Beysenbi, 21 Qaraşa 2019
Sañlaq 1797 4 pikir 20 Qırküyek, 2019 sağat 13:57

Qwramında jalğız qazaqstandıq oyınşı bar «Astana» MYU-dan jeñildi

«Astana» Europa Ligası toptıq kezeñi ayasındağı alğaşqı matçın sırt alañda angliyalıq «Mançester YUnayted» komandasına qarsı ötkizip, 1:0 esebimen jeñilip qaldı.

Törtinşi jıl qatarınan Europa ligasınıñ toptıq kezeñinde baq sınap jatqan elordalıq komanda Mançester qalasına ülken ümitpen attanğan. Ärine MYU-di jeñip, üş wpay enşileymiz dep ümittenbegen bolar, biraq, ataqtı «Old Tráfford» stadionında dop tebudiñ özi maqtanış degendi jii aytıp jürdi. Tipti «Astananıñ» aynalasındağı basşı-qosşılar qazaq futbolına "atasında körmegendi botasında körsettik" degenge keltirip, bwl oqiğanıñ tarihi jetistik ekenine sendirgisi keldi.

«Mançester YUnaytedtiñ» Europadağı eñ bedeldi komandalardıñ biri ekenine dauımız joq. «Qızıl soyqandar» dep atalatın bwl komandanıñ janküyerleri älemniñ är tükpirinen tabıladı. Alayda, soñğı jıldarı «soyqandardıñ» sağı sınğan. Öz eliniñ üzdigi atanudan ümiti üzilgeli bes-altı jıl boldı. Soğan qaramastan MYU bizdiñ «Astananıñ» qasında alıptıñ alıbı ekeni sözsiz.

Sonımen «Old Tráffordtağı» oyın ötti. «Mançester YUnayted» jasıl alañğa bir ğana negizgi qwram oyınşısın şığardı. Şabuılda Tahit Çong, Meyson Grinvud sekildi jas balalarğa bas-köz bolu üşin Markus Reşford alañğa şıqtı. Qalğan futbolşılardıñ bäri de «qızıl soyqandardıñ» negizgi qwramınan orın ala almay, qosalqı qwramda otırğandar.

Al «Astananıñ» bas bapkeri Roman Grigorçuk bar mıqtısın alañğa şığardı. Bir özgeris, tireuşi jartılay qorğauşı poziciyasına YUriy Logvinenkonıñ ornına horvatiyalıq Luka Şimunoviç şıqtı. Biraq, bwl asa köregen şeşim bola qoymağan sekildi, ekinşi taym basında YUriy öz ornına oraldı.

Osı jerde ayta keter bir mäsele, «Astana» sapında bwl kezdesudi birinşi minuttan bastağan 11 futbolşınıñ tek bireui ğana taza qazaqstandıq. Sol qaptaldağı qorğauşı Dimtriy Şomkodan basqa on oyınşı şetelden kelgen şeberler. Ras, Qaqpaşı Eriç pen ortalıq qorğauşı Postnikovta Qazaqstannıñ kök pasportı bar. Biraq, bwnıñ birinşisi Serbiyada tuıp-ösken, soñğısı Reseydiñ ekinşi sorttı oyınşısı. Al qalğanı legionerler.

Qwramında qazaq tügili qazaqstandıq oyınşı az elordalıq komandağa elde qalğan milliondağan qazaq janküyerlik etti. Qazaqstannıñ komandasın qazaqtan basqa kim qoldaydı deysiz?! Eldegi özge wlt ökilderiniñ reseylik komandalarğa janküyer ekeni jasırın emes, olar üşin «Astananıñ» jeñisinen «Zenittiñ» jeñilisi äldeqayda artıq.

