Särsenbi, 20 Qaraşa 2019
Qwyılsın köşiñ 3443 29 pikir 20 Aqpan, 2019 sağat 09:53

Baylar tabısınıñ 1%-ın ay sayın «Otandastar» qorına audarıp otıruı kerek

QR «Atameken»

WKP-nıñ basqarma törağası

A.I. Mırzahmetovke

Qwrmetti Abılay Isabekwlı!

Sizdi eluge tolğan mereyli jasıñızben şın jürekten qwttıqtaymın jäne Sizben bir jılda tuğan töl ekenimdi aytıp, aynalama ılği maqtanıp jürem!

Men Täuelsizdiktiñ jemisi, Wlt Köşbasşısı Nwrswltan Nazarbaevtıñ eñbegi degende, dau joq, birinşi sözdi Elbasınıñ köşi-qon sayasatın jolğa qoyğan sätinen, Qazaq köşinen  bastau kerek dep esepteymin! Jay dastarhan basınan bastap, merekelik şaralarda, memlekttiñ tarihi şeşim qabıldaytın jinalıstarında, partiyalardıñ kezekti s'eziderinde, halıqaralıq tüs alğan basqosularda, tipti Birikken wlttar wyımınıñ minberinde de birinşi sözdi Wlt Köşbasşısı Nwrswltan Nazarbaevtıñ şettegi qazaqtı Atajwrtqa şaqırıp qonıstandırğan eñbeginen bastau kerek! Jäne ol söz sonıñ barısın basınan keşirgen, igiligin körgen bizdiñ – şetten oralğan qandastarımızdıñ auzımen ülken, biik minbelerden ünemi aytılıp twrğanı dwrıs!

Sebebi, Köşi-qon – Wlt Köşbasşısı Nwrswltan Nazarbaevtıñ EL täuelsizdigin jaryalaudan bwrın jolğa qoyğan TWÑĞIŞ häm WLI sayasatı! Nwrswltan Äbişwlınıñ kemeñger twlğa, köregen basşı ekenin törtkül düniege birden tanıtqan da – osı alısta jürgen ağayındı Atajwrtqa şaqıru turalı şığarğan BATIL äri TARIHI şeşimi bolatın!

Wlt Köşbasşısı Nwrswltan Nazarbaev Qazaqstan Täuelsizdigin jariyalaudan bir ayğa juıq bwrın, naqtılap aytsaq, 1991 jılğı 18 qaraşada Qazaq KSR Ministrler Keñesine «Basqa respublikalardan jäne şetelderden selolıq jerlerde jwmıs isteuge tilek bildiruşi bayırğı wlt adamdarın Qazaq KSR-inde qonıstandıru tärtibi men şarttarı turalı» arnayı №711 Qaulı şığartqan bolatın.

Qaulı şığartıp qana qoymay, El Täuelsizdigin jariyalay salıp, on bes künnen keyin, yağni 1991 jılı 31 jeltoqsanda Nwrswltan Äbişwlı Twñğış Prezident salauatımen Qazaq Radiosınıñ efirinen Özi söz alıp, «Qımbattı otandastar! Ejelgi atamekeninen jıraqtap qalğan sizderdi keşegi künge deyin ata-baba jerine qaytıp kele alamız ba degen swraqtıñ alañdatıp kelgenin men jaqsı bilemin. «Tuğan jerdiñ tütini de ıstıq» deydi halqımız. Qandas bauırlarımızdı bayırğı ataqonısına tartu maqsatında adam pravosı turalı elaralıq erejelerdi basşılıqqa ala otırıp, Qazaqstan Ükimeti «Basqa respublikalardan jäne şetelderden selolıq jerlerde jwmıs isteuge tilek bildiruşi bayırğı wlt adamdarın Qazaqstanda qonıstandıru tärtibi men şarttarı turalı» arnayı qaulı qabıldadı. Sondıqtan atamekenge kelemin deuşi ağayındarğa jol aşıq. Ata-baba äruağı aldarıñızdan jarılqasın!» - dep, «Alısta jürgen ağayındarğa aq tilek» attı tarihi Joldauın jariyaladı.

1992 jılı 28 qırküyek pen 4 qazan aralığında Almatı qalasında dünie jüzi qazaqtarı ökilderiniñ qatısuımen twñğış qwrıltay ötip,  Düniejüzi qazaqtarınıñ qauımdastığı qwrıldı. Oğan Nwrswltan Nazarbaev bir auızdan saylandı. Atalğan qwrıltay qazirge deyin bes märte şaqırılıp, qazaq köşine tıñ serpin berdi.

1997 jıldıñ 13 jeltoqsanında twñğış ret qazaq tilinde «Halıqtıñ köşi-qonı turalı» zañı qabıldanıp, oğan QR Prezidenti Nwrswltan Äbişwlı Nazarbaev qol qoydı. Atalğan Zañğa qazirge deyin bes märte özgertuler men tolıqtırular engizildi. Biıl Parlamentte tağı da qayta qarauğa dayındıq jwmıstarı jürilude.

