Seysenbi, 18 Aqpan 2020
Bir saual 5783 70 pikir 6 Tamız, 2019 sağat 13:12

Serikjan Biläş qazaqtıñ bağı ma, sorı ma?

Biılğı jıl Qazaq eli üşin asa küdeli kezeñge ayaq basuımen erekşelendi. Eldi dürliktirgen türli oqiğalardıñ birinenen soñ biriniñ orın aluı halıq arasında narazılıqtıñ küşeyuine äkeldi. Eldegi qalıptasqan äleumettik teñsizdik saldarınan bastalğan narazılıqtıñ soñı rwqsat etilmegen mitingiler wlasqanına bärimiz kuä boldıq. Halıq äli tolıq sabasına tüsken joq.

Tura osınday halıq işinde narazılıq tolqını basılmay twrğan kezeñde halıq arasında jik tuğızıp, el işindegi twraqtılıqtıñ irgesin şayqaltatın tağı bir faktordıñ qalıptasqanına bügingi küni bärimiz kuä bolıp otırmız. Ol -  Serikjan Biläş ılañı desek tura bolatın şığar. Alğaşında Qıtaydan kelgen qandastarımız arasına jik salıp, birin qıtayşıl, ekinşi birin qazaqşıldar dep ekige bölip, arazdastırudan bastağan Serikjan Biläştiñ äreketi oralmandar ayasınan şığıp, jalpı qazaq arasın büldirip, ekige jardı. Bwl ekige jarılğan toptar arasında jası da, jasamısı da jetkilikti. Tipti, müyizi qarağayday Mwrat Äuezov, Mwhtar Mağauin, Mwhtar Şahanov siyaqtı twlğalardıñ bwl daudıñ arasınan körinui Serikjan Biläş salğan ılañnıñ şeñberi jalpı qazaq arasın tolıq şarpığandığın körsetedi.

Bwl tike-tiresten  öz ülesterin alıp qalmaq nietimen sayasatkerler de aralasa bastağanı qazaq qoğamı işin şarpığan alauızdıqtıñ jaña satığa köterile bastağanınan habar berse kerek. Serik Abdirahmanov siyaqtı sayasatkerlerdi aytpağannıñ özinde, jañadan “Alaş” partiyasın qwramın dep jürgen Sırım Abdrahmanov pen ataqtı Mwhtar Ablyazovtardıñ bwl dauğa aralasıp, Serijan Biläşti qolday söyleui ärqaysısınıñ osı tike-tiresten öz ülesterin alıp qalmaq nietteri barlığın körsetti. Ökiniştisi, sol Serikjan Biläşti qoldap, atoy salıp jürgen toptıñ köpşiligi sol adamnıñ keşegi küninen eş habarı joq. Qazaqstanğa kelip alıp, Qıtaydağı qazaqtardıñ jağdayın aytıp, şırıldap jürgenine qarap, “qazaqtı şın janaşırı osı” dep tanığan halıq, oğan qarsı şıqqan, onı sınağan adamnıñ barlığın jau körip, qarsı şıqqandardı şaynap tastauğa dayın ekendigin bildirude. Mısalı, jaqında ğana Mwhtar Şahanov ağamızğa qarsı «Şahanovtıñ atağı Qıtaydağı üş million qazaqtıñ janınan artıq emes» degen atpen tarağan videodağı narazı toptıñ äreketine qarap, Serikjan Biläşti jaqtauşılardıñ sanası qanşalıqtı radikaldanıp, aqıl şeñberinen şığıp bara jatqandığın köruge boladı.

