Düysenbi, 18 Qaraşa 2019
Öziñe sen 4542 0 pikir 26 Qaraşa, 2015 sağat 12:26

ÜKİMET KÄSİPORINDARDI QOLMEN BASQARUDA

Qazaqstan Ükimeti dağdarısqa qarsı birneşe bağıttarda jemisti jwmıs jürgizip keledi dep jazadı bizdiñ elektrondı poştamızğa maqala joldap twratın twraqtı avtorımız Ämirlan Älimjan mırza. Sonıñ biri – öndiris köleminiñ tömendeuine jäne jwmısşılardı qısqartuğa jol bermeu.

Investiciyalar jäne damu ministrligi mwnday mäseleni oñ şeşu üşin, önerkäsiptik käsiporındardı qolmen basqaru bağıtında jwmıs jürgizude. Bwl turalı 23 qaraşadağı Ükimettiñ selektorlıq otırısında Investiciyalar jäne damu ministri Äset Isekeşev habarladı. Ministr Ükimettiñ dağdarısqa qarsı is-şaralar josparın qabıldap, sonıñ nätijesinde elimizdegi 200-den astam iri käsiporındar memlekettik qoldauğa ie bolğanın ayttı.

Birinşiden, qara metall sınıqtarınıñ jäne qwramında altını bar şikizattıñ eksportına salınğan tıyım 2015 jıldıñ soñına deyin  wzartıldı. Ekinşiden, «Qazhrom» transwlttıq kompaniyası» AQ-ı, «Taraz metallurgiya zauıtı» JŞS-i, «Öskemen titan-magniy kombinatı» AQ-ı, «Temirtau elektrometallurgiyalıq kombinatı» AQ-ı, «Tau-Ken Temir» JŞS-i siyaqtı käsiporındar üşin elektr quatın jäne onı jetkizetin qızmet türlerine jeñildetilgen tarifter wsınılğan. Üşinşiden, «Arselor Mittal Temirtau», «Qazaqstan alyuminiyi», «Sokolov-Sarıbay ken-bayıtu kombinatı», «Temirtau elektrometallurgiyalıq kombinatı», «Bapy Mining»,  «KSP Steel» siyaqtı iri käsiporındarğa 2015 jıl boyına magistral'dıq temirjol jelisi qızmetiniñ tarifterine tömendetilgen koefficientter berilgen.

«Şağın jäne orta käsiporındarğa iri käsiporındardıñ tapsırısı arqılı qoldau jasaldı. Sonıñ nätijesinde şağın jäne orta käsiporındar otandıq iri käsiporındarmen jalpı qwnı 1,3 trln. teñgeni qwraytın 23 mıñnan astam kelisim-şart jasadı. Ağımdağı jıldıñ 10 ayınıñ qorıtındıları boyınşa, önerkäsiptik öndiris kölemi 13 payızğa kemidi. Bwğan tau-ken önerkäsibi öndirisiniñ 22 payızğa tömendeui äser etti. Biraq önimderdi qayta öñdeu önerkäsibindegi ösim 0,5 payızdı qwradı» dep atap körsetti Äset Isekeşev. Investiciyalar jäne damu ministriniñ payımdauınşa, joğarıdağı ahualğa sırtqı faktorlardıñ äseri zor. Mäselen, köptegen elderde qayta öñdeu önerkäsibi öte qiın jağdaydı bastan keşude. Ministr öz bayandamasında Koreya, Norvegiya, Finlyandiya, Braziliya jäne Euraziyalıq ekonomikalıq odaqtağı äriptesimiz Belarus' Respublikasın (bwl eldegi körsetkiş 5 payızğa kemigen) mısalğa keltirdi.

Qazaqstandağı dağdarısqa qarsı is-şaralardıñ basqa elderden artıqşılığı bar. Mäselen, industriyalandırudıñ birinşi besjıldığında basımdıq berilgen salalar qazir jağımdı röl atqaruda. Mwnday salalarğa tüsti metallurgiya, himiya önerkäsibi jäne qwrılıs materildarı öndirisin jatqızuğa boladı. Investiciyalar jäne damu ministrligi taratqan mälimetke säykes, şağın jäne orta käsiporındarğa körsetilgen qoldau nätijesinde 10 ayda armatura öndiru 40 payızğa, cement şığaru – 14 payızğa, kaustikalıq soda öndiru – 34 payızğa, ammiak selitrası – 13,4 payızğa ösken. Bwğan qosa, keuekti titan öndirisi 2,8 esege, titan qorıtpası men qwyması 23 payızğa, rafinirlengen mıs – 20 payızğa, ferroqwymalar men glinozem – 2 payızğa, kümis 30 payızğa wlğayğan.

 

Ämirlan Älimjan

Abai.kz      

 

0 pikir