Seysenbi, 22 Qazan 2019
792 0 pikir 30 Mausım, 2019 sağat 18:27

Arıstağı 140 bala Burabayğa demalısqa jiberildi

24-mausım küni Türkistan oblısınıñ Arıs qalasında äskeri qoyma jarıldı. Arıstıq twrğındardıñ qalanı tastay qaşuına sebep bolğan joyqın jarılıs, bükil respublika jwrtşılığın bey-jay qaldırmadı. Äsirese, köpşilik Arıstağı balalardıñ jağdayına alañdauşılıq bildirdi.

Büginde Arıs qalasındağı apattan zardap şekken twrğındarğa, olardıñ işinde balalarğa alğaşqı künnen beri 180 erikti psiholog-pedagogtar men praktikter järdem körsetip jatır. Mamandardıñ aytuınşa, onday jarılıstan psihologiyalıq soqqı alğan balalardıñ qorşağan ortamen, aynalasımen qarım-qatınası özgerui mümkin.

Büginde 24 mıñnan astam adam qauipsiz aymaqqa köşirilgen ortalıqtarda balalar men säbilerge psihologiyalıq kömek körsetken geştal't-terapevt psiholog mamandar oqiğa bolğan aymaqta da emdik jwmıstarın jürgizip jatır.

Qazir arıs qalasındağı äyelder men balalardıñ oqiğadan keyingi psihologiyalıq köñil-küylerin anıqtau, atalğan oqiğa turalı tüsindiru jwmıstarı psihologtardıñ negizgi jwmısına aynalğan.

Sonımen qatar erikti psiholog mamandar el arasında radiaciya, bakteriologiyalıq qaru-jaraq jäne köptegen adamadardıñ qaytıs bolğanı turalı aqparattardıñ jalğan ekenin anıqtap, tüsindirip jür.

Al, bügin Arıstağı 140 mektep balaları Aqmola oblısına qarastı Burabay oquşılar lagerine demalısqa jiberilgen. Sonımen qatar, eki jüz bala Nwr-Swltan qalasına sayahat jasamaq. Olardıñ qaipsizdigi üşin birneşe tälimgerler jwmıldırılğan.

Arıstağı oquşılardı lager'ge jiberudegi maqsat – apattan keyin mektep oquşılarınıñ sanasında jağımsız faktorlardıñ saqtalmauı üşin bolıp otır. Al, bügin balalardıñ ata-anaları Şım-qaladan sät-sapar tilep, şığarıp saldı.

Eske sala keteyik, Arıs qalasında 19 916 bala bilim alatın 40 mektep bar. Al, mektepke deyingi bilim oşaqtarında 5071 bala tärbielenude. Türkistan oblıstıq äkimşiliginiñ mälimetine säykes, büginge deyin Arıs qalasınıñ 570 bala jazğı lager'ge jiberilgen.

Al, aldağı uaqıtta Arıs qalasınıñ 725 ke juıq balaları Qazaqstannıñ basqa da aymaqtarına demalıs pen sayahat jasauğa jiberiledi. Jalpı,jazğı demalıs orındarına tört mıñnan astam bala jiberu josparlansa, aldağı şilde ayında bes jüzge juıq bala jazğı lager'lerde demalatın boladı.

Ayta keteyik, büginde Arıs qalasın qalpına keltiru üşin Memleket tarapınan tiisti jwmıstar atqarılıp jatır. Ükimet basşısı Asqar Maminniñ aytuınşa, Arıs qalasınıñ twrğın üy qwrılımı men infraqwrılımın bir aydıñ işinde qalıpqa keltiredi. Qazir ondağı jeti mıñ jeti jüzden astam baspana tolığımen qalpına keltirilgen.

Al, Arıstıq balalardıñ jazğı demalısın elimizdiñ är aymağı qamtamasız etip otır. Küni keşe Arıstağı apattan zardap şekken jüzden astam bala Jambıl oblısınıñ “Bolaşaq”, “Tausamalı” sauıqtıru keşenderine jiberilgen.

Arıstıq balalardı jazğı demalıspen qamtu basqa öñirlerde de jalğasın tappaq...

Abai.kz

0 pikir