Seysenbi, 25 Aqpan 2020
Jalqı swraq 2938 0 pikir 3 Şilde, 2015 sağat 15:13

TQB KÖZBOYAUŞILIQPEN KÖGERE ME?

Halıqqa qoljetimdi twrğın-üyge baylanıstı memlekettiñ sayasatı – qaytse de jeñildik jasau, bankiden jeñildetilgen ösimmen nesie berip, baspanağa qol jetkizu dep maqtauın kelistirip-aq aytıp jatamız. Sol üşin aşılğan «Twrğın-üy qwrılısı banki» (TQB) de bar. Oğan alatın päteriñe qajetti somanıñ jartısın jinasañ boldı, qalğan jartısın qosıp nesie beredi, sosın twrğın-üy satıp alıp, şalqı da otır deymiz.

«Baqsaq baqa eken», bwl TQB-nıñ da halıqtı qarq qılıp jatqanı şamalı körinedi. Onı Mäjilis deputatı Twrsınbek Ömirzaqov äşkerelep, Prem'er-ministr Kärim Mäsimovtıñ atına saual joldap: «ökimettiñ järdem beredi degen bankısınıñ siqın qarañız, mwnıñ jekemenşik kommerciyalıq bankterden eş ayırmaşılığı joq eken ğoy», - dep jar saldı.     

Mäselede mınada bolıp şıqtı: klient satıp almaq üyiniñ jartısın TQB-da jinaqtap, endi sonıñ eki ese kölemindegi nesie alıp, közdegen üyimdi alayın dep baradı ğoy. Jinağan qorı 50 mıñ AQŞ dollarınday bolsa, bank oğan 100 mıñ dollar beruge tiisti.  

Söytse... TQB jinağan qarajatıña qosıp 50 mıñ dollar bermeydi eken de... birden öziniñ 100 mıñ dolların wstatatın körinedi. Nege deysiz ğoy? Öytkeni, 100 mıñ dollarğa esepteletin banktıñ ösimpwlı 50 mıñ dollardan eki ese köp qoy. Söytip, 100 mıñ dollar üşin jıldıq 7,5 payızdı sanap berip otıratın körinesiz.

Ou, özimniñ jinağan 50 mıñ dollarım qayda ketti deysiz ğoy siz. Saspañız. Onı bank sizdiñ atıñızğa depozit aşıp, salıp qoyatın körinedi. Banktıñ oğan beretin jıldıq ösimi köp bolsa 3 payızdıñ töñiregi ğana. Al özi sizden 100 mıñ dollar üşin jıldıq 7,5 payızdıq ösimpwl aladı. Bwl şamamen 7500 dollar bolsa, sizge beretin 50 mıñ dollardıñ ösimi 1500 dollardıñ töñireginde ğana. Ayırmaşılığı 6000 dollar... Ösimpwlmen öndirşegiñ üzilgir bank halıqtı östip qan qaqsatadı eken. Mwnı kim bilgen, nesie beredi dep mäz bolıp jüremiz ğoy.   

Bwl bwl ma, TQB klientke nesie bergende özderiniñ atqaratın esepşot aşu, ötinişti qarau, jıljımaytın mülikti saqtandıru, nesieni wyımdastıru, tipti esepşottağı aqşanı qolma-qol aqşağa aynaldıru siyaqtı tolıp jatqan qızmetteri üşin de qosımşa aqşa aladı eken. 

Mine, halıqqa janı aşitın boldı dep ökimettiñ aşıp bergen bankınıñ siqı osınday. Tolıp jatqan «Jeñil», «Bastau» degen bağdarlamaları boyınşa alğan 100 mıñ dollar nesieñizdiñ üstine 6,2 mln. artıq aqşa töleydi ekensiz. Bwnıñ basqa bankterdikinen ayırmaşılığı şamalı ğana.

Osı mäselelerdiñ bärin Kärim Mäsimovke jazğan deputat mwnday közboyauşı jeñildikterden arılu joldarın tabıñız degen talap qoydı. Sodan birdeñe şıqsa igi.

 

Serik ELEU, sarapşı 

Abai.kz

 

0 pikir