Seysenbi, 19 Qaraşa 2019
Qwyılsın köşiñ 12485 0 pikir 1 Aqpan, 2015 sağat 11:58

SİZDER NAZARBAEVTIÑ SAYASATINA QARSISIZDAR!

Jer betindegi qazaq halqınıñ twtastığın oylap janwşırıp jürgen azamattardıñ bir şoğırı Qazaqstan Respublikasınıñ işki ister ministri, policiya general-leytenantı Qalmwhanbet Nwrmwhanbetwlı Qasımovqa aşıh hat jazıp, şirek ğasırdan beri şeşimin tappay kele jatqan köşi-qon mäselesine qatıstı ötiniş-tilekterin bildirdi. Bwndağı söz tağı da Atajwrtına birjola qonıs audarıp kelip jatqan qandastarımızdan sottalmağanı turalı anıqtama swraudı artıq ekendigine sayadı. Öytkeni, qıtay ökimeti şet memleketterge köşetin (şığatın) azamattarı qanday da bir qılmıs jasap, zañ aldında jauapqa tartılsa, rwqsat bermeydi. Demek, «arğı betten» «bergi betke» ötip jürgen etnikalıq qazaqtardıñ qıtay ökimetiniñ aldında qılmısı joq degen söz. Alayda, osı jayttı «soqır mılqau tanımas tiri jandı» - qazaq ökimetiniñ qwzırlı organdarın basqarıp otırğan wlıqtarğa tüsindiru qiınnıñ qiını boldı. Sebebi, Qalmwhanbet Qasımovtıñ vedomostvosınan qaytarılğan jauap ta bwrınğı-soñğı jauaptardıñ izin qaytalap  «...Twraqtı twratın memlekette sottılığı (sottılığınıñ joqtığı) turalı qwjattıñ boluı közdeledi» degendi aytadı. Endi hat pen jauaptı qatar oqıp köreyik:

 

Qazaqstan Respublikasınıñ işki ister ministri,

Policiya general-leytenantı

Qalmwhanbet Nwrmwhanbetwlı Qasımovqa

Qwrmetti Qalmwhanbet Nwrmwhanbetwlı!

2014 jılı 6 tamızda ükimettiñ keñeytilgen otırısında Elbasımız Nwrswltan Äbişwlı Nazarbaev: «Sırttağı otandastarımızdıñ keluine jol aşıp, olardıñ el işinde ornalasuına jağday jasauımız kerek», – dep mälimdep, Ükimetke tapsırma bergen bolatın.

Şetten oralğan qandastarımız qarjısız kelmeytinin eskersek, olar - bir jağınan adami kapital, ekinşi jağınan investiciyalıq küş. Onan da mañızdısı - auıldı jerlerde twrğındarı sirep qalğan soltüstik oblıstarımızdıñ kemtigin toltırıp, memleketimizdiñ twtastığın, täuelsizdigin qorğauğa sebepker bolatın quat.

Alayda, qandastarımızdıñ oraluına äkimşilik kedergi köp. Bwl, äsirese, İşki ister ministrligi tarapınan bolıp otır. Ükimet qandastarımızdıñ azamattıq aluına zañdıq jağınan kepildik jasağanmen, şın mäninde mümkin bolmay twrğan jağı tağı bar. Atap aytqanda, zañdıq sipatı anıqtalmağan qayşı anıqtamalardı talap etip, twraqtı tirkeuge twruğa mümkindik bolmauda. 

Biz öz küşine engen qwqıqtıq jüyeni jañğırtudıñ belgili merzimge sozılatındığın jaqsı tüsinemiz. Al, äkimşilik kedergilerdi tez arada joyuğa tek Ükimet pen İşki ister ministrligi qwzırlı. Atalğan kedergiler Qazaqstan Respublikası Ükimetiniñ 2012 jılğı 28 naurızdağı №362 Qaulısı men 2014 jılğı 19 aqpandağı №111 qaulısı negizinde soñğı jıldarda twraqtı twruğa jäne azamattıq aluda öz qandastarımızğa jasalğan eñ bastı kedergige aynaldı.

Atalğan qaulılarğa säykes, twraqtı twruğa jäne QR azamattığına ötiniş bergen öz qandastarımızdan «onıñ azamattığı memleketiniñ jazbaşa kelisimi retinde boluı mümkin ketu parağı, ne şetelge twraqtı twru üşin şığuğa rwqsattı rastaytın basqa qwjat» jäne «kelgen elinde sottılığınıñ bar boluın ne joqtığın rastaytın qwjattı» talap ete bastağan bolatın.

