Jwma, 13 Jeltoqsan 2019
Sañlaq 4315 8 pikir 11 Naurız, 2019 sağat 12:13

Maminniñ hokkeyine bir mausımda 3 653 490 000 teñge jwmsaymız

Qwrlıqtıq hokkey ligası (QHL) — 2008 jılı qwrılğan Euraziyadağı halıqaralıq aşıq hokkey çempionatı. 2009 jıldan bastap Europadağı eñ üzdik liga sanaladı. 2018/19 jılğı mausımğa jeti elden 25 komanda qatıstı. Bizdiñ eldiñ atınan elordalıq «Barıs» hokkey klubı öner körsetude.

Şaybalı hokkey qazaq qoğamına säl tañsıq sport. Biraq soltüstiktegi körşimiz asa süyip aynalısatın sport türi bolğandıqtan, solardıñ äserimen biz de bwl saladan bäsire alsaq dep ümittenip jürmiz. Öz wltımızdan, öz elimizden mıqtı oyınşı şıqpağan soñ, öz elinde asa qwrmetke bölene almağan şeteldik oyınşılarğa jappay azamattıq berdik. Sol sansız legionerlerdiñ arqasında wlttıq qwramamız ben astanalıq «Barıs» halıqaralıq turnirlerde täp-täuir nätije körsetip jür. Biraq, arasında öz wldarı bolmağan soñ bäri-bir qazaq qauımınıñ mahabbatına bölene alğan joq bwl sport.

Qwrlıqtıq hokkey ligasınıñ erejesine say, biıl qazaqstandıq klubqa legioner sanı jağınan şekteu bolğan joq. Qwramın tek legionerlermen jasaqtasa da öz erki. Al reseylik klubtar oyın hattamasına tek bes şeteldik hokkeyşini ğana tirkey aladı. Bwl öz oyınşılarınıñ deñgeyin köteru üşin jasalıp otırğanı sözsiz. Al «Barısqa» bwnday şekteu joq. Osınday ala qoydı böle qırıqqan erejeniñ äserinen biıl «Barıs» sapında 8 legioner jäne bizdiñ eldiñ azamattığın alğan Resey, Kanada, AQŞ jäne Şveciya elderiniñ 11 oyınşısı öner körsetti.

Qazaq jwrtşılığı boks pen kürestey wnatpasa da hokkeyge bölinetin qarjı şaş-etekten. Jaqında reseylik «Çempionat» portalında QHL klubtarınıñ 2018/19 jılğı mausımğa arnalğan byudjeti (kelisimşattar + bonus) jariyalandı. Biz el biletin futboldağı qırauar qarjığa narazılıq tanıtıp jürgende, el bilmeytin hokkey sportı da eşkimge bildirmey milliardtardı jwtıp jatır eken.

«Barıs» hokkey klubınıñ soñğı eki mausımdağı byudjeti mınaday: 

Ötken mausımda: 3 450 840 000 teñge;

2018/19 jılğı mausımda: 3 653 490 000 teñge.

Qazaqstan şaybalı hokkey federaciyasınıñ prezidenti Asqar Mamin. Bir qızığı, mamandar Asqar Wzaqbaywlı Ükimet basşısı bolğalı hokkey köptegen basılımnıñ süyikti sportına aynalğanın aytuda. Bwğan deyin «Barıstıñ» oyındarına asa män bermeytin otandıq basılımdar soñğı kezderi töbege kötere bastadı. Mäselen, keşe Gagarin kubogınıñ alğaşqı kezeñinde jeñiske jetken «Barıs» birqanşa respublikalıq iri basılımnıñ bas taqırıbına şıqtı. Söz soñında "janı qalmay jalpı maqtap jatqan" sol jeñis jaylı jaza keteyik.

22 aqpanda Qwrlıqtıq hokkey ligasınıñ twraqtı çempionatı märesine jetti. Qwramında qaptağan şeteldik sportşılar öner körsetetin «Barıs» Şığıs konferenciyasında ekinşi orın ielenip, Pley-off kezeñine joldama aldı.

Gagarin kubogı dep atalatın bwl kezeñde jalpı 16 komanda öner körsetedi. Şığıs, Batıs konferenciyasınıñ ärqaysısınan segizden. Eki konferenciyanıñ ökili tek finalda ğana jolığadı.

Sonımen Şığıs topta ekinşi orın alğan elordalıq klubtıñ alğaşqı qarsılası jetinşi orın alğan Nijniy Novgorod qalasınıñ «Torpedo» komandası boldı.

Seriyadağı biriniş jäne ekinşi matç 26 jäne 28 aqpan Astanada ötti. Eki oyında da qarsılasınan basım tüsken qazaqstandıq komanda 2:0 esebimen alğa şıqqan, Alayda, 2 jäne 4 naurız künderi Nijniy Novgorodta ötken qos kezdesu jalpı esepti 2:2-ge jetkizdi.

Turnir jarğısına say komandalar 6 naurız küni Astanada qayta jolıqtı. Bwl joldı da jergilikti komanda basım bolıp, esepte qayta alğa şıqqanımen, 8 naurız Reseyde ötken altınşı matç esepti qayta teñestirdi - 3:3. Söytip, jeñimpazdı anıqtau üşin şeşuşi, jetinşi matç ötkizuge tura keldi. Bwl jwpta "elengen" (QHL-da joğarı orın alğan) «Barıs» şeşuşi oyındı öz alañında qabıldadı. Keşe, 10 naurızda Astanadağı "Barıs Arenada" ötken kezdesude 3:2 esebimen aydın ieleri jeñiske jetti.

Osılayşa, jeti oyınnıñ qorıtındısı boyınşa 4:3 esebimen jeñiske jetken «Barıs» Gagarin kubogınıñ şirek finalına şıqtı. Kelesi qarsılası - Ombınıñ «Avangard» komandası. «Avangard» 1/8 finalda Qazan qalasınıñ «Aq Bars» komandasın jeñgen, endi 1/4 finalda qazaqstandıq naq «Barısqa» jolığıp otır.

«Avangard» QHL twraqtı çempionatında törtinşi orın alğandıqtan, bwl jwpta da säl basımdılıq «Barıs» jağında. Demek, seriyadağı alğaşqı eki matç jäne joğardağıday jeñimpazdı anıqtaytın jetinşi kezdesdi öz alañında qabıldaydı. Bwl kezeñdegi negizgi oyındar 14, 16, 18, 20 naurız künderi, eger qajet bolğan jağdayda qosımşa oyındar 22, 24 jäne 26 naurızda ötedi.

Jartılay final:

«Şığıs» konferenciyası: 29, 31 naurız, 2, 4 säuir künderi, eger qajet bolsa qosımşa oyındar 6, 8 jäne 10 säuirde ötedi.

Gagarin kubogınıñ finalı: 13, 15, 17, 19 säuir künderi, eger qajet bolğan jağdayda qosımşa matçtar 21, 23 jäne 25 säuir künderi ötedi.

Quanış Qappas

Abai.kz

8 pikir