Jwma, 15 Qaraşa 2019
Jañalıqtar 1657 0 pikir 28 Tamız, 2013 sağat 12:12

Euraziyalıq ekonomikalıq odaq – Täuelsizdikke töngen qater!

Qazaqstan azamattarına ÜNDEU

Qazaqstan azamattarına ÜNDEU

Qadirli ağayın!
Osıdan birneşe kün bwrın Qazaqstan Sırtqı ister ministriniñ orınbasarı Qayrat Sarıbay Euraziyalıq ekonomikalıq odaq qwru jönindegi kelisim qwjattarı 2014 jıldıñ 1 mamırına deyin dayın boladı degen mälimdeme jasadı. Bwl qwjattar dayın bolğan soñ 2015 jıldıñ 1 qañtarınan bastap üş el aumağında Euraziyalıq ekonomikalıq odaq öz küşine enedi. Euraziyalıq integraciya mäselesimen aynalısudıñ qarqını sonday, tipti Sırtqı ister ministr­li­gi­nen osı mäselemen aynalısatın arnayı departament te qwrılıp qoyğanı habarlandı.
Biz bwğan deyin de birneşe märte qazaq memleketiniñ täuelsizdigine qater töndiretin integraciyalıq procesterge öz qarsılığımızdı bildir­dik. Euraziyalıq ekonomikalıq odaq qwru degenimiz – Reseydiñ imperiyalıq ambiciyasınan, bwrınğı Keñes odağın jañğırtu ideyasınan tuındağan Kreml'diñ ekspansiyalıq bastaması.
Euraziyalıq ekonomikalıq odaqtıñ alğaşqı baspaldağı retinde qwrılğan Kedendik odaqtıñ Qazaqstanğa tiimsiz bolğanı jöninde qazir barlıq jetekşi sarapşılar men mamandar aytıp jür. Mäselen, belgili sayasattanuşı, Qauip-qaterdi bağalau ortalığınıñ direktorı Dosım Sätbaev “Kedendik odaq Qazaqstanğa 153 million adamğa teñ narıqtı aşadı” degen ümitti aqtamağanı” jöninde aşıq ayttı. “Qazaqstannıñ Kedendik odaqtağı ülesi 17 payızğa deyin tömendedi, al 2011 jılı bwl 20 payız bolatın. Qarjı ministri Bolat Jämişevtiñ özi qazaq eksportınıñ Kedendik odaq aumağında qattı tömendep ketkenin moyındadı” dey­di sarapşılar. Statistika agent­ti­giniñ mälimetinşe, Qazaqstannnıñ Kedendik odaq elderine eksportı qazirdiñ özinde 3,7 payızğa tömendegen, al Resey men Belarus'tıñ bizdiñ elge eksportı, kerisinşe, 12 payızğa artqan! Kedendik odaqtıñ Qazaq­stan­ğa tiimsiz bolğanın qazaq mamandarı ğana emes, Resey bwqaralıq aqparat qwraldarı moyındaydı. Olar: “Kedendik odaq ayasındağı narıqta Resey men Belorussiya keybir öndi­risteri özderin jaqsı poziciyada sezinedi, al Qazaqstanğa bwl odaqtıñ qwrıluı jaqsılıq äkelgen joq”.
Kedendik odaqtıñ tiimsizdigi turalı Belorussiya prezidenti Aleksandr Lukaşenko da mälimdedi. Onıñ aytuınşa, “Resey Belorussiyanı aldadı”. Reseydi Belorussiyanı öziniñ jäne Qazaqstan narığına jibergisi kelmey otırğanın da aşıq ayttı. Bir sözben aytqanda, Qazaqstannıñ Kedendik odaqqa enuinen bizdiñ ekonomikağa ziyanı timese, eşqanday paydası men tiimdiligi bolğan joq.   
