kekilbay Täuelsizdigimizdi qorğauğa jäne nığaytuğa atsalısqan asa körnekti qoğam qayratkeri bolğanına eşqanday kümän joq. Öytkeni ol qazaqtıñ oy-sanasın jañğırtqan wlı özgeristerdiñ bası-qasında jürdi. Körnekti qayratker egemen elimizdiñ tarihi şejiresinde öz qoltañbasın qaldırdı. Onıñ «Täuelsizdik – tätti söz ğana emes, wlttıq jauapkerşilik» degen twjırımı barşağa oy saladı,– dedi Memleket basşısı.

Qasım-Jomart Toqaev Äbiş Kekilbaywlı el müddesin bärinen de biik qoyğan nağız patriot, sanalı ğwmırın eline qaltqısız qızmet etuge arnağan ardaqtı azamat, barşa jwrtqa wltjandılıqtıñ ozıq ülgisin körsetken twlğa ekenin ayta kele, qazirgi qazaqstandıq patriotizm üş twğırğa negizdelui kerek dep sanaytının mälim etti.

– Birinşi, patriotizm töl tarihımız ben şıqqan tegimizdi tereñ wğınudan bastaladı. Halqımızdıñ basınan ötken qilı zamandı jäne el eñsesin kötergen jetistikterdi jas wrpaqtıñ bilgeni öte mañızdı. Tüp-tamırımız mıñjıldıqtarğa wlasadı. Mwnı maqtanış sezimmen aytu – parız­­­,– dedi Qasım-Jomart Toqaev.

Sonday-aq ol tarihımızğa qatıstı köptegen derekterdi jarıqqa şığaru qajettigine, azattıq üşin küresken arıstarımızdıñ esimin wlıqtau arqılı azamattarımızdıñ, äsirese, jastardıñ boyına otanşıldıqtı darıta alatınımızğa män berdi.

– Ekinşi, patriotizm memleketimizdi jäne memlekettik instituttardı qwrmetteuden bastaladı. Memleketimizdiñ qazirgi qwndılıqtarın bağalau –­ barşamızğa ortaq mindet. Bereke men birlik, twraqtılıq pen tınıştıq, tatulıq pen kelisim – bizdiñ bastı baylığımız. Köpşilik, äsirese, jastar memleket bolmasa, wlt bolmaytının wğınğanı jön. Bügingi buın türli qauesettiñ jetegine ermey, el irgesiniñ bütindigin saqtauğa atsalısuı kerek,– dedi Qazaqstan Prezidenti.

Memleket basşısı «Qazaqstan patriotizmi» wğımı bärimiz üşin wlttıq qwndılıq boluı qajet ekenine, bükil ideologiya Otandı şeksiz süyuge bağıttalu kerektigine toqtalıp, elimizdegi jastar wyımdarın osı igi bastamağa jwmıluğa şaqırdı.

– Üşinşi, bizdiñ maqsatımız – eñ damığan memleketterdiñ qatarına qosılıp, älemdegi layıqtı ornımızdı alu. Otansüygiştik – jay ğana wran tastau emes. Qazirgi tañda bwl bilim alu, ğılımğa wmtılu, innovaciya men tehnologiyanı igeru arqılı jüzege asadı. Bügingi zaman – bilektiniñ emes, bilimdiniñ, yağni, aqıl-oy bäsekesiniñ zamanı,– dedi Qasım-Jomart Toqaev.

Prezident jastarımız Qazaq elin bükil düniejüzine tanıtatın jobalar men bastamalardı jüzege asıruğa talpınuı kerek dedi. Sonda ğana otanşıl, wltjandı wrpaqtı jaña geosayasat, geoekonomika jağdayına beyimdey alatınımızdı ayttı. Qazaqstan patriotizmi osınday üş twğırğa negizdelse, täuelsizdigimizdiñ nığayıp, elimizdiñ jarqın bolaşağına jol aşatınına toqtaldı.

Memleket basşısı qazaq ziyalılarınıñ salmaqtı sözi – tärbieniñ tiimdi qwralı dep erekşe ekpin berdi.

– Bügingi küni ziyalı qauımnıñ mañızdı mindeti öskeleñ wrpaqtı patriottıq ruhta tärbieleu dep sanaymın,– dedi Qasım-Jomart Toqaev.

Qazaqstan Prezidenti söz soñında Äbiş Kekilbaywlınıñ «Wrpağına ie bola almağan jwrt wlttıqtan ayırıladı» degen sözi ärdayım esimizde twratının aytıp, jazuşınıñ mol mwrası, önegeli tağılımı osı maqsatqa qızmet ete beretinine senim bildirdi.

Abai.kz

7 pikir