Düysenbi, 18 Qaraşa 2019
Qoğam 3491 0 pikir 28 Naurız, 2014 sağat 14:29

ALMATI ÄKİMİ RESEYŞİL ME?

Söz qısqa.

Almatıdağı Abay dañğılı men Ötegen batır köşesiniñ qiılısında salınıp jatqan metro ayaldamasınıñ atı – Mäskeu – Moskva. Tapsırıs beruşi – Almatı äkimdigi.

"Mäskeu" beketi ataluınıñ sırı mınada eken: Zauıtbek Twrısbekov Reseyde elşi bolıp twrğanda, 2011 jılı Mäskeu ökimetimen ekijaqtı kelisim jasağan. Ol kelisim boyınşa, Mäskeu ökimeti bir metro ayaldamasınıñ atın "Alma-Ata" dep atağan. Öz kezeginde Almatıdağı biz söz qılıp otırğan metro ayaldaması "Mäskeu" bolıp şığa kelgen. Osı jerden toqtay qalıñız, öytkeni, jer betinde "Alma-Ata" degen qala joq! "Alma-Ata"- sovet ökimetimen birge kelmeske ketken. Öşken. Keyde bizdiñ biliktegi Seydumanov sekildi äli de kommunistik ideyadan ayığa almay jürgen adamdar "Alma-Ata"-nı añsaytını bolmasa... Demek, Mäskeudegi "Alma-Ata" metro ayaldamasınıñ Täuelsizdik besigi -  Almatığa müldem qatısı joq. Ol - Twrısbekovtıñ "Alma-Atası".

Al, kelesi köşe, yağni, Abay dañğılı men Altınsarin köşesiniñ qiılısqan twsınan orın teuip jatqan sauda ortalığı da Moskva dep ataladı.

Bw ne neğılğan qaptağan Moskva?! Älde Almatı äkimdigi Mäskeuge degen «mahabbattarın» osılay paş etpek pe?

Jeke adamnıñ Reseydi jaqsı köruine tüsinistikpen qarauğa bolar. Al, respublikadağı eñ ülken äri mañızdı qalada bir emes, birneşe Moskvanıñ boy köterip jatqanı tüsinistiktiñ ayasına sıymaydı.

Qala äkimi jäne äkimşiliktegi kişkentay şeneunikter bir köşeniñ boyındağı eki birdey nısanğa Moskva atauın qanday negizge süyenip berip otır? Eger memleketaralıq dostıqqa iek artsa, onda Qazaqstan Reseymen ğana emes, älemniñ köptegen elderimen dostıq qarım-qatınasta, sayasi-ekonomikalıq baylanısta. Özge at tabılmay, qaytkende böten eldiñ astanasınıñ atauın beru qajet bolsa, endeşe, Bişkek, Ankara, Taşkent, Baku siyaqtı türki tektes bauırlas elderdiñ astanaları bar. Älde qala äkimi men qarmağındağı qızmetkerler Astanağa emes, Mäskeuge täueldi me?

Kerek deseñiz, däl qazirgi uaqıtta Moskva degen at basqınşılıqtıñ, körşi memleketterdiñ territoriyalıq twtastığına qol swğıp, Täuelsizdigine qauip töndirip, halıqaralıq qwqıq normaların ayaqastı etip, älem aldında jekkörinişti halge tüsken Resey biliginiñ balaması retinde qabıldanadı.

Küni keşe ğana Prezident N.Nazarbaev Almatığa arnayı saparmen kelip, qalanıñ Täuelsizdik tarihındağı erekşe ornı men respublika ömirindegi mañızdılığın söz wğatın adamğa täptiştep twrıp tüsindirip, ayttı. Elbasınıñ özi bağasın asırğan qalanıñ äkimşiligi bolsa, Reseyşil piğıldarın paş etip, Mäskeu atın ayaldamağa da, sauda üyine de berip älek. Osılayşa, qala äkimi «Täuelsizdiktiñ altın besigi – Almatını» (Prezidenttiñ sözi) Mäskeuge täueldilikke jetelep qana qoymay, onıñ ayqın körinis körsetip otır.

Abai.kz

0 pikir