«Kelgen elinde sottılığınıñ bar boluın ne joqtığın rastaytın qwjat» degen anıqtama - artıq anıqtama. Öytkeni, Qıtay ökimeti sottalğan adamdarğa tölqwjat beruge «zañ jüzinde tıyım salğan».

 «Onıñ azamattığı memleketiniñ jazbaşa kelisimi retinde boluı mümkin ketu parağı, ne şetelge twraqtı twru üşin şığuğa rwqsattı rastaytın basqa qwjat» kerek. Bwl anıqtamanı alu üşin Qıtay tarapı «şeteldiñ azamattığın alğandığı turalı anıqtamanı» talap etedi. Bwl - eki eldiñ köşi-qon mäselesinde üylespey kele jatqan qarama-qayşılıqtıñ biri.  Eki ortada qandastarımız osı sebepten Qazaqstan aumağında twraqtı tirkeuge twruğa zañdıq twrğıda mümkindik ala almay otır. Alğan künniñ özinde zañ jüzinde qılmıstıq jauapkerşilikke deyin aparatın qayşılıqtı mäsele.

Al, kelgen elinen alıp kelgen sol qwjatqa sol eldiñ osındağı diplomatiyalıq ökildikteri mör basıp maqwldaytın bolğan. Aşığın aytqanda, atalğan eki türli qwjattı äkelu qarapayım oralmandar üşin is jüzinde mülde mümkin emes. Qazaq köşiniñ jiırma jıldan asa tarihında elge oralğan qandastarımız däl osınday qoldan qiındatılğan kedergige kezdesken joq edi. Ärine,  QR Ükimetiniñ atalğan qaulıları elimizge sırttan keletin kelimsekterdiñ köşi-qon ağınınan tuındaytın qauip–qaterlerdiñ aldın alu maqsatında qabıldanğan dep tüsinuge boladı. Biraq, bwdan bwrın mwnday talaptardıñ etnikalıq qazaqtarğa qatısı joq bolatın. Jäne bwğan deyingi Ükimet Qaulılarınıñ köbinde mäsele şeteldegi qazaqtarğa qatıstı bolğan jağdayda, «etnikalıq qazaq ökilderinen özge» degen tirkes arnayı qosılatın. Ökinişke qaray, soñğı birneşe jıldıñ köleminde şeteldegi qazaqtar müddesi köbinde wmıt qalıp, olardıñ qwqıqtıq därejesi özge de şeteldikterdiñ därejesine deyin qwldırap ketti.

Elbasımız 2011 jılı Düniejüzi qazaqtarınıñ törtinşi qwrıltayında «qandastarımızdıñ qwjat tapsıruda, tirkeuge twruda, azamattıq aluda kezdesetin türli kedergilerdi joyudı» qadap tapsırğan bolatın. Eñ ökinerligi, qazir qazaq köşinde qalıptasqan kürdeli jağday Elbasımızdıñ sol tapsırmasınıñ mülde orındalmağandığın körsetedi.

Täuelsiz elimizdiñ wlttıq qauipsizdigi tüptep kelgende memleket qwruşı wlttıñ öz jerinde  basımdılığına tikeley täueldi ekendigin tübi bir tuısqan eki el: Resey men Ukraina arasındağı janjal ayqın däleldep berdi. Sol sebepti, şetelderde twratın öz qandastarımızdı özderiniñ birden-bir täuelsiz otanı Qazaqstanğa toptau - kezek küttirmeytin qasietti mindet.

Sizderden ötinerimiz:

1. Qazaqstan Respublikası Ükimetiniñ 2012 jılğı 28 naurızdağı №362 Qaulısı men  2014 jılğı 19 aqpandağı №111 qaulısı negizinde soñğı jıldarda twraqtı twruğa jäne azamattıq aluda   qandastarımızğa jasalğan eñ bastı kedergi – QR azamattığına ötiniş bergen qandastarımızdan talap etetin «onıñ azamattığı memleketiniñ jazbaşa kelisimi retinde boluı mümkin ketu parağı, ne şetelge twraqtı twru üşin şığuğa rwqsattı rastaytın basqa qwjat» jäne «kelgen elinde sottılığınıñ bar boluın ne joqtığın rastaytın qwjattı» alıp tastaudı;

2. Bwğan deyingi Ükimet Qaulılarınıñ köbinde mäsele şeteldegi qazaqtarğa qatıstı bolğan jağdayda, «etnikalıq qazaq ökilderinen özge» degen tirkes arnayı qosılatın. Osını qalpına keltirudi;

3. Qandastarımızdıñ twraqtı tirkeuge twruına jäne Azamattıq aluına jeñildetilgen tärtip engizip, 3 ay merzim işinde Azamattıq aluğa zañdıq jäne qwqıqtıq mümkindik berudi;

4. Şet elden oralğan darındılardı jüyeli ornalastıru üşin arnayı beyimdeu jäne tanıstıru ornın qwrudı Ükimetten jäne basqa qwzıretti organdardan talap etudi ötinemiz!

