Seysenbi, 19 Qaraşa 2019
Wjdan 4820 0 pikir 25 Qaraşa, 2015 sağat 14:02

QOÑIROV QAZAQTIÑ BETİNE QALAY QARAYDI?

LENINNİÑ  eskertkişin ornatudı közdegen KOMMUNISTER  endi ORTAQ VALYUTANI JAQTAUDA!..


Osı qızıl kommunisterge senip jürgenderde de es joq. Äytpese, tört jıl bwrın  saylauda dauıs berer me edi?!. Olar elimiz qızıl kommunister basqarğan qızıl imperiyanıñ qandı şeñgelinen qwtılıp, Täuelsizdik alğanımızğa  şirek ğasır ötse de, ormanğa qarap wluın qoyar emes…

Ötkende ğana Qazaqstan halıqtıq ​kommunistik partiyası (QHKP) bol'şevikter kösemi  Leninniñ Astanadağı «Gorkomhoz» mekemesinde jatqan eskertkişine Astanadan orın berudi swrap, qala äkimine jılap-eñirep hat jazdı.

QHKP Astana qalalıq bölimşesiniñ hatşısı Marat Äubäkirovtiñ bar qayğısı –  «kommunister gül şoğın qoyatın jer joq» eken…  Au, sonda, elordadağı el üşin ömirin qiğan erlerimizdiñ eskertkişteri olarğa böten be? Keşe ğana 550 jıldığın bükil elimiz bolıp toylağan Qazaq memleketiniñ  negizin saluşı Kerey men Jänibek handardıñ eskertkişi  şe? Esildiñ jağasında erligin paş etip, qılışı jaltırap  twrğan qaharlı Kenesarını aytsaq, şoşıp keter, wlı Abayımızdıñ eskertkişi şe? Bwlar qızıl kommunisterge ögey twlğalar ma?..

“Ändijanda bir äpkem bar, bwdan da ötken soraqı”-degendey, bwlardıñ qarsılastarı,  tağı bir kommunister, üş ay bwrın jabılıp qalğan oppoziciyalıq Qazaqstannıñ Kommunistik partiyasınıñ da (QKP), oñıp twrğanı şamalı eken. Azattıq radiosına bergen jauabında QKP Astana bölimşesiniñ törağası Nwrlan Äuesbaev ta özderiniñ  Leninniñ eskertkişin Astanağa ornatu üşin äkimdikke talay ret hat jazğanın aytadı.  Biraq  onıñ bärine teris jauap alğasın, “teris qarap jatıp alğanın” aytıp zarlap otır.

Keñsesinde Leninniñ bir emes… üş byustin qwşaqtap, täu etip jürgen oppoziciyalıq kommunist Nwrlan Äuesbaev ta,  Leninge elordadan orın izdep jürgen “halıqtıq” kommunist  Marat Äubäkirov te,  Alaş kösemi Älihan Bökeyhan turalı bile me eken?!.

2012 jılı  qazan ayında Alaştıñ 95 jıldığın elimiz boyınşa atap ötken  “Aq jol” partiyası   
Parlamentte Älihan Bökeyhan bastağan Alaş arıstarına eskertkiş ornatu turalı bastama köterip, Ükimetke deputattıq saual joldağan edi.  Al biılğı 14 qazanda   Ükimetke Älihan Bökeyhannıñ 150 jıldığın layıqtı deñgeyde ötkizu jönindegi Memlekettik komissiya qwru qajettigi turalı deputattıq saual joldağanı belgili.

Keşe ğana, 18 qaraşada  Altı Alaşqa  quanıştı habar – Alaş kösemi Älihan Bökeyhannıñ 150 jıldığın älem toylaytını  turalı YUNESKO-nıñ  şeşimi şıqtı!

Al osı bükil qazaq quanıp, bir-birin qwttıqtap jatqan süyinişti habarğa  Leninnen basqanı bilmeytin bizdiñ kommunister  quana qoydı ma eken?

Qazir  eldiñ bäri “Aqjoldıñ” Astanada Älihan Bökeyhannıñ eskertkişin twrğızu turalı  bastamasın qoldauda.   Leninniñ eskertkişin emes!..