Bwl – Euraziyalıq odaqtıñ tek ekonomikalıq tiimsizdigi turalı qısqaşa ğana mäsele. Sonımen birge qazaq memlekettiliginiñ täuelsizdigi turalı da oylanuımız kerek. Täuel­sizdik – qasietti wğım, Reseymen integraciyalıq odaqtar ekonomikalıq jağınan tiimdi bolğannıñ özinde, eger bwl birlestikter bizdiñ egemen­digimizge salqının tigizetin bolsa, onda mwnday wltqa qaterli wyımdardıñ eş qajeti joq dep sanaymız! Euraziyalıq parlament qwru ideyası, odaq ayasında ortaq valyuta engizu (Reseydiñ armanı rubl' engizu, ärine!), basqa da memleketten biik (nadnacional'nıy) qwrılımdar qwru mäseleleri – qazaqtıñ memleketti­ligine qauip töndiretin problemalar. Resey prezidenti Putin de, Qazaqstan basşısı Nazarbaev ta “Euraziyalıq ekonomikalıq odaq bwrınğı KSRO-nı jandandırudıñ jolı emes” dep mälimdegenine qaramastan, Kreml' tarapınan jürgizilip otırğan sayasi diktat qazaq wltınıñ täuelsizdigine qauip töndiretinine biz senimdimiz.
Osı sebepten, biz, azamattıq qoğam ökilderi, jurnalister, qoğamdıq wyım jetekşileri men müşeleri, jalpı, qazaq memleketiniñ täuelsizdigine alañdaulı Qazaqstan azamattarı bilikke mınaday talaptar qoyamız:
1.            Euraziyalıq ekonomikalıq odaqqa kiruden tolıq bas tartu! Ekonomikalıq jağınan tiimsiz, memleketimizdiñ täuelsizdigine qater töndiretin barlıq bastamalardan aulaq boluımız tiis!
2.            Tek qana Kreml'diñ aytqanımen jürip-twrudı qoyıp, aytqanına ğana könip, Reseymen integraciyalıq odaqtarğa Qazaqstan azamattarınıñ sanasuınsız, qalıñ bwqaranıñ pikirin bilmesten qosıludı toqtatu!
3.            Euraziyalıq parlament, ortaq valyuta, basqa da memleket egemendigine, onıñ jeke-dara sub'ekt boluına nwqsan keltiretin Reseydiñ jobalarına qosılmau!
4.            Kedendik odaqtıñ Qazaqstanğa tiimsiz bolğanın büginderi bilikşil sarapşılardıñ özi moyındap otır. Biz özimizdiñ esemizdi jiberuge tiisti emespiz! Osı sebepti, Kedendik odaqtıñ Qazaqstanğa tiimsiz şart­tarın qayta qarap, eger bizdiñ ekonomikalıq müddemiz orındalmağan jağdayda, Resey biligine bwl mäsele jöninde qatañ talaptar qoyu!
Biz qazaqtıñ wlttıq müddesin qorğağısı keletin, memleketimizdiñ täuelsizdigine, erteñine, bolaşağına alañdaytın barlıq azamattardı osı talaptardı qoldauğa şaqıramız! Qol qoyıñızdar! Euraziyalıq odaqqa, Kreml'diñ imperiyalıq ambiciyasına toytarıs beruge äzir azamattardıñ köp ekenin körseteyik!
Ündeuge Dulat Isabekov, Ğabbas Qabışwlı, Beybit Qoyşıbay, Temirhan Medetbek, Sağat Jüsip, Rasul Jwmalı, Aydos Sarım, Mwhtar Tayjan, Qanat Ibragimov, Janbolat Mamay siyaqtı tanımal adamdarmen qatar jas tolqın – patriot jastar da, barlığı 97 adam qol qoyğan. Qol jinau jalğasuda.
Ündeuge qol qoyamın deuşiler rukh_pen_til@mail.ru, ashikalan@gmail.com poştasına atı-jönin jazıp, qoldau bildire aladı.
Almatığa kelip qol qoyamın deuşilerge baylanıs telefonı: 8 707 333 6399
 "Jas Alaş" gazeti
0 pikir