Halıq arasında osınday dau-damay tudırıp, qazaqtı qazaqqa qarsı qoyatınday Serikjan Biläş kim? Onıñ keşegi ötkeninen kimniñ habarı bar? Eşkimniñ de! Köpşilik onıñ «Qazağım»-dep, közinen qoltırauınnıñ jasın ağızıp, Qıtaydağı qazaqtardıñ jayın aytıp, onı jalpaq düniege jayıp jürgenine qarap bağalaydı. Al, şındığında, Serikjan Biläş qazirgi küni qazaq üşin jan beretin adam bolıp köringenimen, sol Qıtaydağı qazaqtıñ basına tüsken bar auırtpalıqtı öz qolımen jasağan, türmege tüsken bar qazaqtıñ türmege tüsuine sebep bolğan adam ekendiginen eşkimniñ habarı joq. Bar bolsa da senbeydi. Onı öziniñ anıq kim ekendigin biletin halıq barlığın, biraq däleldey almay jürgenin özi de ayttı. Biz onıñ ataqtı «Tübi bir türki halıqtarınıñ biriguin qalamaytın qay antwrğan» attı videosınan kördik. Ol videoda ol bılay deydi: «Atajwrttı öşiru kerek boldı. Serikjanda öşiru kerek boldı. Serikjandı vahhabist dep kördi. Biraq ol uahhabist bolmay qaldı. «Şetelden aqşa aladı eken»- dedi. Söytse, ol almaydı eken». Videoda osılay sayrap twr. Şındığında solay ma? Joq. Serikjan Biläştiñ uahhabist ekendigin osıdan bir jıl bwrın öziniñ kitabı «Mıñ bir saparınan» mısaldar keltire otırıp däleldegenbiz.   Onıñ «Mıñ bir sapar» attı şığarmasında jariyalanğan materialdarı onıñ nağız uahhabilik bağıttı Qıtaydağı qazaqtar arasına taratuşı, bastı uağızşı bolğanına közimizdi jetkizdi.

Endi sol «Mıñ bir sapar» attı şığarmasınan sol qısqa üzindini tağı wsınıp köreyik. «Baqsısı joq, qwmalaqşısı joq qazaqtıñ äuleti bar ma eken osı? Tügen äulie, tügen köripkeldiñ atağın esitkende taylı-tayağı qalmay şwbıratın qazaqtı şaytan iektemey qaytsin?! Baqsısı men balgerine, qwmalaqşısına qwdayday wyığan qazaq adaspay kim adassın! Baqsısı men balgerine nanğan qotır tayınşasın tabu üşin Allanıñ qarğısı tigen baqsığa jüginetin, Allanıñ eñ jek köretin künäsin isteuden qorıqpaytın qazaq, Allağa serik qosudan qorıqpaytın qazaq qwrımay, kim qwrısın?! Biz Allanıñ kitabı boyınşa taldau jasap körelikşi. Jañağı söz jaqpaytın düngen men wyğır, sizdiñ aytuıñız boyınşa bolğanda, sizdiñ jinağan aqparatıñız boyınşa bolğanda, kündiz meşitine barıp, keşke körşisiniñ tauığın wrladı delik. Al, qazekeñ toyına jartı baylığın şaşıp tastap, jomart bolıp, bay bolıp, jasap, eşkimniñ ala jibin attamay tek qana, joğalğan qotır tayı üşin baqsığa şauıp bardı delik. Tarazığa salıp ölşeñderşi. Qaysısınıñ künäsi auır eken? Körşiniñ ğazabına qalu degeniñ, Allanıñ azabına qaludıñ qasında eşteñe emes. Assa tapqan saubınan, jiğan imanınan qayırar. Al Allanıñ şektegen, tıyğan, Allanıñ eñ jek köretin künäli isin istegen jañağı baqsışıl qazaqtıñ häli ol düniede qiın bolmaq! Ärine bwl degenimiz jañağı tauıq wrlağannıñ künäsin aqtağanımız emes. Ekeui de künä. Biraq, baqsışıldıñ, müşiriktiñ, Allağa serik qosuşınıñ künäsi keşirilmeytin künä! Meyli jañağı bay, aqköñil qazaq, jomart qazaq, öziniñ bükil wlın, tuıs-tuğanın jalğız özi asırap otırsın! Wlı ğana emes, külli adamzattı, jer betindegi jeti milliard adamdı jalğız özi asırap, baqsa da, baqsığa sengeni wşin, qwmalaqşığa barğanı üşin, aspan men jerdiñ arasın toltırarday sauaptı eñbegi bolsa da, baratın jeri tozaq bolmaq! Osınday künädan qaş qazağım. Allanıñ azabına qaldıratın künädan arıl qazağım!». Mine osı berilgen üzindiniñ özi Jarqın 7-Serikjan Biläştiñ kim ekendigin, Qıtayda qazaqtar arasında qanday bağıttı uağızdağanın körsetip twr. Qazaqtıñ ädet-ğwrıp, salt-dästüri, dästürli dini tolığımen joqqa şığarılıp, uahhabi bolmasañ, tozaqqa barasıñ dep uağızdauda. Sonda Serikjan Biläş kim? Uahhabist! Söyte twra özin sütten aq, sudan taza etip körsetkisi keledi.

