Senbi, 25 Qañtar 2020
«Soqır» Femida 4220 40 pikir 15 Tamız, 2018 sağat 13:08

Lavrov bw ertegisin kimge aytıp otır?

Reseydiñ sırtqı ister ministri Sergey Lavrov tağı da büyrekten siraq şığardı. AQŞ sankciyaları Astana üderisine qarsı bağıttalğan degen mälimdeme jasap, sonau qañtardağı kün tärtibindegi mäsele men däl bügingi sankciyalar soqqısın bir-birimen qabıstırıp jiberdi. 

Lavrovtıñ oyınşa, AQŞ sankciyalar arqılı Astanada ötken Siriya qaqtığısın retteu turalı kelissözge kedergi jasamaq körinedi. Oyboy-au, sonda bwl kelissözderge kedergi jasau üşin Tramp biligi altı ay oylanıp,  jeti ay tolğanıp pa?

YAğni, "AQŞ-tıñ Resey, Türkiya jäne Iranğa jaña şekteuler engizui Astana kelissözin eleuli nätijege jetkizbeydi" dep säuegeysu külkili. "Batıs elderi bwl turalı tikeley aytpaydı" dep Resey biliginiñ sayasatın aqtap almaq bolğan Lavrovtıñ oylağanı ne?

Resey Sırtqı ister ministri "Resey, Türkiya jäne Iran Siriyağa qatıstı wstanımdarı säykes bolmasa da, olar bwl mäseleni  şeşude ülken qadamdarğa bara alatının körsetti. Bwl  Siriyadağı qaqtığıstıñ şeşiluine aytarlıqtay äser etti", - dey kelip, "bwl AQŞ-qa wnamaydı, sondıqtan da sankciyanıñ astında qalıp otırmız" degendi meñzegisi keletindey.

Esteriñizge sala keteyik, 2017 jıldıñ 23-24 qañtar künderi Astanada Siriya kelissözine qatıstı jiın ötken bolatın. Keybir sarapşılar ol kezdesudi “Jenevajağı negizgi kelissözderdi jandandıruı mümkin” dep bağalağan. Astana kelissözi qazaq eliniñ geosayasattağı ornın belgilep, beybit el missiyasın atqaruına mümkindik tuğızğan edi.

Al, AQŞ-tıñ soñğı aptadağı sankciyaları Reseydiñ sırtqı sayasatına qarsı bağıttalıp  otır.

Taratıp aytar bolsaq, keşe ğana AQŞ "Kreml' agressiyasınan Amerika qauipsizdigin qorğau turalı zañ" dep atalatın qwjat qabıldadı. Bwl zañ AQŞ prezidenti Donal'd Tramptıñ Resey lideri Vladimir Putinmen 16 şildede Hel'sinkide kezdesuinen keyin äzirlengen.

Zañ jobasında Qwrama Ştattar 1940 jılı qabıldanğan Sovet Odağınıñ Baltıq elderin anneksiyalauın moyındamau jönindegi deklaraciya ülgisi boyınşa Reseydiñ Qırım anneksiyasın moyındamaytını aytılğan. Sonımen birge qwjat AQŞ prezidenti äkimşiligine eldiñ NATO qwramınan şığuına bağıttalğan qadamdar jasauına tıyım saladı.

Zañ jobasınıñ bölek taraularında himiyalıq qaru qoldanğanı üşin (Britaniyanıñ Solsberi qalasında Sergey jäne YUliya Skripal'dıñ ulanuına qatıstı), kiberşabuıl jäne 2016 jılı AQŞ prezidenti saylauına aralasqanı üşin Reseyge jauapkerşilik jükteledi. Mwnda sonımen birge Reseydiñ Siriyada äskeri qılmıs jasauı mümkindigi de aytılğan.

Qwjatta ol qabıldanğannan keyin, 180 kün işinde AQŞ prezidenti "Resey prezidenti Vladimir Putinniñ müddesi üşin zañsız jäne korrupciyalıq äreketke barıp jatqan sayasatkerler men oligarhtarğa jäne Putinmen baylanısı bar adamdar men wyımdarğa qarsı sankciyalar engizilui tiis.

Endi qarañız, AQŞ-tıñ özi  sankciyalardı ne üşin salğanın zañmen şegelep körsetip berip otırğan joq pa? Onı tek Astana kelissözine baylap, kögendep tastauğa bolmaydı. Reseydiñ kesirinen Qazaqstan da ekonomikalıq twrğıda soqqı alıp jatır. Lavrov mwnı bile twra nege mäseleniñ tonın aynaldıra qoydı eken?

Nwrbike Bekswltanqızı

Abai.kz

40 pikir