Särsenbi, 23 Qazan 2019
Qwyılsın köşiñ 4454 0 pikir 30 Qırküyek, 2015 sağat 22:28

QANDASTIÑ MWÑI: DOLLARMEN BİRGE PARA DA ÖSE BASTADI

El bolıp etek jidıq, eñseñimizdi köterdik,  täuelsiz memleket bolıp, tört qwbılamızdı tügendey bastağanda alısta qalğan ağayınğa, qaraköz qandastarğa köz saldıq.

Olardı tarihi otanı, memleketi qazaq eline oraluğa şaqırdıq. Qwrıltay aştıq, bar qazaqtıñ basın qostıq. Täuelsizdik alğanda şettegi ağayınnıñ quanbağanı qalmadı. Közine jas alıp, qazaq jerine, atamekenine ağıldı. Sodan beri qanşama aylar aunap, jıldar jıljıdı. Dese de, äli de el bolıp köşip keludiñ zañdıq negizderi bir izge tüse qoyğan joq. Qazir Parlamentte eldiñ damuına, kemeldenuine jol aşar keremet jaña zañdar, qaulılar qabıldanıp jatır. Biraq, nege ekeni belgisiz köşi-qon mäselesine kelgende aqsay beremiz. Mwnday sätte «dağdarısqa baylanıstı  oy örisimiz de dağdarıp bara jatqan joq pa?» degen saual kökeyge kepteledi. Şette qalğan qazaqtıñ köşip kelui, konıstanuı mäselesinde jeke bas qwjattardı turalau – qiyamet-qayım. Bwl mäsele ülken-ülken minberlerde aytılıp ta, jazılıp ta jür. Endeşe, ol nege dwrıs şeşimin tappaydı? Mısalı, bizdiñ memleket Qıtaydan kelgen qandastan «sottalmağan» degen qwjat talap etedi. Bwl mäsele jayında Auıt Mwqibek ağamız talay märte mäsele köterip, Parlament, minstrlikterge hat jazıp, Qıtay memleketi sottalğan azamatqa qızıl pasport bermeytinin, sottalğandardı şekaradan şığarmaytının däleldep, tüsindirip-aq jür. «Ayğaylay, ayğaylay qasqırdan da wyat boldı» demekşi qasqırdan wyalar  küyge jettik.

Elbasımız Nwrswltan Nazarbaevtiñ özi «şet eldegi qazaqtardı qwşaq jaya qarsı alamız» dep jatqan twsta, «bwl kimniñ tarapınan jasalıp jatqan kedergi, bwl mäselege kim twzaq qwrıp twr?». Belgisiz. Belgilisi Qazaqstan azamattığına qwjat tapsıru tegin bola twra, qwjat ötkizudi sonşama qiındatıp, aradağı deldaldardıñ ayın oñınan tuğızıp qoyğan. Sol deldaldıñ köleñkesinde arandarı aşılğan bastıqsımaqtar otır. Bir jinalısta Swltanäli Balğabaev mırza men işki ister mamandarı  oralmandar jayın talqılap otırğan edi. Olar: «Oralmandar zañ bilmeydi. Öz qwqıqtarın qorğay almaydı. Qazir zañ boyınşa qwjattardıñ bäri dwrıs qabıldanıp jatır» dep jatqanda men keşe ğana bir deldal arqılı jwmısımdı bitirgenimdi aytıp, dälel keltirgen edim, olar sasqalaqtap qaldı. Mwnı nege aytıp otırmın? Qazirgi tañda barlıq şarua aqşağa tirelip twr. Mwnday sayasat kimderdiñ qolımen jasalıp otır? Mwnıñ artında kimder twr? Bwl swraqtarğa jauap tabatın kez keldi. Jolın tapqan qandastar «sottalmağanı» turalı anıqtama äkelse, onı «auıldan alğansıñ» degen sekildi türli sıltaumen jaratpay tastaydı. Ol qandas ne isteydi, qaytadan Qıtayğa şapqılasa da ol qwjattı ala alması belgili. Amalsızdan älgi anıqtamanı jaratpay tastağan şeneunikke deldal arqılı para beredi. Paranıñ küşi keremet qoy, manağı şeneunik äp sätte bäri dwrıs dep qolın bıttitıp qoyıp bere saladı. Ortadağı halıqtıñ auzı küyip, opıq jeydi. Sonda da olar Otanğa degen süyispenşilikpen bar mümkindikti paydalanıp, azamattıq aluğa, tım qwrısa «ıqtiyar hatqa» qol jetkizuge tırısıp bağuda. Al, şeneunikter kün sanap, şarıqtağan dollar sekildi paranıñ da qwnın ösirip, bilgenderin istep jatır. Osındayda «bes mıñ teñge para alğan qızmetkerdi wstap alıp, jegenin jelkesinen şığarğış agenttik qayda jür?» dep oylaymın.

Maqsat Qanağat

Abai.kz

 

 

 

 

 

 

0 pikir