Serikjan Biläş uahhabilik uağızın taratıp, halıqtıñ sanası ulanğannan keyin, qazaq jastarınıñ Qıtay ökimetine qarsı äreketi bastaladı. Qıtay ökimeti jappay jazalau şaraların bastaydı. Onı özi de moyındaydı. Qıtaydan kelgen Jarqın Isahan attı jigit jariyalağan videoda ol äñgimesin: «Men bir kezde vitçattıñ koroli bolıp twrğan kezimde, ana ölgen üş malşınıñ äñgimesi. Al, vitçattağılardıñ bäri mıñ-mıñdağan meniñ äskerim ğoy» - dep bastaydı. Bwl jerde Serikjannıñ özi Qıtaydağı vitçat jelisinde ıqpalı bolğandığın aytıp otır. Demek, vitçatta otırıp, Jarqın 7-uağızın taratqandardıñ barlığı Qıtay ükimetiniñ qwrığına ililikti jäne policiya wstağan kezde «Jarqın şidi qoldağanı üşin» dep wstaydı eken [https://youtobe.be/OVmgF6-Blg].

Bwl Qıtay qazağınıñ basına tauqımetti tauıp bergen osı Serikjan Biläş ekendigin körsetedi. Jalpı qıtaylıq sanası ulana qoymağan jastardıñ Serikjan Biläşti Qıtay ükimetiniñ öz adamı dep biledi. Mısalı, Erbol Sämenwlı degen jigittiñ «Qara säuleli lampa» attı jazbasında bılay bayandaladı: «Jarqın 7 däriptegen äsire wltşıldıq pen dinşildik uağızdarına belsendilik tanıtıp, ün qosqan Şihu qalasınan Nwrjan mwğalim, Sanjılıq Sarqıtjan, dörböljiñdik Erzat, Altaydıñ Ağalaq aulınan Jwmabek sıqıldı mıñdağan wltjandı qız-jigitteriniñ Qıtaydıñ qauipsizdik qızmeti tarapınan twtqındalıp, memleket qauipsizdigine qauip töndiru piğılında boldı degen ayıppen ondağan jıl arqalap ketui oyımızdı odan arı däleldey tüsedi. Serikjan Biläş özi sol şığarmasın jazğan kezinde ünemi Qıtaydıñ iri qalaların aralap, äue keñistigin wşaqpen kezip jürgen bolatın. «Mıñ bir saparda» kimniñ ne aytqanın jiti qadağalap otırğan Qıtaydıñ sauısqannan saq arnayı qızmeti Jarqın 7-ni sonşa şoljañdatıp qoyğanın aytpasaq ta tüsinip otırğan şığarsızdar» - deydi.

Bwl jigittiñ aytqandarınıñ şın ekendigin Qıtaydan kelgen bauırlarımızdıñ köpşiligi aşıq ayta almasa da, işteri sezedi. Bir qıtaylıq bauırımız Qıtay gazetinde jariyalanğan mına maqalanı audarıp beripti. Onda bılay delinedi: «Qıtayda 200-den astan qazaq alındı. Olardıñ qılmısı qazaqstandağı arandatuşı Jarqın 7-niñ arandatqış sözderin taratqandar eken». Qıtay qazaqtarınıñ basına sor jamap, türmege tüsirgen Serikjan Biläş ekendigine bwdan artıq qanday dälel kerek? Onıñ mwnday äreketterinen habarsız halıq, «qazağım» dep şırıldağanın körip, qazaqtı bar auırtpalıqtan qwtqaruşı «twlğa» retinde tanığanı şındıq. Qıtaydağı qazaq siyaqtı quğınğa tüsip jatqan az wlttardıñ basına tüsken tauqımetin onı halıqaralıq qauımdastıq aldında äşkerelep, älem nazarın audartqanı onıñ abıroyın arttırdı.

