Jeksenbi, 17 Qaraşa 2019
Dep jatır 2914 0 pikir 30 Naurız, 2017 sağat 14:04

«Habar» arnası «Men änşimin» jobasın körsetedi

Qazaq jwrtı Dimaş Qwdaybergenovtıñ Qıtaydıñ «Hunan TV» telearnasındağı «Men änşimin» (Singer 2017) bayqauına qatısıp jatqanınan habardar. Üzdik änşini anıqtaytın muzıkalıq doda eñ alğaş 2013 jılı efirge şıqqan. Osı jılı besinşi ret wyımdastırıluda. Şou aspan astı elinen özge, Kanada, Malayziya, Singapur, Tayland jäne Europa memleketterine taraydı. Al, 1-säuirden bastap Qazaq elinde de körsetilmek.

Bwl jöninde «Habar» telearnasınıñ Bas prodyuseri Aydos Twrısbek mälimdedi. - Bwğan deyin biz Dimaştıñ halıqaralıq bayqaudağı önerin ğalamtordan üzik-üzik qana körsek, endi sayıstıñ tolıq nwsqasın körsetu mümkindigi tuıp otır. Muzıkalıq şoudıñ atmosferasın, ondağı köñil-küy, özge änşilerdiñ babın, sahna sırtındağı bäseke – mwnıñ barlığın «Men änşimin» jobasınan tamaşalay alasızdar. 22 säuir soñğı sayıs küni. Finaldıñ özi eki kezeñnen twradı. Alğaşqısında Dimaş jeke orındasa, ekinşi kezeñde duette än aytadı. Änşiniñ janküyerleri üşin osı swraq qızıq bolıp twr. Dimaş bir sahnada kimmen än aytuı mümkin? Mwnı däl sol küni «Habar» arnasınan köre alasızdar» - dedi ol.

Esteriñizde bolsa Dimaş Qwdaybergenov alğaş ret 21 qañtar küni francuzdıñ «SOS d'un terrien en détresse» änin şırqap, qıtaylıq sınşılar tarapınan joğarı bağalandı. Keybir Qıtay basılımdarı onı «Täñir özi nazarına alğan jas änşi» dep bağalağan edi. Talanttı önerpaz milliardtağan körermenniñ aldında qıtay, orıs, ağılşın tilderinde, al eñ bastısı qazaq tilinde än salıp ülgerdi.

Jas darınnıñ jetistikterinen keyin aspan astı eliniñ Qazaqstanğa qızığuşılığı arta tüsti. Bizdiñ muzıkalıq aspaptarımızğa, tilimizge, tipti qanday tağam jeytinimiz körşilerge tañsıq bolıp twr.

- Dimaştıñ janküyerleri künnen-künge tañqaldıruların qoymaydı. Rasımen, maqtanğa salınbayıqşı dep, köp tosın sıylardı jariyalay bermeymiz. Biraq, bügingisi erekşe! Qıtay fanattarı arnayı Qazaqstandı zerttep, viza aşıp, elimizge barıptı. Dimaştıñ qarnı aşıp qalmasın dep, qazaq wlttıq tağamdarın dayındap, bügingi tüski asta bizdi tañqaldırdı. Qazı-qarta, tarı-talqan, qwrt-may, jemis-jidek bäri bar! Jıraqta jürgen jan üşin bwl tağamdardıñ ornı erekşe ekeni sözsiz! Qorap-qorap sıylıq. Äli aşıp ta ülgermey jatırmız! Barlığı änşisine degen nieti ğoy janküyerlerdiñ» - dep jazğan edi Dimaştıñ PR- menedjeri Alpamıs Şarimov öziniñ Instagram äleumettik jelisindegi jeke paraqşasında.

Kil mıqtılar jinalğan sahnada şın talanttı anıqtau kiınnıñ qiını-aq. Sebebi Dimaştıñ PR-menedjeri aytıp ketkendey bwl sayısqa qatısuşılardıñ ärqaysı birneşe dodalarda baq sınap, biikterdi bağındırıp ülgergen, öz elderinde tanımal jwldızdar. Bayqauda qıtay azamattarınan özge Oñtüstik Koreya, Malayziya, Singapur jäne Qazaqstannan kelgen änşiler qatısuda. Jerlesimiz Ortalıq Aziyadan qatısqan alğaşqı önerpaz.

Qazirgi uaqıtta Dimaş on kezeñnen sürinbey ötip, finalğa joldama aldı. Endi änşi säuir ayında ital'yanıñ eñ äygili änşi häm akteri Adriano Çelentanonıñ «Confessa» änin orındaydı dep kütilude.

Sonımen, 1-säuirden bastap är senbi sayın «Habar» arnasınan «Men änşimin» jobasın tamaşalañızdar!

Abai.kz

0 pikir