Biz köterip otırğan osı mäseleler – Prezidentimizdiñ tapsırmasın orındauğa alğı şart äri Ükimettiñ mañızdı şeşimi bolmaq.

Qwrmetpen:

Qoğam qayretkeri Uzben Qwrmanbay (Mwñğwliya)

Jazuşı, sazger Erqoja Tilepberdi (Qazaqstan)

Qoğam qayretkeri Ömirhan Altın(Germaniya)

Önertapqış, käsipker Ğalımbek Qızırbek (Qıtay)

Jurnalist, aqın Ahmetwlı Beysen (Qazaqstan)

 

 

Joğarıdağı hat pen ol hatqa baylanıstı kelgen jauapqa oray köşi-qon taqırıbında qalam suıtpay jazıp, wlttıq mazmwnı tereñ mäseleler köterip jürgen aqın, qoğam belsendisi Auıt Mwqibek bılay deydi:

Qazaqstan Respublikasınıñ

İşki ister ministriniñ orınbasarı,

general-mayor

E.Z.Twrğımbaevqa

Qwrmetti Erlan Zamanbekwlı!

«Qamşı.kz» aqparattıq portalınan (http://qamshy.kz/?p=17996) jurnalist Beysen Ahmetwlınıñ qandastarımızdıñ twraqtı tirkeuge twruına bastı kedergi bolıp otırğan EKİ QWJAT turalı İşki ister ministri Q.Qasımovtıñ atına jazğan hatına qaytarğan İİM Köşi-qon policiyası departamentiniñ bastığı E.Sayınovtıñ jauabın oqıdım.

Jauap hatta E.Sayınov Elbası N.Nazarbaevtıñ 2014 jıldıñ 04 mamırında №1026 tapsırmasımen «Qazaqstan Respublikasınıñ keybir zañnamalıq aktilerine halıqtıñ köşi-qonı jäne jwmıspen qamtıluı mäseleleri boyınşa özgerister men tolıqtırular engizu turalı» Ükimette dayındalğan Zañ jobasınıñ Mäjilistiñ qarauına tüskenin ayta kelip, bwl Jobada da «Qazaqstan Respublikasınıñ azamattığına qabıldau kezinde memleketti jäne qoğamdıq qauipsizdikti qamtamasız etu maqsatında AZAMATTIĞI TIESİLİ JÄNE (NEMESE) TWRAQTI TWRATIN MEMLEKETİNDEGİ SOTTILIĞI (SOTTILIĞINIÑ JOQTIĞI) TURALI QWJATTIÑ boluı közdeldi» depti.

Söytip, «köşip keluşiler 1) adamzatqa qarsı halıqaralıq qwqıqta közdelgen qılmıs jasasa, Qazaqstan Respublikasınıñ egemendigi men täuelsizdigine ädeyi qarsı şıqsa; 2) Qazaqstan Respublikası aumağınıñ birligi men twtastığın bwzuğa şaqırsa; 3) wlttıq qauipsizdikke, halıqtıñ densaulığına nwqsan keltiretin qwqıqqa qarsı äreketti jüzege asırsa; 4) wltaralıq jäne dini arazdıqtı qozdıratın bolsa, Qazaqstan Respublikası memlekettik tiliniñ qoldanıluına qarsı äreket jasasa; 5) terroristik jäne ekstremistik wyımdarğa kirgen nemese terroristik äreketi üşin sottalğan bolsa; 6) halıqaralıq izdeude bolsa, sottıñ küşine engen ükimi boyınşa jazasın ötep jürse, ne sot onıñ äreketin erekşe qauipti baukespelik dep tanısa; azamattıqqa qabıldaudan bas tartıladı» eken.

Öte dwrıs!

Biraq, Sizder osı jerde 1.5 million qandasımız twratın körşi el Qıtay Halıq Respublikasınıñ «TÖLQWJAT BERU TÄRTİBİN» eskerdiñizder me?!