Biraq, Serikjan Biläştiñ bwl äreketteri qazaqqa ne berip jatır? Onıñ soñı nege aparıp wrındıruı mümkin degenge bas qatırıp jatqan qazaq joq. Qazaqtıñ sözin söyledi, boldı, - dep tüsingen qazaq Serikjan Biläşti qoldamağandardı özderine jau sanap, bir-birimen alaköz bolıp otırğan jayı bar. Osılay öziniñ is-äreketimen halıq arasına iritki salıp, onsız da türli ağımdar men bağıttardıñ jeteginde ketip, irkitttey irip otırğan qazaq qoğamın odan da soraqı qadamdarğa itermelep otırğanın köruimizge boladı.  Egerde bwl äreket bwdan arı jalğasatın onda mwnıñ işki qaqtığısqa alıp baru ıqtimaldığı bar. Biz onıñ alğaşqı nışandarı barlığın M.Şahanov ağamızğa qarsı toptıñ äreketinen bayqadıq.

Endigi kezekte Serikjan Biläş büldiru äreketteri bir qazaqpen şektelmeytinine, onıñ büldiru äreketteri halıqaralıq sipat alıp bara jatqanına  közimiz jete tüsti. Serikjan Biläştiñ wyğır seperatisterimen arasındağı baylanıstıñ barlığı, solardıñ şotın şauıp, Qazaq memleketi esebinen wyğırlarğa memleket qwrıp beru josparı da barlığı jalpı halıqqa äşkere bolıp qaldı. Joğarıda silteme jasalğan «Tübi bir türki halıqtarınıñ biriguin qalamaytın qay antwrğan» attı videoda Serikjannıñ serigi Erbol Däuletbek degenniñ «2-3 mln wyğırdı Qazaqstanğa kirgizip, azamattıq bereyik. Odan Qazaqstannıñ eşteñesi ketpeydi. Erteñ Qıtaydağı wyğır joyılatın bolsa, odan keyin Qıtay qazaqqa, basqa türki halıqtarına auız auız saladı» - sarnap otır.

Birinşiden, onday jalpı qazaq atınan töbebilik jasaytın qwqıqtı Serijan Biläş pen Erbol Däuletbekke kim berdi?

Osınıñ bärin körip otırğan qazaqqa «2-3 mln. wyğırdı Qazaqstanğa äkelip, azamattıq bere qoyayıq»- dep jalpaq şeşeylik tanıtıp otırğan Serikjan Biläş pen Erbol Däuletbekti qazaqqa dos, qazaqtıñ janaşırı dep aytuğa keledi me? Mwnıñ artında qazaq esebinen wyğır memleketin qwru sayasatı jatqandığına dau joq. Osı qauiptiñ tübiniñ ne boların sezgen bir bauırımız FB-da jazıptı:

«Qıtaydağı wyğır men Qazaqtı salıstırmañdar!! Ekeui eki basqa älem!! Qıtaydağı qazaqtıñ arqa süyer Otanı bar! Al, wyğırda otanı joq!! Qıtaydağı qazaq wyğırlar sekildi ükimetke qarsı mıñdağan adamdıq qandı köteriliske şıqqan joq, şıqpaq tügili, bir adamdıq piket te jasağan emes, qıtaydı egestiretindey. Qıtaydı egestirip, qazaqqa aydap salatın äreketterdi jasap jürgen sol Serikjannıñ naq özi, qajet bolsa!! Qıtay tipti, Qazaqstanğa birjola köşip ketken qazaqtarğa deyin pensiyasın berip otırdı!! Mäsele, Serikjannıñ küresuinde emes, mäsele onıñ sol wyğır tragediyasın qazaqqa audaru jolında küresuinde!! Bwl ş ı n d ı q!! Qıtaydağı wyğır probleması ondağı qazaqqa päle bolıp jabıstı!! Wyğırlar da sonı iştey qaladı!! ... Al, Qıtayda qıspaq körip jatqan qazaqtar bolsa, olar saqaldı, balaqtı dümşe mwsılmandar». Bwl aytılğandarğa birnärse qosu artıq bolar.

Endigi kezekte Serikjan Biläştiñ Batıspen baylanısı turalı bolmaq. Bwl mäsele osığan deyin Serikjan Biläşqa qatıstı jazılğan eki maqalada arnayı köterilgen bolatın. Ol maqalalarda aytılğan mäselelerdi qayta jazıp, uaqıttarıñızdı alğım joq. Biraq sonda da bolsa, aytpauğa bolmaytın bir mäsele bar. Ol älemdik sayasattağı teke-tireste öz täuelsizdigin jaña alğan Qazaqstan, Qırğızstan, Özbekstan, Türkimenstan, Täjikstan siyaqtı Ortalıq Aziya aymağındağı memleketterdiñ äli bwğanası bekip ülgermey jatıp olardıñ elin men jerin qayta böliske salu alpauıt derjavalardıñ josparında barlığın mwnıñ aldında jazılğan maqalalarda da aytqan bolatınbız.