Onıñ sırtında, «Tehnikalıq jäne käsiptik, orta bilimnen keyingi jäne joğarı bilimniñ bilim beru bağdarlamaların iske asıratın bilim beru wyımdarına oquğa tüsu kezinde qabıldau kvotasınıñ mölşerin bekitu turalı» Qazaqstan Respublikası Ükimetiniñ 2012 jılğı 28 aqpandağı №264 Qaulısımen Qazaqstan Respublikasınıñ azamattarı bolıp tabılmaytın wltı qazaq adamdar üşin – 4 payız jeñildik qarastırıldı.

Prezident tapsırmasına say, 2016 jılğı 18 aqpandağı №83 Ükimet qaulısımen «Oralmandar» men qonıs audaruşılardı qonıstandıru üşin jeti obılıs arnayı belgilendi; Sonday-aq, tağı da Ükimet 2018 jılğı 18 mamırda №280 qaulı qabıldap, «Şeteldegi etnikalıq qazaqtardı qoldau jönindegi 2018 - 2022 jıldarğa arnalğan is-şaralar josparın» bekitip berdi...

Mine, Wlt Köşbasşısınıñ osı qamqorlığınıñ arqasında Elimizge alıs-jaqın şetelderden bir jarım millionday qandasımız oraldı. Qazir olardıñ sanı ösimimen eki milionğa juıqtadı.

Äli de bes millionnıñ üstindegi qandasımızdıñ Otanına orala almay otırğanın oylasaq, köşi-qon sayasatınıñ, ol sayasattı jürgizip otırğan atqaruşı biliktiñ köterer jügi tım auır ekenin mölşerleu onşa qiın emes.

Onıñ üstine, etnikalıq qazaqtardıñ mol şoğırı qonıstanğan şığıstağı körşimizde jürip jatqan sayasi qısımdı eskersek, bwl bağıttağı jwmıstıñ tipten kürdeli ekenine köz jetkizemiz.

Wlt Köşbaşısı jolğa qoyğan osınau Wlı sayasattı jüzege asıru üşin, ärine, qomaqtı qarjı kerek!

Qwdayğa şükir, «Toqırau jıldarı» degen atpen tarihqa qalğan sonau toqsanınşı jıldardıñ özinde memleket köşi-qon sayasatınan qarjı ayağan emes. Soñğı jıldarı älemdi jaylağan ekonomikalıq dağdarıstıñ salqını bizdiñ elimizdi de aynalıp ötpegeni belgili. Soğan baylanıstı bolu kerek, qazirgi tañda Ükimet tek «Oralmandar» men qonıs audaruşılardı qonıstandıru üşin Ükimet ayqındağan jeti obılısqa qonıstanğan ağayındarğa ğana bir jolğı järdemaqı men bir jılğa deyin päter jaldap twru qarajatın berumen şektelip qaldı.

Esesine, Prezident bizdiñ ötinişimizdi jerge tastamay, 2017 jılı Astanada aşılğan Düniejüzi qazaqtarınıñ besinşi qwrıltayında Ükimetke «Otandastar qorın» qwru turalı tapsırma berdi.

Qarap otırsaq, älemde wlttıq qor aşqan, sol qorğa süyenip memleket qwrğan wlttar bar eken. Sonıñ bir mısalı – evrey. Evreylerdiñ «Köşi-qon» qorınıñ irgetası 1846 jılı qalanğan. Twñğış tüyindemesin jasağan kisi "özimizdiñ" kädimgi Karl Marks. Qor qwrılğan twsta Izrail'de nebarı 10 mıñ 29 adam ğana bolıptı. Izrail' memleketi qwrılğan küni (1848 jıl, 14 mamır) olardıñ sanı osı wlttıq Qordıñ jebeuimen bir-aq künde 600 mıñ adamğa tolıqqan. Qısqası, evreyler qor arqılı memleket qwrdı. Dünieniñ tükpir-tükpirinde jürgen etnikalıq evreylerdiñ bayları men orta taptarı öz tabıstarınan sol Wlttıq qorlarına aqşa qwyıp otıradı. Şetelde qonıs tepken ärbir evrey wrpağınıñ ömirinde bir ret sol qordıñ esebinen tarihi otanı Izrail'ge barıp, sayahattap qaytuğa qwqığı bar.

«Qor» dep, mine, osını ayt!

Qwdayğa täube, Elbası tapsırmasına say, mine, QR Ükimetiniñ 2017 jılğı 13 qazandağı №644 Qaulısımen bizdiñ de «Otandastar qorı» kommerciyalıq emes akcionerlik qoğamımız qwrılıp, öz jwmısın bastadı. Oğan prezident bolıp, körnekti qoğam jäne memleket qayratkeri Nwrtay Äbiqaev ağamız tağayındalıp, aynalasına tebindi jas jigitterdi jiıp jatır.

Qwrmetti Abılay Isabekwlı!

