Särsenbi, 13 Qaraşa 2019
Osı ğoy endi... 5270 0 pikir 27 Qaraşa, 2015 sağat 11:41

TÜRKIYA – RF. ORISTİLDİ BAQ OYBAYLAP JATIR

Resey wşağınıñ atıp tüsiriluine baylanıstı dau-damaydıñ erekşe uşığıp twrğan jayı bar. Atalğan oqiğağa baylanıstı bizdiñ orıstildi baspasöz qaşanğı ädetimen körşimizdi aşıqtan-aşıq qoldap otır. Türik jağınıñ «biz ol wşaqqa «äue keñistigimizdi bwzdıñdar» dep bir emes, on ret eskerttik» degen uäjine qwlaq aspastan körşimizdiñ bir jaqtı aqparattarına ğana süyenude. «Ne sebepti orıstardiki dwrıs ta, türikterdiki bwrıs?» degen swraqqa jauap izdep, bas qatırıp jatqan eşkim de joq. Orıstardiki dwrıs, bitti şarua. Onıñ üstine biligimizdiñ bir bwtağın basqarıp otırğan lauazımdı adamnıñ auzınan şıqqan wşqarı pikir de olardıñ qoltığına su bürikkendey boldı (Senator Toqaevtıñ äleumettik jelidegi pikirin aytadı. – red. http://www.inform.kz/rus/article/2842905). 

Sodan türikterdi jau sanap, Reseydiñ sayasatına şäk keltirmeytin,  özgelerdikin qate sanaytın oybayğa bergisiz ayqay bastalıp ketsin. Bir ğajabı, ünemi ötirik aytatın, eş uaqıtta özderin kinäli sezinbeytin körşimizdi äulie sanaytın küyge jettik. Küni keşe ğana Egipette qwlağan wşaqtı «lañkester joydı» degen Batıs mamandarınıñ pikirine qwlaq aspağan, Ukrainanıñ Qırımın tartıp alğandığına qaramastan, qanşama bwltartpas faktiler keltirse de «onda soğısıp jatqan Donbasta orıs äskeri joq» dep büyrekten sıyraq şığaratın, Gruziyağa agressiya jasap, anau Pridnestroviya, Qarabaq sekildi mazasız aymaqtarğa dem berip, separatistik piğıldı qozdırıp otırğan eldiñ sözine senetinderdiñ bwl tirligi añqaulıq pa, älde arandatuşılıq pa? Bizdiñşe, soñğısı sekildi. Al Reseydiñ osında taraytın bwqaralıq aqparat qwraldarınan, qala berdi özimizdegi solardıñ aytqanımen jüretin, özderin wlı Reseydiñ bir bölşegi sanaytın orıstildi baspasözden sıñarjaq aqparat alatın  bizdiñ qalıñ oqırmannnıñ jağdayına tek qana janıñ aşidı.  

Mwnıñ bäri bizdiñ biliktiñ özimizdiñ aqparattıq keñistikti qorğauğa kelgendegi därmensizdigin, änşeyinde aytıla beretin köpvektorlıq sayasatqa sızat tüskendigin ayqın añğartadı. Äytpese, küni keşe ğana anau «Astana», «KTK» sekildi telearnalardıñ  «lañkeserge qarsı küresemiz» degen jeleumen Siriya jwrtınıñ biraz böligin bombalauğa bara jatqan, sol jolda qaza tapqan Su-24 wşağınıñ komandirin «Oybay, ol özimizdiñ Şığıs Qazaqstannan eken» dep jer-kökke sıyğızbay maqtap, onıñ jasınan-aq asqan erjürek, asqan aqıldı, asqan kemeñger ekendigin auzınıñ suı qwray maqtağandığın qalay tüsinuge boladı? Ol elimizge qanday eñbek siñiripti? Osında tuıp, osında mektep bitirgendigi üşin ğana töbemizge köteruge tiispiz be? Olay bolsa, mwmkin bizde düniege kelgen ana Jirinovskiy sekildilerge de köşe atın berip, eskertkiş ornatuğa tiis şığarmız?

Bir ökiniştisi, bizdiñ osınday solqıldaqtığımızdı, beyğamdığımız ben parıqsızdığımızdı jaqsı bilgendikten be, osınday arandatuşılıqtı jergilikti baspasöz de qoldap äketkendigin qaytersiz? Älgi oqiğadan soñ, ile-şala osındağı byudjetten qıruar qarjı alıp, qağanağı qarq, sağanağı sarq bolıp otırğan bir orıstildi gazet «Wşaqtı atıp tüsirdi, al odaqtarımız ünsiz» degen maqala basıp, aydı aspanğa bir-aq şığardı. (Orısşası: «Samolet sbit — soyuzniki molçat»). Gazettiñ piğılı birden belgili. «Au, biz bir odaqta emespiz be, Reseydi nege qoldamaysıñdar?»  degen jımısqı oy. Sirä, mwnı jazğan jurnalist özderin Reseydiñ jerinde otırmız dep oylasa kerek. Jurnalist şaması älgi maqalasına  «Jon arqadan soqqı» («Udar v spinu») degen Putinniñ pikirin  basşılıqqa alğan  körinedi. Osınıñ özi-aq köp jayttan habar bergendey.   Bwdan arı qaray, tipti, de soraqı. Gazet Qazaqstan Respublikası advokattar odağınıñ vice-prezidenti Tahir Berdimbetov degennen osı mäselege baylanıstı pikirin swrağan. Al zañgerimiz bolsa, birden Resey jağına şığıp, bwdan keyin Türkiyağa auır künder tuatındığın. Resey sondağı sodırlar sanalatın Kürdistanğa belsendi türde qoldau bildirui mümkin degen pikirin aşıq aytadı. Onımen de qoymay, endi bwdan bılay Türkiyağa eş uaqıtta barmaytındığın, mwnıñ özi principti mäsele ekendigin alaqaylap  jetkizedi. Sonda deymiz-au, özgesi-özge, jön biledi, zañ biledi, kinäsizdik prezumpciyası sekildi wğımnan habardar zañgerimizdiñ mäseleniñ anıq-qanığına jetpesten körşi elimizdiñ soyılın soğuın qalay tüsindik?

Mwratbek Däurenwlı

Qostanay.

Abai.kz

0 pikir