Onıñ däleli retinde täuelsizdik tañı atqan künnen bastap, bwl elderge dini-ruhani ekspansiyanıñ bastaluın keltiruge boladı. Onıñ soñı nege barıp wrındırğanınan da habardarmız. Sol dindegi alauızdıq saldarınan türli terraktiler men dini-ruhani negizdegi tike-tirester orın almağan birde-bir el joq. Sonıñ saldarınan kez-kelgen respublikada sırttay tınış bolıp köringenimin iştey arbasu bar. Mine, osınday qoğam  işindegi alauızdıqtı odan äri uşıqtırıp, bülik şığaruğa äreket jasap jatqan toptardıñ barlığın körip-bilip otırmız.

Osı maqalanıñ bastı keyipkeri Serikjan Biläştiñ äreketi de sonday qoğam işinde dümpu tuğızuğa bağıttalğandığın ayta ketuimiz kerek. Egerde ol dümpudiñ soñı işki qaqtığısqa wlasatın bolsa, tipten jaqsı. Onda Orta Aziya aymağında bülik şıqqanın kütip otırğan älemdik sayasattağı oyınşıldardıñ kökten swrağanı jerden tabılıp, bwl qaqtığısqa tikeley qatısuğa mümkindik aladı. Egerde olardıñ onday oyları bolmasa, Auğanstan memleketiniñ soltüstigine ondağan mıñ qarulı jasaqtardı toptastıru olarğa ne üşin qajet boldı? Egerde sayasi ahual olay qalıptasa qalğan jağdayda, Qıtay da, Resey de bwl qaqtığıstan tıs qalması anıq. Aldımen qazaq jerine äsker kirgizetin Qıtay bolmaq. Sebebi, qazirgi küni Qazaqstan ekonomikasına köp qarjı salğan memleket Qıtay ekendigi jasırın emes.

Jäne bwl jerde eskerte ketetin tağı bir jäyt, Serikjan Biläş öziniñ äreketinde jalğız emes, onıñ is-äreketin jalğastıruşı äriptesteri körşiles Qırğızstanda, Özbekstanda, Auğanstanda äreketterin jürgizip jatır. Mısalı, Qırğızstan men özge respublikalarda Evgeniy Bunin degeniñ atı atalıp jür. Qırğızstanğa Bunin kelgen kezde qırğızdardıñ Qıtayğa qarsı äreketteri küşeyedi eken. Ötken jılğı jeltoqsan ayındağı qırğız ağayındardıñ Qıtayğa qarsı narazılıq akciyaları kezinde 02-28 jeltoqsan aralığında Bunin Bişkekte boladı. Bwl kezdeysoqtıq pa? Älde...? Jäne onıñ sonday äriptesi Auğanstannan da tabılıptı. FB-da jariyalanğan mına bir posta bılay jazılıptı: «Serikjan biläş kim ekenin bilu üşin Serikjan biläş syqtı ayaq astınan payda bolğan jasandı liderlerdi zertteu kerek. Mäselen, Manzur Paştin. («Mansur Paştin i ego «novaya puştunskaya politika» pol'zuyutsya raspolojeniem angliçan i amerikancev, indiyskogo isteblişmenta i ih marionetok v Kabule liş' s edinstvennoy cel'yu — postarat'sya navredit' rossiyskim i kitayskim interesam v regione», — sçitaet Arif Hasan Han Ahunzada). Serikjan Biläştıñ maqsatı Qazaqstandı düniejüzilik soğıstın alañı jasau».

Demek, bwl derekter memlekettiñ işki twtastığın bwzuğa bağıttalğan is-äreketter tek, Qazaqstan emes, özge de körşiles elderde orın alıp jatqanın körsetedi. Demek, bwl sayasattıñ artında Batıs elderi twrğanın añğaru qiın emes. Maqsattarı – qalayda Ortalıq Aziya aymağında soğıs örtin twtandırıp, sodan öz ülesterin alıp qalu. Ortalıq Aziya aymağındağı negizgi maylı şelpek Qazaqstan ekenin eskeretin bolsaq, onda bwl swrqiya sayasattıñ tüpki maqsatı bizdiñ memleketimizge bağıttalıp otırğandığın tüsinu onşalıqtı qiın emes.

