Särsenbi, 23 Qazan 2019
Alaşorda 5911 0 pikir 31 Şilde, 2014 sağat 15:22

Twrsın Jwrtbay. «BİZ NEGE ORIS DRAMATURGTERİNEN ÜLGİ ALMAYMIZ?» (jalğası)

5

Stalin ölip, Beriya atılğannan keyin jaña sayasi bağıt pen közqarastardı ekşeu maqsatında wyımdastırılğan SSSR Jazuşılar Odağınıñ HİU plenumınıñ qorıtındılarına oray 1953 jılı 16-qaraşada Qazaqstan jazuşılarınıñ qalalıq mäjilisi ötti. Bwl mäjilistiñ tınısı bwrınğı janıqqan äşkereleulerden köri şığarmaşılıq taldau bağıtına qaray oyıstı.

Bwl twsta M.Äuezov Mäskeu universitetindegi däristeriniñ arasındağı tınıs sätinde Almatığa kelip, türli şaralarğa qatısuğa mümkindik aldı. Odaqtıñ jaña törağası Ğ.Mwstafin bayandama jasadı, jarıssözdiñ alğaşqı kezegi M.Äuezovke berildi. Jappay sayasi-ideologiyalıq jazalau sayasatınıñ tolas tartqanın jäne qanday da erkindik tınısınıñ aşıluın ünsiz dämetken, bismilläsin «halıqtardıñ äkesi» Stalinnen bastaytın şığarmaşılıq odaqtıñ ziyalılarınıñ söyleu mäneri özgere bastadı. Bwl M.Äuezovtiñ de sözinen bayqaladı. Biz jiırma jılğa sozılğan qudalau men qwrsaudan qwtıla bastağanın sezgen jazuşınıñ psihologiyasın añğartu maqsatımen onıñ bwl sözin şamalı ğana qısqartıp berudi jön sanadıq.

M.Äuezov: «Joldastar, sizderdiñ köpşilikteriñiz SSSR Jazuşılar Odağınıñ plenumına qatıstıñızdar, köpşilikteriñiz plenumnıñ materialdarın oqıdıñızdar, sondıqtan da özderiñizdiñ ädebi şığarmaşılıqtarıñızdı jauapkerşilikpen, jan-jaqtı, oylana, sın közimen şolıp şıqtıñızdar. SSSR Jazuşılar Odağınıñ kezekti plenumına partiya qanday män bergenine toqtalıp jatpaymın, tek bizdiñ aldımızda twrğan tüyindi mäselelerge nazar audarmaqşımın. Keñester Odağınıñ jazuşılar wyımınıñ osı plenumı ötkennen keyingi oylarımızdı jinaqtağan soñ Qazaqstan jazuşılarınıñ kezekti s'ezine qanday şığarmaşılıq tolğanıspen keletinimizdi oylastıra bastaymız. Köpten beri jazuşılardıñ s'ezi ötken joq, sondıqtan da jekelegen är jazuşı, qazaq ädebietiniñ är janrına jauaptı ärbir şığarmaşılıq sekciyalar ülken şığarmaşılıq ekpinmen s'ezge dayındıqtıñ qarbalasına kirisui kerek...»,– dep bastağan söziniñ auanınan sayasi atmosferadağı özgeristi birden bayqauğa boladı.

Bwrın tilge eñ aldımen «halıqtar kösemi», «partiyalıq sın», «sayasi öreskel qatelikter» degen tirkestermen bastalatın äşkereleuşi sözder qatarğa ilinbey qalğan. Onıñ orının «jauapkerşilikpen, jan-jaqtı, oylana, sın közimen» degen şığarmaşılıq wğımdar auıstırğan. Qazirgi taqırıptı igeruge kelgende qazaq jazuşılarınıñ tosırqap jatqanın ayta kele «özara sındı» öziniñ süyikti dramaturgiya janrınan bastaptı:

M.Äuezov: «Qazirgi künniñ taqırıbına jazğan Äuezovtiñ, Müsirepovtiñ, Mwqanovtıñ, Qwsayınovtıñ, Äbişevtiñ, Imanjanovtıñ p'esaları äli de nağız keñestik dramaturgiyanıñ deñgeyine jetken joq, olar tek mausımdıq talaptarğa ğana jauap berip keledi, olar şığarmanıñ ädebi, tarihi, körkem qwndılıqtarın anıqtay almaydı. Qazirgi keñes taqırıbına arnalğan körkem şığarmalar da boluı tiis. Bwl oraydan alğanda bizdiñ borışımız asa zor. Poeziya da, proza da, sın da osınday qarızdar küyde. Bwl janrlardıñ igerilui jöninde erekşe toqtalğım keledi. Nege bizde jaqsı dramaturgiya jazılmaydı, biz nege orıs dramaturgterinen ülgi almaymız? Bwl twrğıdan alğanda plenum öte mañızdı ötti. Bizdiñ memleketimizdiñ ömiriniñ eki mañızdı kezeñi üş-aq şığarmada: «Qaq ayırıluda», «Lyubov' YArovayada», «Bronepoezd – 15-69»-da ğana şınayı körinis taptı. Özge şığarmalar MHAT-ta, Kişi teatrda qoyılıp jatqanımen de, tek K.Simonovtıñ «Basqınşılıq», «Maydan», «Orıs adamı» p'esaları ğana nağız qwndılıqqa ie bolıp otır. Egerde sizder «Qaq ayırılu» men «Lyubov' YArovayanıñ» qanday p'esa ekenin körgen bolsañızdar, onda bwl eki şığarmanıñ keñestik dramaturgiyanı älemdik deñgeyge kötergenin moyındaularıñızğa tura keledi. Bwrın sahnada zattıq sebepkerlikke qwrılğan täsilder qoldanılatın. Alayda onıñ barlığı adamnıñ twtınuşılıq swranıstarı. Dramaturgiyalıq şığarmalarda olar sahnalıq tartısqa şamalı ğana ıqpal ete alatın. Mısalğa, Çehovtıñ «Şie bağında» şire (şkaf) turalı söz qozğaladı. «Bronepoezd – 15-69»-dağı zattıq täsildi alıñız, temir jolğa kim öziniñ basın qoyuı kerektigi jönindegi tartıs adam minezin aşuğa qanday ıqpaldı äser etedi...»,– dep bwrınğı sayasi tirkesterdiñ orının körkem taldaumen almastırdı.

Demek, Mäskeuden esken «jılı leptiñ» bir «jılımıq» äkeletini mätinniñ auanınan-aq seziledi. Äñgime özegi sayasi bağamdaudan köri körkem oyğa qwrıldı. Nağız lirik aqındardıñ şığarmaşılıqtan şettep ketuiniñ sebepterin emeuirin tanıta söyleydi. Bwl on bes – jiırma jıldan beri wmıtılğan ädebi qwbılıs edi.

M.Äuezov: «Qazir qostauğa bolmaytın betalıs bayqaladı. Bizdiñ köptegen aqındarımızda öte tamaşa şığarmalar bar, biraq olar aqındıqtan boyın aulaq salıp baradı. Meniñ qoyar swrağım: Säbit Mwqanov poeziyadan nege ketti, Äbdildä Täjibaev poeziyadan nege ketti? Onıñ dramaturgiyalıq şığarmaları sahnada wzaq twraqtamaytın dünieler. Men Ğali Ormanovpen erekşe esep ayırısqım keledi. Ol öziniñ moyınına asa jauaptı isti – «Anna Kareninanı» audarudı jük etip alıptı, al men ol nege poeziyadan ketti? – dep swrağım keledi. Meniñ oyımşa, olar özge de ülken janrda jwmıs istey otırıp, poeziyanı da wmıtpauı tiis»,– dedi.

Bwl swraqtıñ astarı öte tereñ. Jalğan «jasasınnan!» jalıqqan aqındar öleñnen bas tartuğa mäjbür boldı. Äsirese, Ğali siyaqtı näzik lirikter ünsiz qaldı. Endi poeziyağa jasalğan bwl öktemdiktiñ küni sanaulı edi. Mwhtar Äuezov sonı mekzep otır. Iä, söz tüzele bastadı.

Qisını kelgende söz arasına sınalay ketetin bir jay, M.Äuezov tura osı pikirdi sol mäjiliste otırğan «repertkomnıñ» bastığı men komissiya müşelerine qarata aytqan edi. Sonıñ işinde uaqıttıñ auanın añğara almağan reperturalıq komissiyanıñ müşesi Qapan Satıbaldin «erulige qarulı» qayıramın dep orınsız qağılğan sınağa wqsap qaldı. Ol öziniñ sözinde M.Äuezovke jauap qayıramın dep qayrañğa şığıp ketti.