Esteriñizde bolsın, ädette Qıtay azamattarınıñ qolında şetelge şığatın TÖLQWJAT (zagranpasport) bolmaydı. Olar el işinde tek JEKE BAS KUÄLİKPEN (udostoverenie liçnosti) ğana jüredi. Şetelge şığuğa ötiniş bildirgen jağdayda ğana azamattarğa TÖLQWJAT beriledi. Onıñ özinde, sol şetelge şığudı ötingen azamat 1) QHR-nıñ azamatı emes bolsa; 2) Öziniñ kim ekendigin däleldey almasa; 3) Qwjat alu barısında jalğan dokument jasap, alayaqtıq istese; 4) Sottalıp, jazasın öteude bolsa; 5) Sottıñ tolıq şeşimi şıqpağan isti adamdar bolsa; 6) Qılmıstıq iske qatısı bar dep, jauapqa tartılğan kümändi adamdar bolsa; 7) Memlekttik qwzırlı mekemelerde qızmet atqarğan, şetelge şıqqan soñ memleket qauipsizdigine qater töndiredi, zor zalal keltiredi dep eseptelse, oğan TÖLQWJAT mülde berilmeydi. Şetelge şığuına rwqsat joq!

Osılay dep «QITAY HALIQ RESPUBLIKASI TÖLQWJAT BERU TÄRTİBİNİÑ» 13-tarmağında aşıq jazılğan. Atalğan «TÄRTİP» 2007 jılı 29 säuirde Qıtay Halıq respublikası 10-kezekti Bükil memlekettik Halıq qwrıltayı Twraqtı komitetiniñ 21-Joralar mäjilisinde maqwldağan. №50 bwyrıqpen bekitilip, QHR Törağasınıñ qolı qoyılğan. 2008 jıldıñ 1 qañtarınan bastap atqarılıp keledi.

Sonımen birge, QHR Azamattıq turalı zañınıñ 9-tarmağında «Şetelge qonıstanğan QHR azamatı öz erkimen şetel azamattığın qabıldasa, sol künnen bastap QHR azamattığınan avtomattı türde şıqqan bolıp esepteledi» dep jazılğan. Bwl 1980 jılı 10 qırküyekte maqwldanğan.

E.Sayınov aytqan, qoldanıstağı «Qazaqstan Respublikasınıñ azamattığı turalı» zañında körsetilgen jäne qazir Mäjiliske tüsken jaña Zañ jobasında közdelgen «azamattığı tiesili jäne (nemese) twraqtı twratın memleketindegi sottılığı (sottılığınıñ joqtığı) turalı qwjattı» Qıtay eli belgilengen «Tärtibine» say, şetke şığatın azamattarına bermeydi. Ol eldiñ Tölqwjat alıp, şetke şığıp jatqan azamattarı joğarıdağı jeti süzgiden ötken. Qılmısqa qatısı joq azamattar!

Qwrmetti Erlan Zamanbekwlı!

Estir qwlaq bolsa, däl osı mäsele turalı küni keşege deyin az aytılğan joq (http://abai.kz/post/view?id=2680). Mine, Sizge tağı qaytalap tüsindirip otırmın.

Tek osı mäsele jöninde ötkende baqanday tört senator qol qoyıp, Ükimet basşısı K.Mäsimovtıñ atına hat jazdı (http://kerey.kz/?p=5272).

  

Mäjilis deputatı J.Ahmetbekovtiñ de Q.Qasımovqa deputattaq saual joldağanınan habarımız bar (http://qaznews.kz/zhambyl-axmetbekov.html).

Ükimettiñ №111 Qaulısımen 2014 jıldıñ 19 aqpanında bekitilgen «Şeteldikter men azamattığı joq adamdardı tirkeu jäne olarğa Qazaqstan Respublikasında twraqtı twruğa rwqsat beru» memlekettik körsetiletin qızmet standartında aytılğan osı jäne «onıñ azamattığı memleketiniñ jazbaşa kelisimi retinde boluı mümkin ketu parağı, ne şetelge twraqtı twru üşin şığuğa rwqsattı rastaytın basqa qwjattı» Qıtay tarapı bermegendikten, ötken jıldan beri ol elden kelgen neşe jüzdegen qandastarımız äli künge deyin twraqtı tirkeuge twra almay qañğırıp jürgenin BAQ kün qwrğatpay aytıp, jazıp keledi.

«Qandastarımızğa jol aşuımız kerek. Qazaqtıñ jeri keñ. Ornalasamın degen jerin özi tañdasın!» dep, bwl jolı Wlt Köşbasşısı N.Nazarbaevtıñ özi qadap twrıp Ükimetke tapsırma berdi. «QANDASTARIMIZĞA JOL AŞUIMIZ KEREK!» degende, Nwrekeñniñ qoldanıstağı Köşi-qon zañı men Ükimettiñ №111 Qaulısındağı osı kedergilerdi joyudı meñzegeni tağı aydan anıq!