Al alañdağı oyın jaylı aytudıñ özi artıq. Eger qazaqstandıq komanda qatısıp jatır demeseñiz, tün wyqıñızdı bölip mınaday oyındı tamaşalaudıñ qajeti şamalı. 11 oyınşımen öz qaqpamızdıñ aldına jatıp alıp qorğanğan «Astana» angliyalıq janküyerlerdiñ külkisin keltirgen bolu kerek. 90 minut boyı qarsılas qaqpasına birde-bir tura soqqı bağıttay almasaq ta, öz qaqpamızğa bir gol ğana ötkizgenimizben maqtanamız endi...

Bwnday matçtardı özge eldiñ komandaları tiimdi paydalana biledi. jeñilse de barınşa jaqsı öner körsetip, üzdik mamandardıñ közine tüsip qaluğa tırısadı. Sol maqsatta komandadağı jas äri talanttı oyınşılardı alañğa şığarıp, özin körsetuge mümkindik beredi. Al «Astana» 35, 37 jastağı serbiyalıq, reseylik oyınşılardı alañğa şığardı. 90 minut boyı qorğandı, eşqanday şabuıl jasamadı, öner körsetti deuge mülde kelmeydi. Sonıñ özinde jeñilip qaldı. Tım qwrığanda wlttıq qwrama müşesi YUriy Percuhtı oynatu kerek edi. Jas oyınşı täjiribe jinar edi, mümkin mamandardıñ közine tüser edi...

Europa ligası. Toptıq kezeñ

Europa ligası-2019/20. L tobı. 

«Mançester YUnayted» - «Astana» - 1:0(0:0)

Gol: Meyson Grinvud 73

«Mançester YUnayted»: Serhio Romero, Aksel' Tuanzebe, Fil Djons, Markos Roho, Diego Dalot, Endjel Gomes, Neman'ya Matiç, Fred, Markus Reşford, Tahit Çong, Meyson Grinvud.

«Astana»: Nenad Eriç (K,V), Dmitriy Şomko, Jarko Tomaşeviç, Evgeniy Postnikov, Antonio Rukavina, Ivan Maevskiy, Luka Şimunoviç(YUriy Logvinenko 46), Runar Mar Sigur'onsson, Roman Murtazaev(Rangelo YAnga 46), Marin Tomasov, Dorin Rotariu.

«Astana» - elimizdegi eñ "bay" klub. «Samwrıq-qazınanıñ» san millionın sarıp etip otırğan komanda qarjıdan qısılğan emes. «Astananıñ» biılğı jıldıq byudjeti 10 milliad teñge. Bwl mälimetti klubtıñ bas direktorı Mihail Gurman özi aytqan.

Jaqında ğana halıqtıñ esebinen kün körip otırğan osı klubqa qatıstı keleñsiz jaydı söz etken edik. Onda keşegi qarsılası «Mançester YUnaytedti» öz alañında qabıldaytın oyınnıñ bilet bağası tım qımbat ekenin ayttıq. «Astana» - «Mançester YUnayted» oyınında eñ qımbat bilet 55 mıñ teñge eken.

«Mançester YUnaytedke» qarsı oyın:

1-şi kategoriyadağı orındardıñ bilet bağası - 55 000 (elu bes mıñ) teñge;
2-şi kategoriyadağı biletter - 40 000 (qırıq mıñ) teñge;
3-şi kategoriyadağı biletter - 25 000 (jiırma bes mıñ) teñge;
4-şi kategoriyadağı biletter - 16000 (on altı mıñ) teñge;
5-şi kategoriyadağı biletter - 11,000 (on bir mıñ) teñge;
6-şi kategoriyadağı biletter - 4000 (tört mıñ) teñge.

Qazaqstan çempionatı ayasındağı oyındarda «Astana Arenada» bilet bağası 200-500 teñgeden. Al Europa ligasında bağa 100 ese qımbattap otırğanın aqparat qwraldarı jarısa jazğanımen, klub basşıları bwğan jauap bere qoyğan joq...

Quanış Qappas

Abai.kz

4 pikir