 Esiñizde bolsa, Wlt Köşbasşısı Nwrswltan Nazarbaev sol Düniejüzi qazaqtarınıñ besinşi qwrıltayında Ükimetke «Otandastar qorın» qwru turalı tapsırma berip jatıp, «ŞETTEGİ JÄNE ELGE KÖŞİP KELETİN AĞAYINDI QOLDAU ÜŞİN «OTANDASTAR» QORIN QWRAMIZ. QAZAQ BIZNESMENDERİN OSI QORĞA ÖZ ÜLESTERİN QOSUĞA ŞAQIRAMIN!» - degen bolatın.

Ökinişke oray, sodan beri de eki jıldıñ jüzi boldı, Wlt Köşbasşısı aytqan «QAZAQ BIZNESMENDERİ» jım-jırt!

Tırp etken qimıl bayqalmaydı!

Ünsiz jatır!

Nege?!

Dau joq, Täuelsizdiktiñ, Wlt Köşbasşısınıñ dana sayasatınıñ arqasında eldegi kapitaldıñ edäuir böligin iemdengen äleumettik top –   QAZAQ BURJUAZIYASI bayağıda qalıptastı. Oğan kuä – «Forbes» jurnalı jariyalap twratın Bolat Ötemwratov, Vladimir Kim, Timur men Dinara Kwlıbaevtar jäne Alidjan Ibragimov qatarlı eñ bay qazaqstandıqtardıñ tizimi.

Qazaq bayları qazirgi tañda ata-babasına as beru, at şaptıru, kümbez ornatudan arığa ozbay keledi. Eger, «Ruhani jañğırudıñ» talabı osı desek, qatelesemiz. Elbası aytqan «Üşinşi industriyalıq revolyuciyağa» ilesip, qazaq sanasında da töñkeris jasauımız qajet!

Qayırımdılıqtıñ wlttıq deñgeydegi mısalın körsetu üşin arığa barmay-aq, Alaş Orda däuirine köz jügirtsek jetkilikti.

Ötken ğasırdıñ basında Maqswt täyji Sasanwlı, Molda Nwrbekwlı, Qwsbolat Baybolatwlı, Jayırbek Sasanwlı, Raqım Aqılbekwlı, Jienäli Meyirmanwlı qatarlı qazaqtıñ altı bayı ««Qazaq» basqarmasınıñ baspahana turalı jazğan sözine işimiz erip, Qıtay qol astındağı Künes eliniñ qazaqtarı «Azamat» seriktigine 600 som jiberdik» - dep, hat jazıp, Alaş kösemderine aqşa jöneltken. Bwl turalı «Qazaq» gazetiniñ 1916 jılğı 17 martta şıqqan №222 sanında arnaulı habar basılğan (https://abai.kz/post/15273 ).

Men osı «Otandastar qorınıñ» qwrıluına türtki bolğan azamat retinde osı aydan bastap, öz eñbekaqımnıñ 1%-ın «Otandastar» qorına audarudı bastadım (banktiñ tübirtegi qosa tirkeldi).

Qazaq biznesmenderiniñ esinde bolsın, qazir qandastarımız jabılğan jala men jağılğan küyeden tazardı. Endi qazaq köşi mäñgi toqtamaydı, qazaqtıñ Qazaqstağa kelgeni – kelgen! Wlt Köşbasşısı Nwrswltan Nazarbaev «Elim, jerim dep eñiregen ärbir qazaqqa Qazaqstannıñ esigi ärqaşan aşıq. Eşkimge şekteu joq!» dep şegelep tastağan.

Bılayğı jerde bizge de wlt bolıp wyısıp, uaqıt ketirmey, şette qalğan qazaqtı Atajwrtına oraltudıñ auır mindeti jüktelip otır. Şerhan Mwrtazanıñ sözimen aytsaq, «Bügin biz olardı jılıtsaq, erteñ özimiz olardıñ jıluına jılınamız»!

«QAZAQ BIZNESMENDERİN OSI QORĞA ÖZ ÜLESTERİN QOSUĞA ŞAQIRAMIN!» - degen Wlt Köşbasşısı Nwrswltan Nazarbaevtıñ Ündeuine say, endi QR «Atameken» WKP-nıñ basqarma törağası retinde Sizdiñ de qazaqstandıq baylardıñ öz tabısınıñ, kem degende, 1%-ın ay sayın «Otandastar» qorına audarıp otıruına ıqpal etuiñizdi, wlttıq deñgeyde ülgi körsetuiñizdi swraymın!

«Qarañğı bir şet jerden bizder qosılğanda, basqa közi aşıq, köñili sergek qay qazaq qarap qalar deymiz» - depti ğoy, joğarıdağı Maqswt täyji Sasanwlı bastağan atalarımız.

Sol sekildi, «Otandastar» qorına qol wşın berude, basqası bolmasa da Bolat Ötemwratov pen Qwlıbaevtar otbası qol qusırıp, qarap qalmas dep senem!

Zor qwrmetpen,

Auıt Mwqibek

Astana

Abai.kz

 

29 pikir