Jwma, 13 Jeltoqsan 2019
Qwyılsın köşiñ 5029 6 pikir 5 Mausım, 2019 sağat 16:00

Qapıda qalma, qandas!

Qwdayğa şükir, bügingi tañda alıs-jaqın şetelderden köşip kelip, Qazaqstan Respublikasınıñ azamattığın alam degen qandastarımız üşin Zañnamalıq twrğıdan eş kedergi joq. Batıl şeşim qabıldap, şiraq qimıldağan azamatqa twraqtı tirkeuge twru, azamattıq alu – tük te qiın emes!

Soñğı onşaqtı jıldıñ köleminde Köşi-qon sayasatınıñ bası-qasında jürgen, «Halıqtıñ köşi-qonı turalı» zañına eleuli özgertuler men tolıqtırular enuine ıqpal etken azamat retinde men osılay dep kesip ayta alamın!

Soğan qaramastan, mıñdağan qandastarımız «Oralman» märtebesiniñ merzimin ötkizip alıp, qattı qinaldı. Onıñ özindik sebepteri de boldı.

Birinşiden, Oralman märtebesin alğan adamdar men olardıñ otbası müşeleri: 1) oralmandardı beyimdeu jäne ıqpaldastıru ortalıqtarında tegin beyimdeu jäne ıqpaldastıru qızmetterin körsetumen; 2) Qazaqstan Respublikasınıñ densaulıq saqtau salasındağı zañnamasına säykes medicinalıq kömekpen; 3) Qazaqstan Respublikasınıñ azamattarımen teñ jağdayda mektepterde jäne mektepke deyingi wyımdarda orındarmen, Qazaqstan Respublikasınıñ Ükimeti ayqındaytın kölemde tehnikalıq jäne käsiptik, orta bilimnen keyingi jäne joğarı bilim beretin oqu wyımdarına oquğa tüsuge bölingen kvotağa säykes bilim alu mümkindigimen; 4) Qazaqstan Respublikasınıñ azamattarımen teñ jağdayda äleumettik qorğalumen; 5) Qazaqstan Respublikasınıñ zañnamasına säykes jwmıspen qamtuğa järdemdesumen qamtamasız etiledi. Osı jeñildikterden paydalanu üşin qandastarımız «Oralman» märtebesin alıp aladı da, arı qaray Qazaqstan Respublikasınıñ azamattığına qwjat ötkizbey, «wzın arqau, keñ twsau» dep, eki jaqqa jaltaqtap jürip uaqıt ötkizip aladı.

Ekinşiden, Qıtay Halıq Respublikasında tuındağan sayasi jağday da öz äserin tigizdi.

Osı mäseleni şeşu üşin, «Halıqtıñ köşi-qonı turalı» Zañ jobası 2017 jılı Mäjiliste talqılanğan kezde şama kelgenşe şığar jol wsınıp, äreket jasadıq. Ökinişke oray, Eñbek jäne halıqtı äleumettik qorğau ministrliginiñ Köşi-qon komiteti basşılarınıñ kesirinen ol wsınıstarımız ötpey qaldı. Ötse de jarım-jartılay qanağattandırıldı. Bwl turalı kezinde ayttıq ta, jazdıq ta...

Mine, uaqıt talabına say, sol tüykilmen qosa, özge de mäselelerdi zañnamalıq twrğıdan tübegeyli şeşu üşin Parlamentte «Halıqtıñ köşi-qonı turalı» zañına tağı da özgertuler men tolıqtırular engizu jwmısı qarastırılğalı jatır.

Biz öz tarapımızdan qajetti wsınıstarımızdı aldın-ala berdik. Ol wsınıstardıñ bir bölimi Zañ jobasına engeni de belgili boldı. Enbegenin Mäjilistegi jwmıs tobınıñ talqısı barısında deputattar arqılı engizuge äreket jasaymız.

Alla qalap, Halıq qalaulıları qoldap, ol wsınıstarımız ötip jatsa, «Halıqtıñ köşi-qonı turalı» Zañı odan arı kemeldenip, köşip keluşilerdiñ qwjattanuı tipti de oñtaylana tüsetinine senimdimin.

Biraq, bwl özgeristi kütpey-aq, qandastarımızdıñ talap-tilegin eskergen Wlt Köşbasşısı Nwrswltan Nazarbaev prezidenttik ökilettigin toqtatudıñ az-aq aldında – 16 naurızda oralmandar märtebesin jeñildetilgen tärtippen 2019 jıldıñ 31 jeltoqsanına deyin bir märte wzartıp beru turalı şeşim qabıldap ketti.

Elbasınıñ bwlay şeşim qabıldauına wsınıs jasağan QR İşki ister ministri, policiya general-leytenantı Erlan Twrğımbaev ekenin wmıtpayıq, ağayın!

Elbasınıñ etnikalıq qazaqtardıñ problemalıq mäselelerin şeşu turalı sol tapsırmasına säykes, elimizdiñ aumağındağı barlıq etnikalıq qazaqtarğa, uaqıtı qay kezde ötkenine qaramastan, oralman märtebesiniñ jaramdılıq merzimin wzartu boyınşa bir rettik akciya jürgizilude.

Sonday-aq, «Oralman» märtebesiniñ merzimi ötip ketuine jäne özge de sebepterge baylanıstı vizasınıñ, tölqwjatınıñ uaqıtı ötip ketken qandastarımızdı «Memlekettik körsetiletin qızmetter standarttarın bekitu turalı» Qazaqstan Respublikası İşki ministriniñ 2015 jılğı 7 säuirdegi №315 bwyrığına säykes, aldımen «Azamattığı joq twlğa» dep tanıp, arı qaray qwjattandıru jwmısı qolğa alınıp jatır.

Sondıqtan, Elbasımızdıñ osınau qamqorlığınıñ ayasında jasalıp jatqan jeñildikten qandastarımız qapı qalmauı kerek. Özderi twrğan orınnıñ Köşi-qon mekemelerinen qwjattarın dwrıstap alğanı jön.

Al, tuındağan mäseleler bolsa, «Nur Otan» partiyası bastağan qoğamdıq wyımdarğa barıp, zañgerler men mediatorlardıñ kömegine jüginse boladı.

Bwl jeñildikten äsirese Täuelsizdik jıldarı Özbekstan Respublikasınan kelip, belgili sebeptermen Qazaqstan azamattığın ala almay jürgen tuısqandar tolıq habar tauıp, jıldıñ soñına deyin qwjattanıp alğanı dwrıs bolar edi.

Sol üşin, qwrmetti tuısqandar, internet äleminiñ  «Facebook», «WhatsApp», «WeChat», «Instagram», «telegram»... jelilerin paydalanıp, osı maqalanı öz toptarıñızğa jappay bölisuleriñizdi ötinem!

Qandastarımız qapıda qalmasın!!!

Auıt Mwqibek

05.06.2019

Nwr-Swltan qalası

Abai.kz

6 pikir