Surette: Qapan Satıbaldin

Q.Satıbaldin: «Biz ğoy dramaturgiya artta qalıp baradı, ilgerileu joq deymiz. Şındığında da dramaturgterdiñ jağdayı jıldan jılğa qwldırap baradı. Äuezov joldas jaña aqın Täjibaev – dramaturg Täjibaevtan joğarı dedi. Men Täjibaevtiñ dramaturgiyalıq qabiletin bwlay bağalağan j.Äuezovtiñ pikirimen kelispeymin... Bizdiñ täjiribeli joldastarımız pikir talastırğandı öte wnatadı. Mısalı, jaña Äuezov öziniñ şeşendik qabiletin tamaşa körsete bildi, biraq öziniñ (repertuarlıq) mindettemesin orındamadı.

Joldas Äuezov orınında otırıp: Roman jazıp jatırmız, nemene onı jaqtırmaysıñ ba?!,– dedi.

Romandı jazu kerek. Biraq ta öziñizdiñ negizgi janrıñızdı wmıtpağanıñız jön. Eger qatelespesem, dramaturgiya siz üşin bastı janr emes pe. Siz wzın-ırğası 20-dan astam p'esa jazdıñız, endeşe soñğı uaqıtta teatrdıñ repertuarın nege wmıta bastadıñız?

Joldas Äuezov orınında otırıp: Roman jazıp jatırmın dedim ğoy, – dedi.

Mine, bar kiltipan osında. Siz nege roman jazuğa uaqıt tabasız, nege p'esa jazuğa uaqıt taba almaysız? Müsirepov te – dramaturg, ol da roman jazıp jatırmın deydi. Bwl jay ğana sıltau, biraq siz p'esa jazudı wmıtpauğa tiissiz. Müsirepov pen Äuezov – jetekşi dramaturgter, tarihi oqiğalar men ertegi, añızdardıñ negizinde p'esa jazuğa şeber, al qazirgi taqırıpqa wsınıs jasasañ, roman jazıp jatırmın deydi. Repertuardıñ josparı Qazaqstan Ortalıq komitetiniñ byurosında bekitilip qoyğan. 1952 jılı 27-jeltoqsan küni Ortalıq komitettiñ byurosı bekitken taqırıptıq jospar boyınşa bwl p'esalar osı uaqıtqa deyin jazılıp bitui tiis bolatın, olar nege roman jazadı, p'esa nege jazbaydı? Olar nege dramaturgiyanı ekinşi qatarğa qoyadı? Mümkin Äuezov pen Müsirepov joldastardıñ şeberligi jetispey me? Joq, olay emes, olar birinşi kezekke kesek romandı qoyıp, dramaturgiyanı keyinge ısırıp otır. Basqa joldastarğa basqa jağınan keleyik, al atalğan joldastar turalı jañağıdan özge sebep taba almay otırmın»,– dep qadaldı Qapan Satıbaldin.

Ärine, qiın kezde moral'dıq, materialdıq, şığarmaşılıq demeu bergen dramaturgiyağa ekeuiniñ de ökpesi joq edi. Biraq mınau tuıp kele jatqan «jılımıqtıñ» qas-qabağınıñ aşıq kezinde ömirlik mañızı bar bastı şığarmaların jazıp qaluğa wmtıldı.

M.Äuezov: «Endi sın turalı aytayın. Bwl plenumda sın mäselesi qalayda ünsiz, atausız qaldı, öytkeni plenumnıñ sıni deñgeyi tömen boldı. Jasqanşaq, jarasımsız sın ğana aytıldı. Egerde bes qaruı say, dayındığı mol, töñkeristen bergi keñes ädebietiniñ damuına belsene qatısıp kele jatqan Ermilov, Fadeev siyaqtı asa körnekti oqımıstıları bar orıs keñes sınınıñ deñgeyi mınaday bolğanda, ärbir ädebi jurnaldıñ sın turalı üzbey jazıp jatqanına qaramastan, orıs sınınıñ deñgeyi biik emes ekeni bayqaladı. Onıñ dramaturgiyadan da, poeziyadan da keyin qalıp qoyğanın esekersek, onda bizdiñ sınımızdıñ deñgeyi turalı qanday söz bolmaq? Bizdiñ sınımızdıñ mädenieti tömen, ob'ektivti emes, ötkenniñ qaldığı degendi maltaşa ezip, kereksiz kikiljiñdi jii qozdıradı, endigi jerde biz bwrın aydağanına köndirip kelgen eşqanday repertuarlıq komissiyasınıñ, eşqanday bastıqsımaqtardıñ byurokratiyalıq öktem pikirlerimen sanaspauımız kerek. Biz endi erkin suretkermiz, eşqanday şeneunikke täueldi emespiz. Mwnı Mwstafin joldas öziniñ bayandamasında: «Jinalıstı azaytıp, jazudı köbeyteyik»,– dep dwrıs ayttı. Men onımen kelisemin. Keliñizder, bärimiz de dos nietpen jwmıs isteyik. Jinalıs – şığarmaşılıqpen aynalısa almaytındarğa, «şımşılap» söylep, şırqıñdı bwzu üşin kerek. Biz oğan osı uaqıtqa deyin tözip keldik, endi bwdan äri töze almaymız»,– dep äbden mezi etken «mäjilisqorlardıñ» mısın bastı.

