Särsenbi, 23 Qazan 2019
Bizdiñ şeneunik 3464 0 pikir 22 Qırküyek, 2014 sağat 07:24

ÄKİMİMİZ QUIRŞAQ BOLIP KETTİ

 

                 ÄKİMİMİZ QUIRŞAQ BOLIP KETTİ

 

   Bwrınnan da bizdiñ oblıstıñ jaqsı atı şığıp jürgendigi şamalı edi. Jaqında tipti bükil jwrttıñ külkisine aynaldıq. Nwralı Säduaqasov degen täp-täuir basşımız bar edi. Üş jılğa juıq äkim bolğalı eşteñeni qırıp tastamasa da bireuden ilgeri bireuden keyin öñirimizdi özinşe bilep twrğan. Ärine, özge oblıstıñ äkimderimen salıstırğanda atı bäygeden ozıp keler dep eşkim de ümittenbeytin. Qayta kerisinşe, wlan-baytaq elimizdiñ  on tört oblıs, memlekettik mañızı erekşe eki qala äkiminiñ köş soñında jüretindigine tipti etimiz ölip te ketken. Söytsek...

    Söytsek, Nwralı Mwstafawlı öziniñ atı şıqqandığın jaman körmeytin sekildi. Ötkende, Qostanay qalasınıñ küni merekesinde Neke sarayın aşu saltanatında qazaq jastarına «Gor'ko!» dep ayqaylap aydı aspanğa bir-aq şığarıp edi. Onısı bükil elimizge tarap ketip, internettegi talay qırşañqılardıñ qattı qaljıñına wşırağan. Negizinen orısşıl ösken azamat qoy, keyin mwnday wyattı isterden aulaq bolar dep oylağanbız. Onımız beker eken. Jaqında bir suretşi oblıs basşısınıñ beynesin orıstıñ matreşkasınıñ işine ornalastırıp, mwrajaydağı arnayı suret körmesine qoyıp, öñirimizdi ülken bir külkige kömip tastağan. Suretşi oblıs äkimine özinşe jaqsı bir sıy jasadım dep oylasa kerek. Alayda äkimimizdi özge bir formada emes, däl osı matreşkege salıp qoyuı neni meñzeydi? Bwl özi orıstıñ wlttıq mwralarınıñ biri desek, qazaq wlığı şirenip twratın orın ba bwl? Älde, mwnıñ astarında biz bilmeytin tağı bir qwpiya bar ma? «Bwl ne mazaq? Dereu alıp tastañdar!» dep qaharına minbegendigine qarağanda, onıñ matreşkedegi beynesi özine qattı wnaytın sekildi. Älde,kim bilipti, äkim de pende emes pe, ataq-dañqın eñ bolmasa, osılayşa bir şığarsam degen aldamşı oydıñ şırmauınan şığa almadı ma eken.

    Aytpaqşı, ataq-dañqın asıru degennen şığadı, bizdiñ oblıstı basqarğan äkimder bwl «önerdi» erekşe meñgergen sıñaylı. Bir äkimimiz osı öñirde altı ay qıs bolsa da «endi kon'ki tebiñder» dep at şaptırım mwz sarayın salıp edi, ekinşisi şirkeu twrğızuğa qol wşın berdim dep pravoslav dininiñ qasietti äulieleriniñ qatarınan oyıp twrıp orın aldı. Al üşinşisiniñ istegeni mınau. Key-keyde bizdegi atqa minerlerdiñ oylağanı halıqtıñ qamı emes, qaytkende öz atımdı qaldıram degen özara bäseke me degen sezikti oy sanamızdı bilep alatını bar. Mwndayda atamız qazaqtıñ «Atıñ şıqpasa, jer örte» degen naqılı eske tüsedi. Biraq, qazir kim jerin örtetkizip qoyadı deysiñ, bäri de jekemenşiktiñ qolında. Mwnday ataq tım qımbatqa tüser.

 

P.S Eger tipti äkimiz atın şığarğısı kelse, ana Kulaginnen ülgi alsa qayter edi. Qaydağı bir matreşkege mazaq bolğanşa, attarı mwqım jwrtqa belgili äulielerdiñ janında twrğanğa ne jetsin. Uaqıtşa bolsa da. «Qwlasañ, nardan qwla» degendey.

Mwratbek Däurenwlı.

Qostanay oblısı.

Abai.kz

0 pikir