Düysenbi, 21 Qazan 2019
Qoğam 5231 0 pikir 31 Şilde, 2014 sağat 14:50

Ädiletsiz şeşimniñ arjağında sayasi tapsırma bar siyaqtı

 

«Añız adam» jurnalınıñ säuir ayındağı Adol'f Gitlerge arnalğan sanınan bastalğan daudıñ soñı sot isine jalğasıp, basılımnıñ bas redaktorınıñ üstinen üş birdey is qozğalğan edi. Soñğı sot otırısı 30 şilde küni ayaq astınan ötip, sud'ya sot şeşimin jariya etti.

Alayda, «Jwldızdar otbası», «Añız adam» jurnaldarınıñ qwrıltayşısı äri bas redaktorı Jarılqap Qalıbay abai.kz ke bergen swhbatında sot şeşimimen kelispeytinin äri bwl istiñ sayasi astarı bar ekenin aytadı.  

Jarılqap Qalıbay (surette), «Jwldızdar otbası», «Añız adam» jurnaldarınıñ qwrıltayşısı äri bas redaktorı:

- Men sot şeşimimen kelispeymin. Qazir «Añız adam» jurnalınıñ 100-nşi sanı dayındalıp jatır. Jurnaldıñ osı jüz sanında da sot bizdi ayıptı dep tapqan äkimşilik qwqıq bwzuşılıq kodeksiniñ 334 babı 2 tarmağın bwzatın bir söylem de joq.

Sot şeşimi qortındısınıñ özi qarama-qayşılıqqa tolı. Mısalı, qortındınıñ birinşi böliminde Nağaşıbay Esmırzaevtıñ «Gitler faşist emes» degen maqalasında ekstremizmdi aqtau belgileri bar deydi de, ekinşi böliminde redakciyadan qoyılğan swraqtarğa Nağaşıbay Esmırzaevtıñ «Gitler faşist emes» jäne Mırzağali Hasenniñ «Mayn kampfta köp närse dwrıs jazılğan»  taqırıbımen berilgen jauabında ekstremizmdi aqtau belgileri boluı mümkin deydi. Minekey, birinşi bölimde «bar» dese, ekinşisinde «mümkin» deydi. Jäne sot saualnama men maqalanıñ ne ekenin ajıratpağan. Birese «maqala» deydi, endi birde «redakciyadan qoyılğan swraqtar» deydi. YAğni, saraptama dwrıs jasalmağan. Saraptamanı qayta jasatudı talap etip edik, olar bwdan bas tarttı. Sottıñ ekiwştı düdämal saraptamağa süyenip, jurnaldı sottauı – zañsız.

Ekinşi düniejüzilik soğıs jäne Gitlerge arnalğan jurnaldıñ sanı 52 betten twradı. Al, sot jurnaldıñ bir betin ğana alıp, bizge ükim şığarıp otır.

Bizde ädildik joq, ädil sot joq. Bizdegi sot memlekettik maşinanıñ bir tetigi.

Surette: Sud'ya Äset Boranbaev. azattyq.org

Sottıñ jazba qortındısı qolıma tigen soñ, qalalıq sotqa şağımdanamın. Qalalıq sottıñ qanday şeşim şığaratının bilmeymin, biraq, osığan deyin ötken üş sotta da meni ayıptı dep ädiletsiz şeşim şığarğandarına qarağanda, joğarıdan bir nwsqau bar siyaqtı: ol – sayasi tapsırma şaması.

Joğarı jaqta otırğan bir jigit kezinde menimen äriptes bolğan. Ekeumiz de oqıtuşı boldıq. Aralasıp jürdik. Qazir ol öte ülken qızmette. Sol jigit «Jwldızdar otbası», «Añız adam» jurnaldarı dürildep twrğan kezde, osıdan eki jıl bwrın mağan kelip, wsınıs ayttı: «Jäke, eki jurnaldı menimen bölis. Meni qwrıltayşınıñ biri etip qos» dedi. Bwl wsınıstan men bas tarttım. Ol toğız aydan kelip, tağı ayttı. Men jäne bas tarttım. Sodan keyin ol mağan jauığıp ketti. Däl osı sekildi joğarğı bilikte baspasöz salasına bas-köz bolıp otırğan adamdar qosımşa äreket jasap jatqanğa wqsaydı. Ärine, qolımda dälel-däyek joq, biraq, istiñ qisını soğan sayadı. Küdigim bar.

 Mine, osınday närseler twrğan kezde ädildikke jetuim qiın. Biraq men talmay kürese beremin.

Abai.kz

0 pikir