Şındığında da, keyingi jiırma jıldıñ işindegi «taptıq tartıstan», «wltşıl-burjuaziyaşıl ideologiyadan», «öreskel sayasi qatelerden», «marksizimge jat payımdaulardan», «sın men özara sınnan», jibermegen «kemşilikteri men qatelerden», «alaşordanıñ bas ideologi mindetinen», «handar men bilerdiñ mwñın mwñdaudan, joğın joqtaudan» äbden mezi bolıp, kez-kelgen repertkom men qara şolaq «näşändik» jüykesin tozdırıp edi. Bwl plenumda şığarmaşılıq erkindik pen avtorlıq qwqıq mäselesi alğaş ret kün tärtibine qoyıldı. Endi, mwnday toñmoyındar men döñmoyındarğa «bwdan äri töze almaytının» minbeden mälimdedi.

Söziniñ soñında M.Äuezov özin de dramaturg – aqındardıñ sanatına jatqızıp, poeziyasız p'esa tumaytının, poeziyasız p'esa jürekti jılıtpaytının tilge tiek ete kelip:

«Men nege tolqıp söylep otırmın deysizder me? Meniñ aldımda osı arada j.Baqbergenov söyledi. Men onıñ sözine sonşama narazı boldım. Onıñ öz sözimen aytsam, däl osınday dauıs köterip söyleudi men özime ar sanağan bolar edim. Däl osılay söyleuge, Baqbergenov joldas, jol beruge bolmaydı, bwl ädepsizdik. Bizdiñ bärimizde de qatelik bar. Kemşilikterimizdi körsetken köptegen maqalalar da esimizde. Sonda jañağı maqalalardağı jağımsız siltemelerdiñ barlığın jinap alıp, ne ana, ne mına jazuşınıñ betine tükire beruge bola ma? Olar da adam emes pe, onıñ üstine Mwstafin joldas öziniñ kemşiligin jasırğan joq qoy»,– degen uäj ayttı.

Iä, Äuezov äperbaqan sınnıñ uaqıtınıñ ötip bara jatqanın, tipti, ötip ketkenin sol kezdegi jas, maydanger jazuşınıñ tüsinbegenin «tüsinbey», batıra pikir bildirdi. Şındığında da jurnalist qalamger «nauqannan keşigip» qalıp edi. S.Baqbergenovtiñ bwl sözi de «jasasındatqan jalaulı maydannıñ» soñğı «urası» bolğandıqtan da odan qısqaşa ğana üzindi keltiremiz:

Surette: Säuirbek Baqbergenov

Säuirbek Baqbergenov: «Joldastar! Men redakciya qızmetkeri bolsam da, redakciyanıñ emes, özimniñ jeke basımnıñ pikirin aytuğa pravolımın ğoy dep oylaymın. Demek özimniñ pikirimdi köptiñ ortasına salmaqpın...

Biz ädebietimizdiñ osınday ösken öresin, zor tabıstarın aytumen qatar, kemşilikterin de ortağa salıp, onı batıl sınap otıruğa tiistimiz. Meniñşe, qazaq ädebietiniñ bwdan da körikti bolıp, şarıqtap ösuine kedirgi bolıp kele jatqan bir närse – baspasözderimizde äldeneşe ret söz bolıp jürgen jikşildik ekeni dausız. Jazuşı Äuezov pen Mwqanov bastağan eki top ädebietimizge keselin tigizip, jastardı tärbieleu, olardı ösiru isine böget bolıp otır. Bwl jöninde, ötken qısta partiyanıñ ortalıq organı – «Pravda» gazetiniñ “Sın orınına däripteuşilik” degen maqalasında mäseleni öte orındı köterdi. Biz bwl maqaladan keyin jikşildiktiñ tamırına balta şabılar dep ümittengen edik. Biraq, ol ümit äli eles bolıp qana keledi.

