Jwma, 15 Qaraşa 2019
Anıq 9820 0 pikir 1 Mamır, 2014 sağat 14:50

SOĞIS ARDAGERLERİ MEN OTAN QORĞAUŞILARDI QWTTIQTAYMIN!

SOĞIS ARDAGERLERİ MEN OTAN QORĞAUŞILARDI QWTTIQTAYMIN!

Soñğı aptalarda el işinde köp tarağan dau-damaydıñ biri – «AÑIZ ADAM» jurnalına qatıstı boldı. Aytılatın sözderdiñ birazı aytılıp bolğannan keyin, oqırman qauımdı «Bwnıñ artı ne bolar eken?» degendey swraq äli de mazalauı mümkin. Osığan oray keybir tüsinikter bergendi jön sanap otırmın.

«AÑIZ ADAM» jurnalınıñ säuir ayındağı №8 sanın adamzat tarihındağı eñ zwlım, qatıgez, faşizm ideyasınıñ däripteuşisi men eñ swrapıl soğıstı bastauşılardıñ biri – Adol'f Gitlerdiñ tarihına arnauımızdıñ artında qasaqana arandatu, halıqtıñ ar-namısına tiyu, ardagerler men olardıñ wrpağına soğıstan alğan jarasın qayta aşu emes edi. Bizde eşqaşan 1 million 366 mıñ soğısqa tikeley qatısqan qazaqstandıqtar men tılda eñbek etken qandastarımızdıñ qaysar ruhı men eren erligin tarazı basına qoyu oyı bolmağandığın basıp aytqım keledi.

Kerisinşe, Ekinşi düniejüzilik soğıstıñ tikeley wyımdastıruşısı bolğan Adol'f Gitlerdiñ ömirbayanın ayta otırıp, soğıstıñ bükil bes qwrlıqtıñ halqına tigizgen zalalın, adamzat älemindegi eñ swrapıl soğıs tarihın auqımdı türde aşu, qandı qırğınnıñ zardabın jas buın wmıtpasın dep qazirgi beybit ömirdiñ qanşalıqtı qımbat ekenin tağı bir ret eske saluğa tırısıp edik. Söytip, qazaq oqırmandarın tarihtıñ qaytalanuınan saqtandırğımız kelgen.

Mümkin, osınday izgi nietimiz barşa oqırman qauım men onıñ är türli buındarınıñ barlığına birdey tüsinikti bolmağan bolar. Zañğa süyene otırıp, jurnalğa qatıstı jauapqa tartu ünderiniñ köterilgeni de sondıqtan şığar. Keybir taqırıptar men tañdalğan suretterdiñ dästürli közqarasta jürgen otandastarımız üşin öreskel bolıp körinui ıqtimal ekendigin bas redaktor retinde tüsinip otırmın. Jäne de osı jerde men redaktor retinde qatelik jiberdim. Alayda, bwlardıñ köbisiniñ ğalamtorda kino-foto qwjattar retinde erkin taralıp jatqandığına qaramastan, ol keybir qariyalar üşin tosın jañalıq bolğanın da ayta ketu kerek.

Osığan oray, qazaq qauımınıñ ataqtı ökilderi, jurnalımızdıñ qalıñ oqırmandarı bwl mäselege aralasıp, redakciyağa ara tüsti. Qazaq eliniñ marqasqa azamattarı, ğalımdarı, ziyalıları, jurnalisteri, jalpı köziqaraqtı oqırmandardıñ mäselege bey-jay qaramay, baspasözde, äleumettik jelilerde jurnalğa  jäne onıñ wstanımına belsendi türde araşa tüsui öziniñ oñ nätijesin bergen siyaqtı. Bwl azamattarğa alğısım şeksiz.

Bastı qağidattı tüsingenimiz abzal dep sanaymın. Bizdiñ basılımnıñ artında jüz mıñnan astam oqırman bar. Qaytken künde de, men osı qalıñ eldiñ, jurnaldıñ ärbir nömirin kütip, tilekşi bolıp jürgen qazaq oqırmanınıñ köñilinen şığuğa tırısamın, solardıñ senimi men ümitin alday almaymın. Sebebi bwl – eñ auır jük pen eñ ülken jauapkerşilik. Eger men bireuge sensem, tek Jaratuşığa, qalıñ qazağıma, oqırmanıma senemin. Özime senemin. Basqa senim artar küşti körip twrğan joqpın. Men de, meniñ äriptesterim de äsire wltşıl emes, biz elimizdi şınayı süyetin eljandı, wltjandı azamattarmız.

