Seysenbi, 22 Qazan 2019
1925 14 pikir 20 Qırküyek, 2019 sağat 17:38

«Nur Otan»-nıñ qoldauımen Sarıarqa törinde alaman aytıs ötti

Qarağandı qalasında «Nur Otan» partiyasınıñ qoldauımen jäne oblıs äkimdiginiñ wyımdastıruımen halıqaralıq aqındar aytısı ötti. Eki künge jalğasqan söz sayısı qazaqtıñ birtuar wlı, Alaş ardaqtısı Säken Seyfullinniñ 125 jıldığına arnaldı. Aytıstı tamaşalauğa arnayı kelgen «Nur Otan» partiyası Törağasınıñ Birinşi orınbasarı Bauırjan Baybek eldiñ müddesin jırğa qosqan aqındardıñ tapqırlığına rizaşılığın bildirdi.

Öz sözinde Bauırjan Baybek qoğamdıq oy men mädeni tarihımızda erekşe ornı bar küresker twlğağa arnap ötkizilgen bwl aytıs «tar jol, tayğaq keşu» zamanda ömir sürgen ayaulı aqınnıñ ruhın asqaqtatıp qana qoymay, birligimiz ben ıntımağımızdı da nığayta tüskenin ayttı.

Sonday-aq ol aytıstıñ wlttıq mwramız ğana emes, qoğamdağı özekti mäselelerdi aşıq aytıp, olardıñ aldın alu joldarın wsınatın wtımdı tetik ekenin de tilge tiek etti.

– Qazaqta «auruın jasırğan öledi» degen söz bar. Sonldıqtan biz kemşilikterimizdi aşıq aytıp, olardı şeşu joldarın qarastıruımız kerek. Bwl rette aytıstıñ röli erekşe. Aytıs – bizdiñ ruhani baylığımız. Sol sebepti partiya töl önerimizdi qolğa alıp, jüyeli türde qoldau körsetetin boladı, – dedi Bauırjan Baybek.

Sonımen partiya Törağasınıñ Birinşi orınbasarı partiyanıñ sayasi doktrinasında ruhaniyat, mädeniet, wlttıq qwndılıq mäselesine ülken köñil bölingenin jetkizdi.

– Töl mädenietimizdi törge şığarmasaq jetistikterge jete almaymız. Sondıqtan bizdiñ partiya aytıstı qolğa alıp otır. Tek biılğı jıldıñ soñına deyin «Nur Otan»-nıñ qoldauımen bes alaman aytıs ötedi. Onıñ alğaşqısı Atırauda ötken Fariza Oñğarsınovanıñ 80 jıldığına arnalğan aytıs bolsa, ekinşisi Sarıarqa törindegi bügingi söz sayısı. Odan bölek, qırküyektiñ soñında Almatı qalasında «Otan otbasınan bastaladı» attı otbasılıq aytıs ötedi. Al qazan ayında Nwr-Swltan qalasında jäne jıl soñında Oral qalasında «Altın dombıra» respublikalıq aqındar aytısı wyımdastırıladı, – dedi Bauırjan Baybek.

Ayta keteyik, Qarağandıdağı aytıstıñ nätijesinde Maqsat Aqanov pen Jandarbek Bwlğaqov bas jüldege ie boldı. Al Didar Qamiev, Mwhtar Niyazov jäne Bauırjan Şirmedinwlı ekinşi orın alsa, Aybek Qaliev, Äsem Erejeqızı, Bürkitqazı Ädilbek, Bekarıs Şoybekov, Nwrmat Manswrovtar üşinşi orınnan körindi. Jüldeger atanğan barlıq aqınğa qarjılay sıy-siyapat körsetildi. Olardan bölek, tağı birqatar aytıskerge şabıttanu sıylığı berildi.

Abai.kz

14 pikir