Seysenbi, 19 Qaraşa 2019
Satira 3525 6 pikir 26 Mamır, 2017 sağat 10:05

Ruımız 71 milliard...

Kerilgenov kabinetinde kerilip otırğan, bireu esikti tırnadı. «Qırıt, qırıt..» degen dauıstan şoşığan ol esikti özi barıp aştı. Qarasa, bireu twr. Adam emes. Adam bolmağanımen jaman emes. Jaman emes deytinimiz, aldında boyı bir metrge jeter-jetpes aqşa adam twr edi. Iä, kädimgi qazaqstandıq banknottar.

Jiırma mıñ teñgelik qağaz aqşalardan qwralğan adam aqşa. Közine qara közildirik tağıp alıptı. Adam twrqındağı aqşalar bir-birine oralıp, jabısıp, qabısıp, adam beynesinde kelip twr. İşi quıs «adam» aqşanı körgen Kerilgenov kenetten külip aldı. Sosın kürsinip saldı da:

– Kiriñiz, – dedi. Aqşa adam sudır-sudır etip işke kirdi de, şeneunikke qarama-qarsı otırdı.

– Iä, qwlağım sizde. Nege keldiñiz? – dep swradı QR wlttıq bankisiniñ bwrınğı törağası Tasığan Kerilgenov.

– Tanıdıñız ba? – dedi aqşa adam.

– Joq.

– Biz jiırma mıñdıqtar – zeynetaqı qorınıñ bwrınğı aqşaları edik. Ruımız 71 milliard. Onıñ işinde QR Wlttıq bankisinenbiz, odan zeyneaqı qorı bolıp taraymız. Siz bizdi bank basqarıp twrğanıñızda bankrotqa wşırap kele jatqan Äzirbayjan bankisine bere saldıñız...

– Iä?

– Sodan beri betimiz siya. Otanımızdı sağındıq. Qaytayıq desek jibermeydi... Eki jüz teñgelik qızdarımızdı, bes jüz teñgelik wldarımızdı, on mıñdıq qatındarımızdı sağındıq...

– Sender qalay keldiñder? – dep swradı Kerilgenov kürsinip.

– Bankten qaşıp şıqtıq. Körmeysiz be, birazımız jırtılıp qaldıq. Jolay skotçtalıp, jetken jerimiz osı. Aytıñızşı, 71 milliard zeynetaqı qorı qaşan elge qaytadı? –dep swradı aqşa adam jılamsırap. Közildirigin alıp, közderin bet oramalımen sürtip jattı. Sosın öksigin basıp:

– Halıqtıñ aqşasına nege tiise beresizder osı? Bizdi şetel asırğanda şıqqan müyizderiñ qane? – dep saldı.

– Ou, keşirersizder, qazir wlttıq banktiñ törağası emespin!

– A? Şetelde jürip estimeppiz. Qwttı bolsın! – dedi Aqşa adam.

– Senderdi Äzirbayjan bankisi jibermey jatır ma?

– Iä, jeti jılda qaytuımız mümkin deydi. Qaytqan künde de, boyımız, ne oyımız öspey, ösimsiz qaytarılamız ba, ol jağı jwmbaq bolıp twr... Bizdiñ ornımızğa obligaciyalar satıp alıpsızdar... Ne, bizdi jek köresiz be?
– E, joğa, senderdi öte jaqsı köremin! Jäy, el körsin, jer körsin degen edim...

– Halıqtı şırıldatıp, büytip el körgeni qwrısın. Almatını, Astananı sağındıq. Jaqında ötetin halıqaralıq EKSPO körmesin de köre almaytın boldıq qoy... Äneuküni bir jiırma mıñdıq inimiz asılıp ölmek bolğanda, äreñ qoydırdıq. Bir boyjetkenimiz sizderge ökpelep, özin-özi jırtıp tastadı. Qazir reanimaciyada jatır... Otandı sağınıp kördiñiz be öziñiz? Otan ottan ıstıq, körpeden jılı...

– Zeynetaqı qorınan emessizder...

– Onı qwzırlı organdar anıqtay jatar. Qaydan ekenimizdi de wmıtıp qaldıq qoy, eseñgirep...

Aqşa adam Kerilgenovpen qwşaqtay hoştasıp, kabinetten şığıp bara jattı. Biraq jılap bara jatqanın eşkim körmedi... Qayran, jelge wşqan jırtıq köñil aqşalar-ay!

Mwhtar ŞERİM

Abai.kz

 

 

6 pikir