Naq osınday jaqsı nietpen men biıl «Pravda» gazetiniñ sol maqalasın talqılağan jinalısta biraz jazuşılardıñ kemşiligin, qatelerin aşıq türde aytqan bolatınmın. Äsirese, Mwstafinniñ «Qarağandı» romanındağı öreskel qatelerdi aytqan bolatınmın. Men bwl qatelerdi söylemesten bwrın jazuşılar wyımınıñ sol kezdegi törağası Jaymwrzin joldasqa, kitaptıñ redaktorı Tilekov joldasqa aytqan bolatınmın. Meniñ osı sınımnan keyin kitaptıñ altı jerine jöndeu engizildi. Demek men özimniñ bwl sınımmen Mwstafinge kömektestim dep tüsindim. Biraq ol onı kömek dep tüsinbey, meni quğınday bastadı. Al «Qarağandı»romanınıñ qazirgi tarap jürgen qazaqşasında äli de ülken qateler bar. Bwl qateniñ eñ bastısı – Rısbek pen Jappar degen eki jaudıñ qosılıp alıp, sovet ükimetin barınşa balağattaytın jeri. Bwl jaularğa berilgen tribun, bwl propaganda! Mäselen, «Aq qayıñ» siyaqtı romandağı jau Loznevoydıñ ükimetke til tigizgenin kördik pe? Jau – tilimen, balağattağan sözimen emes, isimen jau bolıp körinuge tiis. Bwlay etpegende qate bolıp şığadı.

Men piş-piş ösek (tergen) emespin, men är uaqta aşıq sınap, aşıq aytıp kelemin. Äli de aşıq türde, ayqaylap, dauısım jetkenşe ayta beremin. Meni sovet ükimeti naq osılay etip tärbielegen. Men sınnan da, sınaudan da qorıqpaymın. Partiya bizdi solay tärbielegen. Halturnıy, serıy şığarmalarmen küresu kerek ... dep partiya üyretip otırğanda, jaman şığarmalardı köre twrıp ündemey qaluğa meniñ küşim jetpeydi.

Bizdiñ ädebietimizge kesel bolıp jürgen mına närseni ayta ketu artıq bolmaydı. Eger bireu Äuezovti nemese onıñ jaqtastarın sınasa, onı Mwqanovtıñ tobına qosa saladı. Eger bireu Mwqanovtı, nemese onıñ tobın sınasa, onı Äuezovtiñ tobına qosa saladı. Söytip, barlıq adal, dwrıs sındar joqqa şığıp jatadı. Äñgime mwnımen ğana tınsa eken-au, tipti onı quğınğa saladı, ösekşi, anau-mınau degen ataqtar tağadı. Onday sınşılar eki jaqtıñ da jemtigine aynaladı. Pış-pış ösek aytıp, birin maqtap, birin jamandap, san qwbılıp kün ötkizuge bolar edi. Ärqaysısına bir jağınuğa da bolar edi. Bwl meniñ arım barmaytın jwmıs. Men kim köringenge jağımpazdanıp, jazuşı degen ataq aludı ar köremin. Mwnıñ özi jazuşılıqtı qorlağandıq bolar edi.

Qolaysızdau bolsa da, mınaday bir faktini aytuğa tiispin. Qazaq ädebietine qızmet ete bastağanına otız jıl bolğan Mwstafinniñ de ne bäri 3-4 kitabı bar. Olarıñ özi älgi aytqanday. Al, ädebietke qızmet ete bastağanıma üş-aq jıl bolğan meniñ de üş-tört kitapşam bar..»,– dep daurığıptı Säukeñ kezinde.

Iä, «Jazuşı Äuezov pen Mwqanov bastağan eki top ädebietimizge keselin tigizip, jastardı tärbieleu, olardı ösiru isine böget bolıp otır!» nemese «Bwl jaularğa berilgen tribun, bwl propaganda!» – degen «jasasındatqan wrandar» arısı altı ay, berisi osıdan üş ay bwrın aytılsa, wran emes, ükimge aynalar edi. M.Äuezov te onday sözdi «estigeni üşin arlanbas» edi, kerisinşe, işten tınıp tıñdar edi. Endi, mine, oqqa şabılğan qılıştıñ jüzi bosqa şabıldı. Uaqıttıñ qas-qabağı qalay tez özgergen!

