Seysenbi, 17 Qırküyek 2019
Bir saual 1787 4 pikir 11 Qırküyek, 2019 sağat 12:42

Nwr-Swltannıñ bilim basqarması ministrlikke bağınbay ma?

Juırda mektepterde dünie jüzi tarihı pänin orıs tilinde oqıtu turalı aytılıp qaldı. Alayda, ol qoğam tarapınan qoldau tappadı. Keyinnen Bilim jäne Ğılım ministrligi onıñ jalğan aqparat ekenin aytıp, senbeuge şaqırdı. Al, küni keşe “Nwr-Swltan qalasınıñ bilim basqarması” memlekettik mekemesiniñ basşısı Änuar Janğozin Elordanıñ birneşe qazaq mektepteri atalğan pändi orıs tilinde oqu turalı bwyrıq şığarıptı.  

Al, 8-şilde küni Bilim jäne Ğılım ministriniñ keñesşisi Erbolat Mwhamedjan äleumettik jelidegi paraqşasında atalğan aqparattıñ jalğan ekenin jazıp, tipti, arandatuşılıq dep esepteytinin de ayttı.

Erbolat mırzanıñ pikirin qaz-qalpında keltireyik:

-Keşeden beri äleumettik jelide "Dünie jüzi tarihı" päni oqu jılı basınan qazaq mektepterinde orıs tilinde oqıtıladı degen jalğan aqparat taratıluda.

Birinşiden, bwğan deyin jazğanımday, äleumettik jelide jariyalanğan «fake aqparatqa» senbeuleriñizdi swraymın. Bwnıñ bärin arandatuşılıq dep esepteymin.

Ekinşiden, iä, rasında, bwl mäsele osıdan birneşe jıl bwrın köterilgen. Biraq, sizderge naqtı senimmen ayta alamın, qazir jalpı bilim beretin qazaq mektepterde Dünie jüzi tarihı päni orıs tilinde oqıtılıp jatqan joq. Qazirgi uaqıtta jalpı bilim beretin mektepterde osı pän oqıtu tiline baylanıstı, yağni qazaq sınıptarında qazaq tilinde, al orıs sınıptarında orısşa jürgizilip jatır, bügingi küni basqa jospar joq.

P.S. Barlıq swraqtarğa BĞM ärqaşan jauap beruge dayın. Sondıqtan aldın ala osınday swraqtarıñızdı anıqtap alularıñız dwrıs.

Alayda, Nwr-Swltan qalalıq bilim basqarması Bilim jäne Ğılım ministrliginiñ bwl talabın eskermegen siyaqtı. Esesine, Janğozin mırza  qazir mektepterdegi balalardıñ mektep ğimaratın tazalap, tehnikalıq qızmetkerlerge kömek körsetuine qattı män berip jürgen körinedi. Özi de jwmıstan soñ tehnikalıq qızmetker äyelderge kömektesemin dep şeşim qabıldağan ol, #öziñnenbasta dep atalğan estafetasın Nwr-Swltandağı barlıq bilim beru wyımdarınıñ basşılarına joldağan.

 

Bwl Janğozin mırzanıñ japondıq ülgide bala tärbieleuge jasağan şın  nasihatı ma, älde, qoğam nazarın älgi bwyrıqtan basqa jaqqa audaru üşin oylap tapqan aylası ma?

Qalay desek te, bwl taqırıp qazir ädäuir talqığa tüsip jatır. Al, Bilim jäne Ğılım ministri Ashat Aymağambetov bwl mäselege qatıstı:

-Mektep byudjetinde äkimşilik-tehnikalıq personalğa tiisti qarajat pen ştat qarastırılğan. mwnday jwmıstar oquşılardıñ öz bastaması boyınşa jäne ata-analardıñ rwqsatımen ğana jürgiziledi, - dep pikir bildiripti. 

Alayda, däl qazir qoğam üşin balanıñ tehnikalıq qızmetkerge kömekteskeninen de, "qazaq balası älemdik tarihtı ne sebepti orıs tilinde oqidı?" degen saual mañızdı bop twr.

Sonda bwl mäselede Bilim jäne Ğılım ministrligi jalğan aqpar berip otır ma, älde, Nwr-Swltan qalalıq bilim basqarması Aymağambetov basqaratın ministrlikke bağınbay ma? Bwl saualdarğa ministr Aymağambetov ne deydi?

Nwrbike Bekswltanqızı

Abai.kz

4 pikir