Jwma, 18 Qazan 2019
Alaşorda 724 3 pikir 9 Qazan, 2019 sağat 10:52

Swltanbek Qojanovtıñ 125 jıldığı Türkistanda toylandı

Asa körnekti memleket qayratkeri Swltanbek Qojanovtıñ (Hodjanovtıñ) tuğanına 125 jıl toluı Türkistan oblısınıñ Sozaq audanında da toylandı.

Merekege Türkistan öñirindegi audandarmen qatar Astana, Almatı, Şımkent qalalarınan, körşi oblıstardan ökilder keldi. Audan ortalığı Şolaqqorğanda  «Wltın süygen wlı twlğa» taqırıbımen aymaqtıq ğılımi-täjiribelik konferenciya, qayratkerdiñ tuğan jeri Aqsümbe auılında merekelik saltanattı jiın – «Şığıstıñ Şıñğıs hanı» degen atpen eske alu küni bolıp, as berildi, türli mädeni is-şaralar ötkizildi. Jwrtşılıq aldında oblıs, audan äkimdikteriniñ basşıları jäne Qojanovtıñ mereytoyın twñğış ret 1994 jılı 100 jıldığına oraylastırıp  ötkizgen  memleket jäne qoğam qayratkeri Quanış Aytahanov qwttıqtau söz söylep, ğalımdar bayandamalar jasadı. Ardagerler, türli sala qızmetkerleri estelikter ayttı, qojanovtanuşılıq bağıtta atqarılıp jatqan ister jayında äñgimeledi. Swltekeñniñ Kentaudan kelgen Swltanbek Qojanov esim-soylı wrpağı  atasınıñ ruhın wlıqtağan jwrtqa rizaşılığın bildirdi. S. Qojanov atındağı qayırımdılıq qor prezidenti Mwqan Äbdiramanwlı qojanovtanuşılardıñ bir tobın arnayı «Swltanbek Qojanovqa 125 jıl» merekelik medalimen marapattadı.

Mereytoyğa qatısuşılarğa Şolaqqorğandağı konferenciya moderatorı ğalım Nariman Nwrpeyisov qwrastırğan «Wltın süygen wlı twlğa»  attı ğılımi maqalalar jinağı tartıldı. İs-şaranıñ aqsümbelik böliginiñ wyımşıldıqpen ötuine is adamdarı – almatılıq Kamal, türkistandıq Mwrat qajı, äsirese Aqsümbedegi Swltanbek esimin alıp jürgen mektep direktorı Meyram Älmahanov sındı azamattar eleuli eñbek siñirdi.

Totalitarizm jıldarı wmıttırılıp kelgen wlı twlğalarımızdı täuelsizdiktiñ arqasında wlıqtay bastağanımız belgili, al bügingi ruhani jañğıru mäselelerin şındap qolğa alğan şaqta olardı tereñ tanuğa tırısuımız äbden orındı äreket ekendigi dau tuğızbaydı.

Bwl rette Qojanovtıñ qayratkerlik qırları äli talay zertteulerge arqau boları sözsiz. Onıñ 1924 jılı Ortalıq Aziyadağı respublikalardı bir federaciyağa wyıstırıp barıp, Sovet Odağı qwrıltayşıları qatarına kirudi, federaciya qwramındağı wlttıq birlikterdiñ arasında ekonomikalıq odaq qwrudı, sodan soñ,   olardıñ damu deñgeyin teñestirip, damıtqannan keyin ğana, jeke respublikalar retinde otau tiguine pwrsat berudi wsınğanı mälim. Wsınıs mejeleu nauqanında keri qağıldı.

Biraq qazir sonıñ ortaq müddege oñdı qızmet etui ıqtimal jağın, mäseleniñ aq-qarasın parıqtap, täuelsizdik qarsañında paydalanılmağandıqtan joğaltqan mümkindikterimizdi saralap qarau arqılı Swltekeñniñ halıqaralıq därejede oy qorıtqan sayasatkerligin tereñ tüsine alamız. Qojanov serikterimen birge Orta Aziyadağı wlttıq-aumaqtıq jiktep-mejeleu kezinde qazaq jer-suı şekterin anıqtaumen qatar, Özbek respublikası işinde Qazaq avtonomiyalıq audanın, Täjik avtonomiyalıq oblısın qwru, işinde qazaqtar da twratın Qaraqalpaq  avtonomiyalıq oblısın wyıstırıp, onı Qazaq eline qosu şaraların jürgizudiñ bel ortasında jürdi.  Ol şın mäninde qazaq jer-suı men halqın bir şañıraq astına jinauşı boldı. İrgesi keñeygen Ülken Qazaqstandı Wlttıq Respublika dep atadı. Mwnıñ bärin tereñ zerdelep, şındap tanu jäne ädil bağasın beru aldağı uaqıt ülesinde. Sozaqtağı ülken toy osınday oylarğa jeteledi.

Beybit Qoyşıbaev

Abai.kz

3 pikir