Düysenbi, 21 Qazan 2019
Mäyekti 8171 0 pikir 31 Şilde, 2014 sağat 15:58

QAS-SAQTIÑ HAS SWLUI

 

Qazaq– erteden «qızım – barım, arım, qonağım» dep qasterlegen halıq. Tumısınan batır halıqtıñ Twmar men Zarinaday patşası, ädildik pen ädilettiliktiñ aq tuın wstağan Ayşa bibi jäne Qaraşaştay şeşenderi, jarınıñ oşağın söndirmey, bütin bir eldi basqarğan Ayğanımday kösemderi, keşegi nemis faşisterine qarsı küreste Mänşük pen Äliyaday qorğanı, täuelsizdiktiñ erteñi üşin küresken Läzzat pen Sabiraday batır qızdarı boldı. Körkine aqılı say qazaqtıñ qızı, mine, osınday tekti. Osınday batır halıqtıñ tağı bir qızı büginde 17 jasında älemdi auzına qaratıp, swlulığımen milliondağan tabınuşınıñ kumirine aynaldı. Ol kim dep otırğan şığarsızdar. Soñğı eki apta işinde ğalamtor sayttarı men äleumettik jelilerdiñ tañdanısın tudırıp, swlulıq qwpiyasın jarısa jazıp jatqan şetel basılımdarınıñ jwldızı - qarapayım qas-saqtıñ has swluı Sabina Altınbekova. Alğaş qazaq qızınıñ kelbetin qıtaylıqtar bayqağan. Onı «Aziya birinşiligindegi eñ swlu volleybolşı» dep atağan-şeteldik «Daily Mail» basılımı. Al şeteldik 9gag.com saytındağı Sabina Altınbekovanıñ jariyalanımı men fotosureti 300 000 pikir jinağan. Qoldanuşılar Sabinanıñ tabiği swlulığı men japondıq animaciya keyipkerlerine wqsaytındığın aytqan. Al ukraindıq ua.tribuna.com portalı qazaq qızınıñ Taypeydegi jarıstağı fotosuretterin ğalamtorğa jariyalap: «Qazaq qızı Sabina Altınbekova – eñ jas, swlu sportşı», – dep moyındap, maqala jazğan. Al indoneziyalıq bandung.bisnis.com portalı: «Sabina Altınbekova öziniñ tabiği swlulığınıñ arqasında eldiñ nazarında jür. Onıñ suretteri – türli BAQ-tıñ nağız virusı», – dep jar saldı. Büginde otandıq BAQ pen şeteldik äleumettik jeliler voleybolşı Sabina Altınbekova turalı jarısa jazıp jatır. Onıñ sırt kelbetiniñ özindik qwpiyası turalı tamsanıp, qazaqtıñ qarşaday qızınıñ tabınuşısına aynalğandar qanşama. Biılğı jılı qazaq sportında fenomen qalıptastırğan Sabina Altınbekova turalı jañaşıldıqtı basınan bastap bayandasaq.

Sportşı Sabina Altınbekova voleyboldan Qazaqstan jastar qwramasındağı – jalğız qazaq qızı. Bärimiz biletindey, qwrama komandalardan qaraközderimizdi neken-sayaq körip qalatınımız bar. Negizinen, bizdiñ eldiñ namısın wlttıq qwramalardıñ özinde şetel legionerleri men özge wlt sportşıları qorğap keledi. Jalğız qarındasımız Sabina Altınbekova wlttıq qwramamen Qıtaydıñ Taypey aralında ötken voleyboldan Aziya birinşiligi sınına qatısuğa joldama alıp, el namısın qorğap qayttı. Biraq bwl jolı elimizdiñ voleyboldan qızdar qwraması birinşilikte jeñiske jete qoymadı, tipti, soñğı orındardıñ birin bölisip qayttı. Esesine Sabina Altınbekova Qıtay men Taypey, Aziya qwrlığınıñ milliondağan tabınuşısın özine tänti etti. Ayaqastınan äleumettik jelilerdiñ jwldızına aynalğan Sabina Altınbekovanı elge oralğan boyda aldımen jurnalister qauımı qarsı alıp, bwl jañaşıldıqtı bölisuge şaqırdı. Sabina Altınbekova öziniñ basına qonğan baq pen ataqtı, oğan qalay qaraytının bılay jetkizdi: «Şınımdı aytsam, özim de tañ qaldım. Qazaqstannıñ halıqaralıq jarıstarda joğarğı orın alıp jüruine öz ülesimdi qosıp jürgen qarapayım qızbın. Mwnday äygililik meni tañdandırdı dep ayta almaymın». Onıñ sözine qarağanda, voleyboldan ötken Aziya birinşiligi barısında Taypeyde är qadamına mümkindik bermepti. «Nege olay bolğanın bilmedim. Özim de osı swraqtı qoyamın. Nege däl men? Mağan jaqsı komplimentter aytıp, sıylıqtar bergeni jaqsı, ärine. Eñ bastısı, köptegen adamdar Qazaqstan turalı da bilip qaladı. Aziyada bizdiñ tuımızben suretke tüsip, bizge janküyer boldı», – dep öziniñ tañdanısın da jurnalister qauımımen bölisti. Äleumettik jeliler men sayttardağı äygililigi turalı ol bılay dep jauap berdi: «Tvitterde» akkauntım joq, Ask me öşirip tastağan, tek «instagram» men «vkontaktede» ğana akkauntım bar, biraq köbisi meniñ atımnan aşıp aladı, olar nege olay isteytinin tüsinbeymin». Bir-aq künde ğalamtor jwldızına aynalğan Sabinanıñ sözine qarasaq, ol üşin ataq pen dañq, äygililik maqsat emes, eliniñ erteñgi sportınıñ bolaşağın älemdik sındardan biiktetip, eliniñ atın şığarudı ğana oylaydı eken. Ärqaşan da jwldız emes, qarapayım qazaqtıñ qızı bolu bastı maqsatı. Tipti, sırtqı kelbeti men swlulığı älemdi moyındatqan Sabinağa qazirgi tañda türli model'dik agenttikter wsınıs bildirude, biraq olardıñ barlığına: «Men sän agenttikterinde jwmıs isteuge qarsımın. Men sporttı tañdadım», – dep jauap bergen. Al swlu bikeştiñ anası Nwripa Ämirova: «Model' boluğa wsınıstar tüsip jatqanın bilemiz, alayda biz ata-anası retinde qarsımız, ol qarşadayınan sporttı tañdadı. Ol sol jolda qızmet etedi», – deydi. Al Sabinanıñ jattıqtıruşısı Nwrlan Sadıqov bolsa, bwl ataqtılıqqa asa quanıştı emes ekenin: «Sabina Altınbekova – eñbekqor sportşı, öte qarapayım. Biraq bwl ataqtılığı onıñ sporttıq kar'erasına sızat tüsiredi dep oylamaymın. Biraq komandağa äser etui mümkin», – dep qazaq qızınıñ sporttıq kar'erasınıñ jalğasuın tileydi. Layım, biz de sonı tileyik. Qazaqtıñ aru qızı sän model'deri men jarnama agenttikterinde jürgenşe, wlttıq qwrama sapında el namısın qorğap jürsin demekpiz. Älem eli qazaqtıñ swlulığına tamsanıp, «Borat» fil'mindegi keyipkerler qazaq qızdarı emestigine közi jeter bälkim...

Altınbek QWMIRZAQWLI

Abai.kz

0 pikir