Seysenbi, 22 Qazan 2019
Bw ne mazaq? 4505 0 pikir 25 Qañtar, 2015 sağat 11:23

ZEYNETAQI QISQARA MA?

Aytıp-aytpay ne kerek, bizdiñ ükimetimizdiñ ne oylağanı bar ekenin qarapayım qazaqstandıqtar tüsinuden qalıp bara jatır. Öytkeni, biıldan bastap sanasañ – sausağıñ jetpeytin türli de türli özgertuler men jañğırtular, qazaqtıñ jalpaq tilimen aytqanda, qaraşa halıqtıñ qaltasın qağuğa kiristi. Tipti «byudjet aqşasın mınanday da mınanday joldarmen ünemdeuge boladı» dep adam balasınıñ miına kelmeytin «jañalıqtar aşuğa» qwmar bop alğan şeneunikter osınday «jañalıqtarımen» Memleket basşısınıñ közine tüsuge tırısatın siyaqtı. Bwl jolğı «jañalıq aşu kezegi» densaulıq saqtau salasına kelgenge wqsaydı. Aq halattı abzal jandar, nesin aytamız, wyat-ayattı jiıp qoyıp, basqa emes, bizdiñ qadirli qarttarımızdıñ qaltasına qol saluğa köşuge dayındalıp jatır. QALAY?

BILAY:

Qwlağına bireu sıbırlap jiberdi me, älde jeke öziniñ bastaması ma – biz bwl jağın bile almadıq, al bilgenimiz - Densaulıq saqtau jäne äleumettik damu ministriniñ «vicesi» (osı küni orınbasarlardı «vice» dep atamasañız, kädimgidey renjip qaladı) Svetlana JAQIPOVA hanım qarttar üyindegi qariyalarımızdı bazalıq zeynetaqılarınan ayırıp, olardı 30 payızğa qısqartıp tastau kerek degen JAÑALIQ aştı. YAğni, bizdiñ parlamentariylerimizge osınday jañalıqtı qoldanıstağı zañğa özgertu retinde engizu kerek degen wsınıs jasadı. Mässağan, bezgeldek! «Boyauşı-boyauşı degenge saqalın boyaptı» degenniñ nağız kökesi endi bolayın dep twrğan siyaqtı! Vice-ministr hanımnıñ aytuına qarağanda, zañ tarmaqtarına özgertu retinde engizile qalğan jağdayda mwnday jañalıq öz üylerinde, sonday-aq öz päterlerinde twratın zeynetkerler men memlekettiñ qamqorlığındağı qarttar üyinde twratın zeynetkerler arasında äleumettik ädilettilikti qalıptastıruğa mümkindik beretin körinedi. «Öz üyinde nemese öz päterinde twrıp jatqan zeynetker kommunaldıq qızmetterge aqı töleydi, däri-därmek pen azıq-tülik satıp aladı, mwnı tüsinuge boladı, - deydi Svetlana Jaqıpova özderi engizgeli otırğan jobalıq özgeristerge tüsinikteme bergen kezde, - al endi qarttar üyi siyaqtı mediko-äleumettik mekemelerde ömir sürip jatqan zeynetkerlerimizge keletin bolsaq, olarğa mwnday mäselelermen aynalısudıñ qajettiligi joq. Olar üşin bäri tegin: azıq-tülik te, qısqı jäne jazğı kiim-keşekter de – qısqası, bäri de. Söyte otırıp, olar zeynetaqı da aladı. Bwlay bolmaydı, bwlardıñ zeynetaqıların osılayşa qısqartu kerek...»

Oypırmay, osılayşa... jañalıqtıñ kökesin aq halattı abzal jandar şığardı. Mäselen, Qarağandı oblısında tört jüzge tarta zeynetker qarttar üyinde twrıp jatır desek, olarğa byudjetten jıl sayın milliondağan teñge bölinedi eken. Al eger joğarıda aytılğanday özgerister men tolıqtırular qoldanıstağı zañımızğa «oydağıday» ene qalatın bolsa, respublika boyınşa qanşama milliard teñge ünemdeledi?! Aqşa ünemdeudiñ «töte jolın tauıp» şığarğan «ministrliktegi marqasqalar» osılay oylaydı. «Qarttar üyindegi zeynetkerlerge tölenetin bazalıq zeynetaqı toqtatılıp, olardıñ «solidarnıyları» 30 payızğa qısqaratın bolsa, elimiz boyınşa jıl sayın 4 milliard teñge ünemdeletin boladı, - deydi SVETLANA hanım, - ärine, bir jağınan alıp qarağanda, biz bwl jerde ünemdep otırmız dep te ayta almaymız, öytkeni, tura osı teñgelerdiñ özderi mediko-äleumettik mekemelerde ömir sürip jatqan mügedek jandardıñ özderin qamtamasız etuge bağıttaladı...»

Mine, «ne bolsa – o bolsın» nemese eki de bir bolsın» degen mağınadağı osınday tağı bir «jarımjan jañalıq» küni keşe ğana halıq qalaulılarınıñ qarauına berildi. Özgertuler men tolıqtırularğa tolı osınau joba äzirge qabıldana qoyğan joq. Al qabıldanıp ketse şe?

Oylaudıñ özi qorqınıştı!

Marat MADALIMOV.

 

Abay.kz 

 

0 pikir