Jeksenbi, 15 Qırküyek 2019
Jañalıqtar 813 0 pikir 12 Qırküyek, 2019 sağat 12:48

«Nur Otan» partiyasınıñ qoldauımen ötetin aytıs «Qazaqstan» telearnasınan körsetiledi

«Nur Otan» partiyası, «Qazaqstan» RTRK jäne «Aytıs aqındarı men jırşı, termeşilerdiñ halıqaralıq odağı» respublikalıq qoğamdıq birlestigi özara ıntımaqtastıq turalı memorandumğa qol qoydı. Üşjaqtı kelisimge säykes, jıl soñına deyin «Nur Otan» partiyasınıñ qoldauımen elimizdiñ birneşe aymağında ötetin barlıq aytıstı «Qazaqstan» telearnasına aqparattıq süyemeldeuge, yağni, söz alamanın tüsiruge jäne efirge şığaruğa qwqıq beredi.

Partiya Törağasınıñ Birinşi orınbasarı Bauırjan Baybek bwğan deyin öziniñ Instagram paraqşasında «Nur Otan» partiyasınıñ doktrinasında qazaq tilin, mädenieti men salt-dästürin damıtu qoğamdıq birlestiktiñ strategiyalıq basım bağıttarınıñ biri ekeni turalı aytqan-dı. Osı orayda, «Nur Otan» darındı şığarmaşıl jastardı qolday otırıp, töl önerimiz ben wlttıq sport türlerine wdayı qamqorlıq jasap keledi.

«Täuelsizdiktiñ alğaşqı sätinen-aq Elbası wltımızdıñ wlı mwrasın, ozıq dästürleri men mädeni qazınansın tügendeuge, olardı zamanğa say tületip, jañğırtuğa erekşe den qoydı. Halıq öneriniñ örkendeuine jağday jasap, darındı jandarğa jol aştı. Elbasınıñ tikeley bastamasımen iske asırılğan «Mädeni mwra» jobasında, «Bolaşaqqa bağdar: ruhani jañğıru», «Wlı Dalanıñ jeti qırı» bağdarlamalıq maqalalarında da wlttıq ruhani mwramızdı, qwndı jädigerlerimizdi, sporttıq oyındarımız ben öner sayıstarın tügendep, damıtuğa erekşe män berilgen. Ejelden «Bas kespek bolsa da, til kespek joq» dep, han aldında dat aytıp, erkin oyğa erik bergen, barşağa birdey teñdik bergen elmiz. Sondıqtan wltımızdıñ osınday ozıq önerin, izgi dästürlerin jalğastıru bizdi kemeldendire tüsedi. Osığan oray, partiya Törağasınıñ bastamasımen qayta jañğıruğa kirisip, ekinşi tınısı aşılıp otırğan sayasi wyımımız aytısqa ayrıqşa nazar audarıp otır» - dep jazdı Bauırjan Baybek.

Sonımen, 12-13 qırküyekte Atırau qalasında Fariza Oñğarsınovanı eske aluğa arnalğan «Jır jwldızı – Fariza» attı respublikalıq aytıs ötedi. Aytıs dese arqası qozatın köpşilik aldında Aspanbek Şwğataev, Erkebwlan Qaynazarov siyaqtı basqa da belgili aytıskerler öner körsetedi.

18-19 qırküyekte Qarağandıda Säken Seyfullinniñ 125 jıldığına arnalğan halıqaralıq aytıs boladı. Bwl alamanğa jergilikti aytıskerlerden bölek Qırğızstan, Qıtay jäne Moñğoliya elderinen kelgen suırıp salma söz maytalmandarı qatısadı.

30 qırküyekte Almatıda «Otan otbasınan bastaladı» attı otbasılıq aytıs, al 19 qazanda Nwr-Swltan qalasında «Bereke birligiñde, elim» degen atpen tağı bir alaman ötpek.

Biıl ötetin söz bäygelerin Oral qalasında 7-8 jeltoqsanda ötetin «Altın dombıra» respublikalıq festivali tüyindeydi.

Abai.kz

0 pikir