Senbi, 25 Qañtar 2020
Qoğam 5847 0 pikir 28 Aqpan, 2015 sağat 11:51

NEMCOVTI NEGE ATTI? KİM ATTI?

Putin biligine qarsı küşterdiñ jetekşisi, Reseydegi bedeldi sayasi twlğa – Boris Nemcov kisi qolınan qaza taptı. Nemcovtı belgisiz bireu atıp öltirgen dep habarlauda aqparat közderi. Nemcovtı oqqa baylağan jerden qılmısker tez jasırınıp ülgergen. Qazir ol izdeude. Oppozicionerdiñ ölimin «eldegi ahualdı uşıqtıru üşin bireuler qasaqana jasadı» dep mälimdegen RF prezidenti Putin bolğan isti özi qatañ baqılaytındığın aytuda.

Boris Nemcov köz jwmarınan birer sağat bwrın «Eho Moskvı» radiosına swhbat bergen körinedi. Nemcovtan swhbat alğan jurnalist te, radionıñ bas direktorı da onıñ ädettegidey sergek äri köñildi bolğanın eske aladı. «Efirden soñ, - deydi radio qızmetkerleri, - Nemcov bizge «Vesna» şeruiniñ qalay ötetindigi turalı äñgimeledi».

Nemcov 1 naurız küni şeru ötetin Mäskeudegi Mar'ino audanınına qaray Ülken tasköpir arqılı äzirge atı-jöni jariya etile qoymağan ukrain qızımen söylesip kele jatadı. Tap osı kezde twtqiıldan şığa kelgen avtokölikten oğan qaray oq jauıp ketken. Jeti ret atılğan oqtıñ törteui Boris Efimwlına darıp, ol qaza tapqan. Nemcov atılğan jerde bolğan qız tergeuge alındı.

Esteriñizge salıp qoyğanımız jön şığar, erteñ Mäskeude oppoziciyalıq küşterdiñ ülken şerui ötpek bolıp josparlanğan. Jiın üstinde Boris Nemcov Resey qarulı jasaqtarınıñ Ukrainadağı tınışsız aymaqtarda qanday äreketter jasap jürgeni turalı bayandama jasamaq niette ekendigin serikterine eskertipti. Nemcovtıñ bwl eskertuin jurnalisterge reseylik sayasatker Il'ya YAşin habarlağan. Osı jayttı ayta otırıp YAşin: «Boris Efimwlı «Putin jäne soğıs» degen kitap jazıp jür edi» deydi.

Marqwm Boris Nemcov El'cinniñ twsında bilikke aralasqan twlğalardıñ biri edi. Jañaşıldığımen, demokrattığımen közge tüsetin. Ol memlekettik qızmet baspaldağında prem'er-ministrdiñ orınbasarı deytin lauazımğa deyin köterildi. Putin bilikke kelgen soñ qızmetten mülde alastalıp, solşıl küşterdiñ liderligin öz qolına aldı. Nemcov ünemi Putinniñ sınşısı boldı. Resey gazetterine bergen bir swhbatında Boris Efimwlı: «Anam mağan habarlasqan sayın, «Sen Putin turalı qattı söyleme. Ol seni öltiredi» degendi jii aytadı» depti. «Al, siz Putinnen qorqasız ba?» degen jurnalisterdiñ swrağına: «Iä, azdap seskenem. Alayda, qorıqpaymın. Eger men odan qorqatın bolsam oppoziciyanı basqarmas edim ğoy» dep ağınan aqtarılğan eken.

İstiñ aq-qarası anıqtalğanşa, Nemcovtıñ ölimin Putinnen köru qate dep jazuda orıs basılımdarı. Äytkenmen de, "Nemcovtı kim attı? Nege attı?" degen swraq Reseyde kün tärtibinen tüsip qalmaytın şığar. «Vesna» marşı qaralı jiınğa wlasatın boldı.

P.S. Boris Nemcov qazirgi Reseydegi demokratiyalıq közqarasınan tanbay kele jatqan sanaulı sayasatkerdiñ biri bolatın. Ol eldegi däl qazirgi jağdayğa qatıstı sındarlı pikirin ünemi jariyalap, orıs biligin Putinsiz körgisi keletinin jasırmaytın edi. Orıs qoğamınıñ qwrdımğa bet alğanın biik minberden aşıq ayta bilgen közi aşıq adam retinde de Nemcov atqaruşı biliktiñ qıspağına wşırap otırdı...

Elu bes jastağı oppozicionerdiñ ölimi bügingi Reseydegi sayasi diktaturanıñ şarıqtau şegine jetkenin körsetip qana qoymay, joğarğı elita arasında qılmıstıq äreketterdiñ beleñ alğanın da bayqatsa kerek...

Abai. kz

0 pikir