Beysenbi, 12 Jeltoqsan 2019
Kübirtke 6761 11 pikir 5 Mausım, 2019 sağat 12:49

Abzal Qwspan: "Säulege jala japqan adamdardıñ özderi zardap şegedi"

Keşe jurnalist, qoğam belsendisi Säule Äbildahanqızınıñ üstinen birneşe kelinşektiñ arız jazğanı turalı aqparat şıqtı. Yvision saytınıñ mälimetine säykes, Säule Äbildahanqızı köpbalalı analardan 2 million teñge köleminde aqşa alğan.

Sonday-aq, analardıñ biri "2019-jıldıñ 31-mamır küni Temiryazov pen Jorokov köşeleriniñ qiılısında ornalasqan Twrğın üy basqarması mañında Säule meni mitingke şığuğa ügittedi. Eger mitingke şıqsañ sağan üy mäselesin şeşip beremin dep ayttı" dep şağım tüsirgen. Äzirge arızdanuşılardıñ arasında Wljalğas Satqınbekova degen kelinşektiñ ğana esimi belgili bolıp otır.

Biz bwl jağdayğa qatıstı Säule Äbildahanqızı men onıñ advokatı Abzal Qwspan mırzanıñ pikirin bilgen edik.

Säule Äbildahanqızı, jurnalist: “Bwl küştik qwrılımdardıñ qoldan wyımdastırıp otırğan jalası”

- Bwl tap-taza jala. Bwl küştik qwrılımdardıñ mağan qarsı qoldan wyımdastırıp otırğan düniesi. Jäne de analardıñ sağın sındıru üşin bar oylap tapqan täsilderi. Onıñ üstine men “Qosanovtı qoldayıq”, “Azamatttıq qoğam qwrayıq” dep halıqqa köbirek ündeu jasap jürmin ğoy. Meniñ sonday poziciyam arqılı halıq oyanıp ketpesin, osı halıqtı türtip, oyatıp jür, osı bireudiñ auzın jabayıq degen-au şaması. YAğni, bwl qoldan wyımdastırıp, jasap otırğan qitwrqı  äreket.

Wljalğas Satqınbekova degen adamdı ömirimde körgen emespin,  tanımaytın, bilmeytin adam. Ol da policeylerdiñ ädeyi wyımdastırıp otırğan öz adamı dep esepteymin.

Men eşqaşan bireuden bir tiın alğan emespin. Jağdayı tömen 5 ananı tikeley efirge şığarıp, “Bwl analardıñ kartoçkaları joq eken. Osılarğa kömektesemin degenderiñ meniñ kartama aqşa audaruğa boladı” dedim. Biraq, ol kisilerge audarılğan aqşa kartoçkada twr. Qanşa tüskeni de, men kimge qanşa artığımen kömekteskenim de twr. Sondıqtan, ol tüsken aqşanıñ ärbir tiını üşin esep bere alamın. Al, basqa eşqaşan eşkimnen özim üşin bir tiın alğan joqpın. Almaymın da. Men eki balamen jalğız, jesir qalıp, bir üzim nan, jeytin tamaq tappay  otırğan kezde de eşkimge alaqan jayğan emespin. Ol meniñ azamattıq ar-ojdanıma, ömirlik principterime, qağidalarıma jat närse.

Al, meniñ analardı aşıq mitingke şaqırğanımdı däleldesin. Ol da ötirik, jala.

Abzal Qwspan, zañger: “Men Säuleni jalanıñ qwrbanı qılıp qarap otıra almaymın”.

- Bwl barıp twrğan - provakaciya. Biliktiñ qoldan wyımdastırıp otırğan şarası. Ökinişke qaray, bizdiñ qwqıq qorğau organdarı mwnday ispen öte jii aynalısadı. Osınday qoldan wyımdastırılğan is-şaralardı toqtatpaytın bolsaq, biz eşqaşan el bolmaymız. Mwnı talay jerde aytqanmın.

Säuleniñ aytıp jürgen sın-pikirleriniñ barlığı damığan, örkenietti elderde qalıptı jağday. Eşkim bwl memleketke riza boluğa mindetti emes. Bwl sın-pikirge baylanıstı tek, Qazaqstan siyaqtı damımay qalğan meşeu elderde bolatın reakciya.

Säule qanday zañsız iske bardı? Iä, qoğamda osınday zañsızdıqtar jalğasa beretin bolsa, mitingke şığamın dedi. Biraq, eşkimdi mitingke şaqırğan joq. Soğan bola adamdardan arız jinap alıp wyımdastırudıñ tük te qiındığı joq. Onıñ çatında 70 mıñnan astam ana otırdı. 70 mıñnıñ işinen 7 adam tauıp, ötirik arız wyımdastıru olar üşin tük emes. Bizdiñ adamdar ökinişke qaray, osınday ötirikterge jii baradı. Biz jala jabuğa bolmaytının tüsinbey kele jatırmız. Biraq, aynalıp kelgende sol adamdardıñ özderi zardap şegedi. Erteñ sol arız jazğandardıñ özderiniñ balaları solay isti boladı. Sondıqtan, biz bireudiñ obalına qaluğa bolmaytının tüsinuge tiispiz.

Bizde kez-kelgen adamğa jala japqızıp, halıqtıñ aldında bedeli men tanımaldığı artıp bara jatqan adamdarğa osınday las äreketter qoldanadı. Mwnı policiya da, qwqıq qorğau organdarı da jaqsı biledi.

Men özim Jañaözen sotına qatısqan kezimde, mağan qayta-qayta policiya tarapınan eskertu jasalğan. 74 jäbirlenuşini jalğız özim qorğap jatqanda “kelmey-aq qoy” degen sms-ter, telefonmen habarlar tüsken. Sol kezde bir äyel meniñ üstimnen “Abzal Qwspanov  meni zorlağısı keldi” dep arız jazğan. Meni sol üşin advokat basımmen sottap jibere jazdağan. Sondıqtan talay adamdı qorğap jürgen advokat retinde mwnday jağdaylar mağan jaqsı tanıs. Jäne, Säuleniñ qanday adam ekenin de jaqsı bilemin. Sondıqtan, mwnıñ 100 payız jala ekenin tolıq senimmen ayta alamın!

Men qazir Astanada bir ülken istiñ ayasınan şığa almay jatırmın. Biraq, Säulemen baylanıstamın. Baylanısta bola beremin. Mindetti türde bwl iske aralasamın!

Men Säuleni jalanıñ qwrbanı qılıp qarap otıra almaymın!

Biz atalğan jağdayğa baylanıstı Almatı qalalıq İşki İster Departamentine birneşe ret habarlasqan edik. Alayda, olarmen baylanısu mümkin bolmadı. Aldağı uaqıtta bwl iske qatıstı İİD niñ de resmi jauabın jariyalaytın bolamız.

Nwrbike Bekswltanqızı

Abai.kz

 

11 pikir