Särsenbi, 23 Qazan 2019
Qaza 6091 0 pikir 30 Säuir, 2015 sağat 16:43

BATIRHAN KEÑSAYĞA JERLENEDİ

28 säuirde qaytıs bolğan änşi Batırhan Şükenovpen qoştasu räsimi 1 mamır küni sağat tañğı 10-da Almatıda – Qazaqtıñ Jambıl atındağı Memlekettik filarmoniyasında ötedi (Qaldayaqov köşesi, 35-üy).

Äuelde halıqtıñ süyikti änşisimen qoştasu räsimi Respublika sarayında nemese M.Äuezov atındağı drama teatrında ötui mümkin delingen bolatın. Alayda Respublika sarayınıñ işi mwnda is-şara ötkizuge qolaysızdau bolıp şıqtı, al teatrdağı räsim turalı sözdi Almatı qalalıq mädeniet basqarması «onday jospar bolğan emes» dep, joqqa şığardı. Söytip, änşimen qoştasu Jambıl atındağı Memlekettik filarmoniyada ötetin bop şeşildi. Filarmoniya ğimaratınıñ esigi kelem deuşilerge tañğı 8.30-dan bastap aşıq boladı.

Marqwmnıñ denesin Mäskeuden änşiniñ bauırı Bauırjan Şükenov 30 säuir küni alıp keldi. «Mäskeudiñ dostarımızdıñ jäne Qazaqstandağı Reseydegi konsuldığı ökilderiniñ kömegimen bauırımnıñ süyegin alıp, elge wşıp kele jatırmız. Anamızğa balasınıñ süyegin alıp keluge mäjbür bolamın dep eşqaşan oylamappın. Batır ünemi anamızdıñ densaulığın oylaytın, jüreginiñ auırmauın qadağalauğa tırısatın. Söytip jürip öz jüregin saqtay almağanı qanday ökinişti... Botkin auruhanasında şağın ğana qoştasu räsimi boldı, Mäskeudegi jaqın aralasqan dostarı, äriptesteri keldi» dep jazdı Bauırjan feysbuktegi jeke paraqşasında.

Batırhan Şükenov 1962 jılı 18 mamırda Qızılordada düniege kelgen. Öner jolın ol belgili änşi Roza Rımbaevanıñ saksofonşısı retinde bastağan. 1988 jılı özi qwrğan «A'Studio» tobınıñ frontmenti boldı, al bir jıldan keyin «Djuliya» dep atalatın hit äni şıqtı. Tanımaldılıq bwl topqa Alla Pugaçevamen birge «Rojdestvenskie vstreçi» keşine qatısqannan keyin keldi. Batırhan «A'Studio» tobınan 2000 jılı ketip, jeke öner körsete bastadı. Osıdan eki bwrın ol Mäskeudegi päterinde jürek talmasınan qaytıs boldı.

29 säuir küni Almatıdağı Respublika sarayı men «Arman» kinoteatrınıñ aldına jinalğan köpşilik Batırhan Şükenovtiñ suretteri men än mätinderi jazılğan paraqtardı wstap, «Otan Ana», «Sağım dünie», «Tvoi şagi», «Nelyubimaya», «Djuliya», «Dojd'», «Soldat lyubvi» sekildi änderdi şırqadı. Onıñ Saray aldına qoyılğan ülken fotosuretiniñ aldı alqızıl gülge toldı. Batırhandı eske aluğa şamamen 2 mıñday adam jinaldı.

«Batırhanmen qoştasu 1 mamırğa belgilengeni ras, alayda jerleu räsimi 2 mamırda boluı mümkin – deydi Qazaqtıñ Jambıl atındağı Memlekettik filarmoniyasınıñ bas äkimşisi Lev Meyzeroviç. – Tuısqandarınıñ şeşimi solay». 

Batırhan Şükenovtiñ mäyiti Keñzay ziratına qoyılmaq.

 

Abai.kz

0 pikir