Düysenbi, 21 Qazan 2019
Ğibırat 1223 6 pikir 16 Qırküyek, 2019 sağat 15:14

Äleumettiñ äleueti – mañızdı mäsele  

Halıqtıñ äleumettik mäselesine nazar audaru memlekettik sayasattıñ basım bağıtına aynaldı. Ädilin aytqanda, elimizde är azamattıñ twrmıs-tirşiligi men igiligi üşin tiisti bağdarlamalar qabıldanıp, jwmıs jüyeli jüzege asuda. 

Qazaqstan Prezidenti Qasım-Jomart Toqaev «Sındarlı qoğamdıq dialog – Qazaqstannıñ twraqtılığı men örkendeuiniñ negizi» attı Joldauında halıqtıñ äleumettik mäselesine basımdıq berdi. Jekelegen azamattardıñ ötiniş-tilekteri men talaptarı mindetti türde orındalatının mälimdedi.

Rasında, halıqqa qızmet etuden asqan ğaziz närse joq. Jwrttıñ qarapayım talap-tilegin orındau – kez kelgen salağa jauaptı twlğanıñ asıl borışı. Ardaqtı payğambarımız Mwhammed (oğan Allanıñ salauatı men sälemi bolsın): «Aralarıñda eñ jaqsılarıñ – aynalasına paydalı bolğandarıñ», – dep qoğamğa şuağın şaşıp, jaqsılığın jayıp jüretin köpşil kisiniñ märtebesin erekşe atap ötken.

Osındayda halıq danalığında aytılatın:

«Jaman erdiñ qayğısı,

Öz otınıñ qasında.

Jaqsı erdiñ qayğısı,

Auılınıñ basında», – degen oramdar oyğa oraladı...

Prezident qazaq halqınıñ memleket qwrauşı wlt retindegi rölin bekemdep, etnosaralıq tatulıq pen dinaralıq tüsinistikti qalıptastıra beru qajettigin atap ötti. Rasında, bwl – öte özekti mäsele. Biz täuelsizdik jıldarında qanday asudan asıp, nendey belesti bağındırsaq ta birligimizdiñ arqasında qol jetkizdik.

Qasım-Jomart Toqaev älem moyındağan ğwlama äl-Farabidiñ 1150, häkim Abaydıñ 175 jıldıq mereytoyına oray twlğalarımızdıñ eñbekterin halıq arasında däripteudi tapsırdı. Bwl bastamanı elimizdegi din ğalımdarı men mwsılman qauımı da ülken quanışpen qabıldadı. Islam dininiñ adamgerşilik qwndılıqtarın nasihattauda äl-Farabi, Abay, Şäkärim, t.b. twlğalarımızdıñ ömiri men öşpes mwrası qwndı qwral bola aladı.

Qazaqstan mwsılmandarı dini basqarması birneşe jıldan beri «Din men dästür jılı» bastaması ayasında uağız-nasihat jwmıstarında qazaq halqınıñ bi-şeşenderi men aqın-jıraularınıñ, ğwlama-ğalımdarınıñ wlağattı sözderin, tağılımdı twjırımdarın nasihattap keledi. Bwl igi is ärdayım jalğasın taba bermek.

Memleket basşısı Joldauda ekonomikalıq äleuetimizdi arttırumen qatar, bilim sapasın köteruge ayrıqşa män berdi.

Iä, bilim – bağa jetpes qazına. İlimsiz örkeniet joq. Büginde küş pen quat – bilimde. Ğılımnan asqan qımbat dünie joq. Payğambarımız Mwhammed (oğan Allanıñ salauatı men sälemi bolsın): «Bilim men hikmet mwsılmandardıñ joğaltqan qazınası, qay jerden tapsa da iemdenip alsın», – degen. Oqu orındarında oqıp jürgen wl-qızdarımız, bauırlarımız el-jwrtqa payda äkeler bilim izdense, älemniñ eñ ozıq tehnologiyaların üyrenip, onı özgege üyretse – elge qosqan ülesi osı bolmaq.

Alla Tağala memleketimizdiñ bolaşağın bayandı etip, halıqtıñ äl-auqatın köteru jolındağı igi isterimizge bereke bergey! Ämin!

Serikbay qajı Oraz

Qazaqstan mwsılmandarı  dini basqarmasınıñ törağası, Bas müfti

Abai.kz

6 pikir