Qazaq halqı – dastarhanı mol, qonaqjay, keñ peyildi halıq. Mümkin, osınday qırğiqabaq älemde, wltaralıq jäne dinaralıq mäselelerdiñ uşığıp, älemniñ köptegen böliginde mıñdağan adamdar köz jwmıp, soğıstıñ zardabın şekkende, qazaqtıñ wlı qasietteriniñ arqasında elimizde beybit ömirge şomılıp jürgenimizdi kündelikti tirşiliktiñ qızığımen öz därejesinde bağalamay jürgender de joq emes şığar. Osığan oray jurnalda «Gitler – faşist emes» degen siyaqtı bir ğana oy-pikirdiñ jarıq körui Qazaqstan azamattarınıñ ar-namısına nwqsan keltirse, bas redaktor retinde bwl pikir jeke twlğanıñ özindik közqarası, erkin wstanımı ekendigine basa nazar audartqım keledi. Eger özge közqarastağı azamattar basqa da pikirimiz bar, aytarımız bar deytin bolsa, olarğa da öz oyların aytıp-jetkizu üşin mümkindik beruge äzirmiz.

Sonımen qatar, meni faşizmmen küresken ardagerlerdiñ patriottıq sezimin taptadı dep qaralaytındarğa aytarım: men de sol soğısqa qatısqan buınnıñ wrpağımın! Nağaşı atam Qıdırbay Aytbaywlı Stalingrad şayqasında bir qolı men ayağınan jaralanıp, elge oraldı. Atamnıñ qolındağı jarasınan sarısulı iriñiniñ tausılmay aqqanın soğıstan 14 jıldan keyin tuğan men de kördim. Jıl sayın qalıptasqan dästür boyınşa qan maydannan oralğan birqatar soğıs ardagerlerine jurnalımızdı tegin taratıp, marapat körsetetin dästürimiz de bar edi. Bwl jılı da solay etpekpiz.

Kelesi jılı Jeñistiñ 70 jıldığın atap ötemiz. Osığan oray tağı da qaytalap aytayın: nacizm men faşizmniñ joyıluına öz ülesin qosqan, wlı jeñis üşin qanı men terin tökken ardagerlerdiñ aldında basımdı iemin, olardıñ erligin däripteu – meniñ jäne bükil äriptesterim men wjımımızdıñ perzenttik parızı dep tüsinemin! Eger osı kisilerdiñ aldında kişkene bolsa da  ayıptı bolsam, bayqausızda qariyalarımızdıñ köñiline qılau tüsirip alsam, bügingi tañda elimizdegi közi tiri, qatarda jürgen 6 mıñnan astam ärbir Ekinşi düniejüzilik soğıs ardagerine qwrmet körsetuge ärdayım äzirmin.

Degenmen, qoğamdı bir silkigen, dürliktirgen dau-damay osımen ayaqtaladı dep senemin. Bolğan oqiğadan barlığımız da tiisti sabaq alğan şığarmız.

Qwday qalasa, ömir jalğasa beredi. Alda Täuelsizdigimizdiñ 25 jıldığı kele jatır. Alaş qozğalısınıñ 100 jıldığı da tayap qaldı. Jurnalımız da jwmısın bwrınğısınan beter üdetip, bolaşaqta talay-talay qızıq taqırıptardı köterip, oqırmandı qazaq jeri men eliniñ tarihı turalı, azat memleketimizdiñ ornığuına, qanat jayuına, şın mäninde mäñgilik boluına erekşe üles qosqan, qosıp jürgen qaytalanbas twlğalar turalı keñinen söz etemiz dep sanaymın, soğan kämil senemin.

Osını paydalana otırıp, Qazaqstannıñ soğıs ardagerleri men barşa Otan qorğauşıların alda kele jatqan dästürli merekelerimen şın jürekten qwttıqtaymın! Olarğa zor densaulıq, mol baqıt, qajımas qayrat tileymin!  

Qwrmetpen,

Jarılqap QALIBAY,

«Jwldızdar otbası AÑIZ ADAM»

jurnalınıñ bas redaktorı.

Abai.kz

0 pikir