Osınıñ qatarına «Socialistik Qazaqstan» gazetiniñ 273-sanında jariyalanğan tilşi M.Balaqaevtıñ «Körkem ädebiettiñ tili jayında» degen maqalasın jatqızuğa boladı. Onda:

«M.Äuezov öziniñ jazu mänerinde qazaq tiliniñ zañdılıqtarın saqtamaydı, onıñ qalıptasqan qwrılımın bwzadı, – dey kelip – Jazuşılar bwl rette köp eleuli oylar, köp şeşuşi pikirler ayta aladı. Sondıqtan da talay mamandarmen qatar qazaq jazuşı, aqındarımızdıñ osı jauaptı jayğa at salısuın tosamız»,– dep äñgimeni pikir alısu mänerinde ekenin emeuirin ete ayaqtaydı.

Alayda bwl pikir alısu emes, M.Äuezovke jasalğan soñğı şabuıldıñ, aqırğı atılğan oqtıñ biri edi. Öytkeni, bwl kün 1951 jıldıñ 9-jeltoqsanı – 1952 jıldıñ aqpanı emes bolatın. S.Bäyişevtiñ, Q.Jwmalievtiñ, S.Nwrışevtiñ, S.Keñesbaevtiñ, N.Sauranbaevtiñ, Q.Jarmağambetovtiñ jäne S.Mwqanovtıñ Mwhtar Äuezovti basına qorlaytın künderi ötip bara jatqan. Endigi jaltaqtaudıñ kezegi solardıñ özine kelgen. Alayda akademikterdiñ janı siri keletin bolsa kerek, S.Bäyişev pen S.Keñesbaev, N.Sauranbaev dañq twğırınan tüsken joq, ar aldındağı arıludı da qajet dep tappadı. Öytkeni olardıñ süyengen arqalığın, tiregen tabaldırığın, basıñqı betin de qalıñ talıs tabandı esik qalqalap twratın. Kerisinşe, S.Bäyişev, N.Sauranbaev, M.Balaqaev M.Äuezovtiñ alpıs jasqa tolğan mereytoyında onı «şabıttana» marapattadı.

1953 jılı 28-jeltoqsan küngi Universitetter men joğarı zañ oqu orındarı basqarmasınıñ bastığı M.Prokof'evtiñ №1078 bwyrığımen Mwhtar Äuezov 1954 jıldıñ 1-qañtarınan bastap M.V.Lomonosov atındağı Mäskeu universitetiniñ SSSR halıqtarı ädebieti tarihı kafedrasınıñ professorı bolıp qızmetke alındı.

Begimniñ begi, äri erke, äri öte näzik jandı mädeniet iesi, qayran Läylä apay – Läylä Mwhtarqızı:

«– Mwhtar Omarhanwlı jaña jıldı Mäskeude qarsı alatının aytıp: «Läyläjan! Men osı merekeni öziñe toylap berip barıp attansam deymin. Men de student bolğamın. Solar riza boltınday keş wyımdastır. Dostarıñnıñ bärin şaqır. Sergitin şağım endi tudı. Dastarhanı mol, qızuı men qızığı mol bolsın. Eşteñeden qısılma. Bäriniñ äkesi professor emes şığar (öziniñ professor atağın erekşe masattanıp ataytın). Älgi sugrobtı wmıt pa!»,– dedi. Oy, quanğanım-ay! Eşteñeden ayanğanım joq. Dostarımnıñ bärin jidım! Mäskeudiñ dükenindegi kerek zattan almağanım joq. Sonday bir riza, saltanattı keş boldı. Studentter Mwhtar Äuezovti köremiz,– dep quanadı, al men äkemniñ qasımda bolğanına quanamın. Şampandı küresin qarğa tığıp qoydım. Tün ortasınan aua barlığımız şığıp, kürtik qardıñ astınan suıq şampandı alğanda, studentterdiñ barlığı tañ qaldı. Mwhtar Omarhanwlınıñ üyde sonday ädeti bolatın. Sol keş esimnen qalmaydı. Qazir de sonda bolğandar wmıtpay aytıp jüredi. Asqar Meñliahmetwlımen de sol keşte jaqın tanıstım»,– deytin edi sonday bir rahattanğan marapat sezimmen.

Äkeli-balalı ekeui masattansa masattanatınday jıl edi. Ol jaña jıldıñ ğana emes, öziniñ jaña saltanattı däuiriniñ alğaşqı künderin süyikti Almatıda ötkizdi.

(jalğası bar)

Abai.kz

0 pikir