Senbi, 14 Jeltoqsan 2019
Kübirtke 4326 29 pikir 16 Mamır, 2019 sağat 10:27

Ermekbaev şeyit ketken atalarğa şirkeude dwğa jasatpaq pa?

QR Qorğanıs Ministrligi Resey Qarulı Küşteriniñ negizgi şirkeuiniñ qwrılısına qarjı böldi. Bwl turalı seysenbi küni Qorğanıs ministriniñ orınbasarı general - leytenant Müsilim Altınbaev mälimdedi.

2019 jıldıñ säuir ayında Qazaqstan Reseyge ekinşi düniejüzilik soğısqa qatısqan qazaqstandıqtar turalı aqparat jibergen. Altınbaev mırzanıñ aytuınşa, sol qazaqstandıqtardıñ esimi älgi Reseydiñ bas äskeri ğibadathanasında saqtalatın körinedi. Alayda, Altınbaev Resey şirkeuine qanşa qarajat bölgenin naqtı aytpadı.

BAQ mälimetinşe, Resey armiyasınıñ negizgi şirkeui RF-dağı eñ iri dini ğimarattardıñ biri bolmaq. Onı Mäskeudiñ mañındağı Kubinka qalasında salu josparlanğan. Ğibadathana 2020 jılı “Jeñistiñ 75 jıldığına oray” aşıladı. Söytip, özindegi eski-qwsqı äskeri bazanı jabdıqtay almay otırğan Qorğanıs ministrligi Reseydiñ äskeri şirkeuine atımtaylıq körsetti.

Birinşiden, soğısqa qatısqan qazaq jauıngerleriniñ esimi Resey şirkeuinde mäñgilikke saqtaladı degen qanşalıqtı abıroylı is. Sebebi, ekinşi düniejüzilik soğıstıñ şındığı äli künge beymälim. Jäne, Putin sol soğıs turalı mwrağattı 2040 jılğa deyin qwpiya wstaudı bwyırdı. Al, oğan deyin qanşama qwndı mälimetterdiñ joyılıp jatqanı belgisiz. Esesine, äli künge  “Wlı Jeñis”, “Wlı Otan Soğısı” degen jalañ wrandarmen sol qırğındı öziniñ ideologiyasına paydalanıp otır.

Ekinşiden, qazaq älimsaqtan mwsılman halıq. Keñester Odağı qanşa qırğın salıp, tilin twralatıp, dinine şekteu qoysa da, şoqınıp ketken joq. Jäne, sol soğısta şeyit ketken ataları üşin bügingi wrpağı şirkeuge emes, meşitke barıp dwğa jasaydı. Mwnı bir kezderi Din isterine jauaptı bolğan bügingi Qorğanıs Ministri Ermekbaev nege eskermeydi?

Üşinşiden, Resey zımırandarınıñ ziyanı turalı osı uaqıtqa deyin jüzdegen maqala jazdıq. (Onıñ bärin ayğaylatpay birneşe silteme ğana bereyik. Qarañız! Narazılıq: «Bayqoñır» ğarış aylağın jalğa beru mäselesi qayta qaralıp, Resey poligondarı jabılsın! RESEY PREZIDENTİ PUTINGE HAT, Şäriphan Qaysar. Resey «Bayqoñır» turasında küñk etti, Resey Bayqoñırdan birjola ketpeydi, Ermek Qarabala. Zımırandardıñ aynalasındağı zımiyan sayasat). Osı maqalalarda aytılğanday Resey Bayqoñırdı jalğa aladı, biraq kelisilgen qarjını bölip-jırıp tölegisi kelmeydi. Bayqoñırdı jalğa bergen aqşamızdı ala almay otırıp, olarğa qarjılay kömek bergenimiz qanşalıqtı qisındı?

Törtinşiden, Resey 10 mln. ga juıq qazaq jerin sınaq alañına aynaldırğan. Ol üşin töleuge tiis 27 mln.dollar  da qwmğa siñgen ayranday joq boldı. Al, jerimizge 32  märte qwlağan «Proton» zımıranınıñ öteui ne bolğanı belgisiz. Onı swrağan eşkim joq. Kerisinşe, sol körşimizdiñ köñili tınış bolsın dep 2016 jılı Qostanay oblısı men Aqtöbe oblısınan zımıran qaldıqtarın qwlatuğa 63 mıñ gektar jer beruge tağı kelistik. Tipti, qazaq ğarışkeri Aydın Ayımbetovtıñ  Bayqoñırdan wşqanı üşin Reseyge 20 milliard aqşa da töledik. Bwl Qwdayı körşimizge azdıq etip otır ma?

Besinşiden, Qazaqstan biligi dağdarısqa baylanıstı 2018-2020 jıldarğa arnalğan respublikalıq byudjetti qısqartuğa mäjbür boldı.Öytkeni, elimizdegi byudjet tabısı 12 payız tömendegen. Soğan qaramastan, Qorğanıs ministrliginiñ kirisi şamamen 25 payız ösipti. Endi, Ermekbaev sol “artıq aqşanı” öz jırtığımızdı jamamay Reseydegi şirkeudiñ qwrılısına jwmsap, sauap almaq pa?

Al, şın mäninde elimizdegi äskeri-tehnika men qorğanıstıñ qauqarı qanday?

Bizdegi bazanıñ basım köpşiligi eski. Satıp alğanı sapasız. Nätijesinde, jıl sayın äskeri wşaq qwlaydı. Mäselen, 2012 jılı 25 jeltoqsanda, qazirgi Türkistan oblısınıñ Sayram audanında Astana - Şımkent bağıtındağı  An-72 äskeri wşağı apatqa wşıradı. Onıñ bortında 20 äskeri adam bolsa, jeteui ekipaj müşeleri. Apattan QR WQK Şekara qızmetiniñ jetekşileri tügelge juıq qaza taptı.

Sodan bastaldı, bizde wşaq qwlau ädetke aynaldı. Aydıñ-künniñ amanında qanşama äskeri soğıssız şeyit ketti?  Ermekbaev osınday şetin oqiğalardı boldırmaudıñ qamına kirisudiñ ornına şirkeuge qol wşın sozıp jatqanı qalay?

Ermekbaev Qorğanıs Ministrligine 2018 jıldıñ 7-tamızında tağayındaldı. Alayda, ol kelgennen Qorğanıs salasında tıñ serpin bayqalmadı. Kerisinşe, tağı da sol eski tehnikanıñ kesirinen bolatın apat qaytalandı. Nätijesinde 13 azamat qaza taptı. Aytpaqşı, Qorğanıs Ministrligine kirisken soñ, qazaqtıñ 120 sarbazın Tayau Şığısqa attandı.

Tüyin

Qoş! Eki jıl bwrın Din isterine jauaptı bolğan ministr Ermekbaev endi Reseydegi äskeri şirkeuge qarjı bölip, Putinniñ därgeyine jaqpaq. Al, ol Putin säuir ayında ğana Qazaqstanğa AES salu turalı wsınıs ayttı. Tipti ol üşin Almatı oblısınan jer de tañdap qoyılğanı anıq boldı. Qoğam jappay qarsılıq tanıtqanına qaramastan, Putinniñ wsınısı äli küşinde twr. Ermekbaev sol AES isten şıqsa, opat boluı mümkin azamattardıñ esimin de älgi şirkeuge altın ärippen ärlep jazu qajet ekenin Resey biligine bekitip alsa bolğanı... Basqa aytarımız joq!

Nwrbike Bekswltanqızı

Abai.kz

29 pikir