«Bwl mäselege Serikjan Biläştiñ qanşalıqtı qatısı bar degen zañdı swraq tuındarı anıq. Biz onı Batıs elderiniñ Serikjan Biläşti qorğauınan-aq köruimizge boladı. Sayragüldi Norvegiya memleketiniñ öz qorğauına aluı, Serikjan Biläşti Nobel' sıylığına wsınudıñ astarında da onıñ osı baylanısı jatır. Meniñ vatcabıma kelgen avtorı belgisiz maqalada onıñ Batıs elderimen aradağı baylanısın qalıptastırğan Ömirhan Altın ekendigi twspaldap bolsa da aytıladı: «belgisizden bi şıqqan» wltşıl qaharmandardıñ artında özderin demokrat sanaytın wltşıl qıtay ökimeti twrğan joq pa? Sebebi: Qazaqstandağı ayğayşıl toptıñ jüyesin, küresu tehnologiyasın jasap berip otırğan. Bir sözben aytqanda ideyalogı bolıp otırğan germaniyalıq qazaqtıñ artındağı qarjı közi Tayvan boluı mümkin degen boljam bar. Özi biraz jıl Tayvanda oqığan, Tayvan qıtay wlttıq ökimetiniñ diosperası sanalıp, ärtürli qarjılandıru, kömek alıp jürgen toptıñ «atajwrttıñ» negizgi qoldauşısı boluı küdikke küdik qosadı. Sol qoldauşınıñ Türkiyadağı wyğır jetekşilerimen bolğan qarım-qatınasın, qarjılıq baylanıstarın aldağı jağdayda işkerley bölek zertteuge tura keledi.

Qortıp aytqanda, «atajwrt jastarı eriktileri» wltı üşin janın şüperekke tüygen jastardıñ albırt batırlıq qimılına emes, aldı-artın oylastırğan, Qazaqstandağı lobissteri bar, art jağında qıtaydıñ qızılı ma, wltşılı ma, qıtay sayasatınıñ belgisi bar joba boluı äbden mümkin...». Jalpı bwl twjırımğa alıp-qosatın joq bolıp köringenimen, Serikjan Biläştiñ Batıstıñ da müddesine jwmıs istep jürgen adam dep ayta alamız. Olay bolmağan jağdayda olardıñ oğan kömek qolın soza qoyuı ekitalay. Jalpı, Serikjannıñ osı elimizdiñ işki twtastığın bwzuğa bağıttalğan äreketiniñ soñı bülikke wlasatın bolsa, biz sırttan beriletin soqqını eş eskertusiz alatınımızğa kümändarıñız bolmasın. «Demokratiyanı qorğau», «investitciyanı qorğau» degen sıltualardı jeleu etip, elimizge bas saladı. Biz onı Liviya memleketiniñ mısalında kördik. Memlekettiñ işindegi qatığısqa Franciya memleketiniñ basşısı Sarkozi eşbir eskertusiz aralasıp, Liviyanı bombılauğa bwyrıq berdi. Onıñ soñı nemen ayaqtalğanı älemge ayan. Osınday jağday bizdiñ elimizdiñ de basına tüspesin deytin bolsaq onda Serikjan Biläştiñ mına arandatu äreketterine tosqauıl qoyılu kerek.

Ökinişke oray, äzirge bäri kerisinşe bolıp twr. Onı twtqındap, üy qamaqqa otırğızu Serikjan Biläştiñ piar kompaniyasına aynaldı. Qoldan «geroy» jasadıq. Sottağı söylegen ärbir sözi onıñ abıroyın köterdi. Nelikten ekeni belgisiz, prokurorlar da, sot ta özderiniñ därmensizdigin körsetti. Şındığında ol sonşalıqtı künäsiz jan ba? Joq! Mäsele onıñ artında elimizde büliktiñ şıqanına müdelli, ıqpaldı toptıñ twrğandığında bolıp twr. Egerde onday senetini bolmasa, Serikjan Biläştiñ sotta olay söyleui mümkin emes bolatın. Al, bwl mäselege män berip jatqan eşkim joq siyaqtı.

Zikiriya Jandarbek

Abai.kz

70 pikir