Demek, sonıñ bärin bile twrıp, Sizderdiñ büyrekteriñizdiñ bülk etpegenine tañ qaldım. Aytıñızşı, tağı da aldağı zañ jobasında «azamattığı tiesili jäne (nemese) twraqtı twratın memleketindegi sottılığı (sottılığınıñ joqtığı) turalı qwjattıñ boluı közdeldi» degenderiñizdi qalay tüsinuge boladı?! Sizder özi kimniñ, qay eldiñ İşki ister ministrligisizder?!

Sonda, Wlt Köşbasşısı Nwrswltan Äbişwlı Nazarbaev qandastarımızğa ne üşin jol aşıp otır?! Aldağı jerde «Memlekettik jäne qoğamdıq qauipsizdikti qamtamasız etu maqsatında» ma, älde basqa nietpen be?!

2002 jılı Türkistanda aşılğan Düniejüzi qazaqtarınıñ ekinşi qwrıltayında şetten kelgen qandastarımızğa aytqan Prezidenttiñ mına bir sözine qwlaq türiñizşi: «Qazaq halqınıñ boyındağı wlttıq qasietteriniñ biri dalalıq keñpeyildilik, aqılğa jügingen şıdam men sabır bolsa, sizder sol qasietterdi köteru arqılı özderiñiz qazir twrıp jatqan elderdiñ sayasi twraqtılığına, wltaralıq kelisimine öz ülesteriñizdi qosıp jürsizder dep bilem jäne sol üşin Sizderge aq alğısımdı aytqım keledi.

Qay jerge barsam da qazaq diasporası tınıştığımızdı aldı degen sözdi estip körgen joqpın. Bwl da wlttıq deñgeydegi estiyarlıqtıñ belgisi!» («Qazaq köşi – qazaqtıñ qauımdasuı», 174-bet).

Mısalı, endi Siz mağan soñğı bes ne üş jıl işinde «adamzatqa qarsı halıqaralıq qwqıqta közdelgen qılmıs jasağan, Qazaqstan Respublikasınıñ egemendigi men täuelsizdigine ädeyi qarsı şıqqan» qanşa etnikalıq qazaq bar ekenin aytıp bere alasız ba?!

Ekinşi qwrıltaydan beri de onşaqtı jıl ötti, sol qazaqtar sol «wlttıq deñgeydegi estiyarlığınan» biiktemese, tömendegen joq!

Basqa – basqa, Elbası Tapsırmasınıñ astarın tüsinbegen midı men mi emes, aşığan ayran der edim! Aşığın aytayın, mwnday bolğanda, Sizder Qazaqstan Respublikasınıñ Twñğış Prezidenti Nwrswltan Nazarbaevtıñ sayasatına tis-tırnaqtarıñızben qarsısızdar! Onıñ Tapsırmasın qwlaqtarıñızğa ilmeysizder! Qıtaydağı qandastarımızdı Atajwrtına mülde oraltqılarıñız kelmeydi!!!

Äytpese, Q.Qasımov Beysen Ahmetwlınıñ hatın S.Sayınovqa siltemes edi. S.Sayınov mınaday jauap bermes edi ğoy.

Siz jaqsıraq oylanıñız, qwrmetti vice-ministr mırza!

Bizdiñ talap, aldağı jerde jaña Zañ jobasın maqwldağanda da, Ükimettiñ №111 Qaulısına özgeris engizgende de joğarıda aytılğan  «QITAY HALIQ RESPUBLIKASI TÖLQWJAT BERU TÄRTİBİ» qatañ eskerilip, etnikalıq qazaqtardan (onıñ işinde Qıtaydan keletin qandastarımızdan tipti de) bwl eki qwjat bwrınğıday talap etilmeytin bolsın!

Al, EKİ QWJAT talap etilgen jağdayda, bwl Zañıñızdıñ da qwnı kök tiın bolmaq! Kök tiın!!! Elbası Nwrswltan Äbişwlı Nazarbaevtı jäne jerge qaratasızdar! Aşığın aytayın, esteriñizde bolsın, oralman ağayındar da bwl qorlıqqa endigiäri tözbeydi!!!

Eskertu: Bwl Hattıñ köşirmesi BAQ-qa jiberildi. Mağan S.Sayınovtıñ emes, Erlan Zamanbekwlı, Sizdiñ öz jauabıñız kerek! Eñ jaqsısı, Siz meni jeke qabıldağanıñız dwrıs!

Qwrmetpen,

aqın Auıt MWQIBEK

26.01.2015

Astana

Abai.kz

0 pikir