Särsenbi, 13 Qaraşa 2019
Sayasat 4652 0 pikir 5 Mausım, 2019 sağat 15:29

Senatorlar densaulıq saqtau salasınıñ mäselelerin talqıladı

Senat deputattarı Serik Bektwrğanov pen Mwrat Baqtiyarwlı elimizdiñ densaulıq saqtau salasındağı mamandar qorın basqaru, salaaralıq üylestiru men därigerlik jäne farmacevtikalıq bilim beru salasındağı memlekettik basqaru mäseleleri boyınşa densaulıq saqtau ministrliginiñ ökilderimen kezdesti.

Ministrliktiñ ğılım jäne adam resurstarı departamentiniñ direktorı Säule Sıdıqova salanıñ ahualı turalı senatorlardı habardar etti. Departament direktorı aytqan statistikalıq derekterge säykes, respublikada 248 mıñnan astam däriger qızmetkerler, onıñ işinde densaulıq saqtau jüyesinde 205 712 däriger jwmıs isteydi. 10 mıñ halıqqa şaqqanda därigerler sanı (Qazaqstanda – 39,6, EIDW elderinde – 33) jäne orta sanattağı medicina qızmetkerleri (Qazaqstanda – 95,5, EIDW elderinde – 91) bolıp otır. Därigerlik mekemeler mamandarmen twraqtı türde äri qanağattanarlıq deñgeyde qamtamasız etilip keledi.

Bwl rette, qalalıq jäne auıldıq jerlerdi däriger mamandarmen qamtamasız etude ayırmaşılıq saqtaluda (qalada – 10 mıñ twrğınğa 56,8, auıldıq jerlerde – 10 mıñ twrğınğa 16,1 mamannan keledi).

Bügingi küni jwmısqa alınbağan ştattıq orındar boyınşa 2481,75 däriger tapşı bolıp otır.

Departament basşısı medicinalıq bilim berudi jañğırtu ayasında därigerlik universitetterdi damıtudıñ 5 jılğa arnalğan strategiyalıq josparları jasalğanın, onda oqıtu bağdarlamaların özgertu jäne strategiyalıq seriktester – şeteldik joğarı oqu orındarımen birlesken bilim beru bağdarlamasın engizu, medicinalıq joğarı oqu orındarınıñ akademiyalıq jäne basqaru derbestigin keñeytu, universitettik klinikalardı qwru, professorlıq-oqıtuşılıq qwramnıñ äleuetin arttıru közdelgenin atap ötti.

Ol bilim beru üderisterine rezidentura twjırımdaması, emdeudiñ erte baylanıstarı, klinikalıq dağdılardı qauipsiz ortada oqıtu, kommunikativtik dağdılarğa üyretu, bilim berude ğılımi közqarastı damıtu, oqıtudıñ integraciyalanğan türleri, medicinadağı däleldi negizder, bilim beru wyımdarındağı menedjment engizilgenin, bilim beru bağdarlamaların jetildiru men professorlıq-oqıtuşılar qwramınıñ äleuetin arttıruğa basa nazar audarılğanın habarladı.

«Sonımen birge, birqatar mäseleler şeşimin tappay otır. Qazaqstanda  birıñğay ülgi qalıptasqan, degenmen Bolon procesiniñ talaptarına, halıqaralıq täjiribege tolıq säykes kele qoyğan joq.

Bügingi tañda Qazaqstan Respublikası Densaulıq saqtau ministrligi elimizdiñ densaulıq saqtau jüyesinde adami kapitaldı damıtudıñ 2025 jılğa deyingi twjırımdamalıq ädisterdi bekitti, ol densaulıq saqtau jüyesinde kadr sayasatın jetildirudi jäne densaulıq saqtau qızmetkerlerin dayarlaudıñ jäne üzdiksiz käsibi damıtudıñ jaña sapasın qamtamasız etudi közdeydi.

Densaulıq saqtau jüyesinde kadr sayasatın jetildiru jönindegi mindetterdi iske asıru ayasında salalıq biliktilik jüyesi jetildiriledi, densaulıq saqtaudıñ kadrlıq resurstarın basqaru tetikteri jañğırtıladı, densaulıq saqtaudıñ kadrlıq resurstarın taldau, boljau jäne monitoring jürgizu ädisteri jetildirilip, medicina qızmetkerleriniñ tartımdı beynesi qalıptasadı, käsibiniñ bedeli arta tüsetin boladı. Mamandardı sapalı dayarlau men densaulıq saqtau jüyesi qızmetkerleriniñ käsibi türdegi üzilissiz dayarlığın qamtamasız etu jönindegi mindetter osı sala mamandarın dayarlau talaptarına say halıqaralıq standarttarın engizudi, medicinalıq bilimdi, ğılım men is jüzindegi emdik şaralardı integraciyalaudı közdeydi», - dep atap ötti S.Sıdıqova.

Şarağa Nwr-Swltan, Almatı, Qarağandı jäne Semey medicinalıq universitetteriniñ rektorları da qatısıp, deputattardıñ swraqtarına jauap berdi. Deputattar oqu ornın bitirgen tülekterdiñ jiberilgen jerdegi qızmetin atqaruı mäselesin, tülekterdiñ jalpılama emdeytin däriger sekildi jwmıs istey almaytının swradı, sonday-aq därigerlik kolledjderde meyirbikelerdi dayarlau sapasın qayta qarau mäselesi de köterildi.  Sındarlı ünqatısu men pikir almasu boldı.

Senator Mwrat Baqtiyarwlı şaranı qorıtındılay kelip Parlament pen barlıq müddeli organdardıñ birlesken jwmısın odan äri jalğastıru mañızdı dep sanaytının jetkizdi.

Abai.kz

0 pikir