Bastauında Lenin twrğan  qızıl imperiya Keñes  Odağınıñ  ömir sürgen 70 jılındağı  qandı qasiretter, 30 jıldardağı qazaqtıñ jartısın ädeyi qasköylikpen  wyımdastırğan aşarşılıqta qırğınğa wşıratu, 37-jıldardağı zwlmatta qazaqtıñ bar asılınıñ atıluın tarih  qalay wmıtadı!   20-jıldardağı qızıl qırğında qazaqtıñ qınaday qırıluındağı  Leninniñ bastı rölin bası barlar wmıtpaydı, kommunister wmıtqanmen…  Atamekenin tastap, jan sauğalap, Qıtayğa  josıla köşken qalıñ qazaqtı Qızıl Armiya qızıl qanğa böktirgeni belgili. Öytkeni, bol'şevikter kösemi Vladimir Leninniñ  “Şekaradan ötkizbeñder… biraq  qaytarmañdar da” degen bwyrıq bergen hatı kezinde baspasözde jariyalanğan.

Sondıqtan da, 2011 jılı “Aq jol” partiyasınıñ törağası Azat Peruaşev   otızınşı jıldardağı zobalañ aştıq  pen zwlmat repressiyağa  kommunistik partiya jauap berui kerek dep mälimdeme jasağan bolatın…

 Al endi keşe kommunisterden saylanğan Mäjilis deputatı, Leninniñ nağız qızıl jalaulı qorğauşısı Ayqın Oyratwlı Qoñırov Resey Dumasınıñ deputatı Leonid Sluckiydiñ “Ortaq valyutağa köşu kerek” degenine alaqaylap quanıp,  qos qolın köterip kosıla ketti.  “Ekonomikalıq odaqta bolğan soñ ortaq valyutanıñ boluı da jaman emes”-dep, bılq etpey, bılş etkizdi. Tipti, äriptesteri, Mäjilis deputattarı, “Aq jol” partiyası törağası Azat Peruaşevtıñ: “Teñge -Täuelsizdigimizdiñ bastı belgisi! Teñgeden ayrılu – Täuelsizdikke qater! ” dep, bir-aq keskeni de, nwrotandıq Mäulen Äşimbaevtıñ: “Bizdiñ bilik bwl mäseleni eşbir qarastırıp otırğan joq” – dep, eskertui de,  kommunist Qoñırovtı oylandıra qoyğan joq.

Sonda Mäjiliste 4 jıl otırıp,  ne aytarın bilmegesin “Nandı 300 teñgege kötereyik” dep, atın şığarğan kommunist Qoñırovtıñ oyı nede?  Bwl bügingidey dürbeleñi küşeyip twrğan kezeñde keşegi Keñes Odağın añsaudan arılmağandardıñ otına may qwyu emes pe? 8 jıl boyı Astanada otırıp, Mäskeudiñ gazetin basıp şığarğan  kommunist deputattıñ  sanası äli reseylik basılımdardıñ ıqpalınan şığa almay jür me? Äne, jat eldiñ baspasöziniñ  jasap jatqan äseri…

Täuelsizdiktiñ bastı tirekteriniñ biri – töl teñgemizdi tärk etuge şaqırıp otırğan Mäjilis deputatınıñ qauipti äreketine qwziretti orındarımız ne demek?

“Ortaq valyuta  kerek” dep, egemen el erkine qarsı şığıp, teris oyın  ayqın bildirip otırğan Ayqın Qoñırovtı söyletip otırğan  qanday küş?

Qazaq teñgesine qarsı şıqqan  Ayqın Qoñırov qazaqtıñ betine qalay qaraydı?  Täuelsiz Qazaqstannıñ Parlamentinde otırıp, Resey Duması deputatınşa oylaytın Ayqın Oyratwlınıñ ayqın  oyrattıq  oyı jauapsız qalmauı tiis!

Bizden basqa elde bolsa, bwnday Qoñırov siyaqtı wlttıq müddege qarsı şıqqan deputattardı esekke teris mingizip, aydap şığar edi…

Äli künge deyin tüsinde Qızıl Alañdı körip, Kreml'diñ qoñırauımen oyanıp, monşağa da qızıl galstukpen baratın  qızıl bol'şevikter bizdiñ Täuelsizdik alğanımızğa 24 jıl bolğanın bile me eken?!.

Qazıbek ISA, “QAZAQ ÜNİ”  gazeti

Tüpnwsqadağı taqırıp: Qazaq teñgesine qarsı Qoñırov qazaqtıñ betine qalay qaraydı.

 

0 pikir