Seysenbi, 22 Qazan 2019
Jañalıqtar 2052 0 pikir 28 Qırküyek, 2012 sağat 12:59

KSRO-NI KÖKSEU

 

 

Telearna - ideologiyanıñ bir qwralı. Qazir jwrt köbinese telearnadan beriletin jañalıqtar men habarlarğa köbirek ilanadı. Tipti keybireulerdiñ pikir almasıp jatqan üstinen tüsseñ, «Telearnada solay dedi ğoy...» dep bet qaratpaytının qaytersiñ. Al telearnadağı tilşilerdiñ pikiri eşbir elep-ekşeusiz aytılatını qarın aştıradı.
Biz de jañalıqqa janı qwştar, közi qaraqtı körermenniñ qatarınanbız. Eleñ etkizerlik oqiğalarğa özindik közqarasımız bar. Keyde tilşilerdiñ orındı, orınsız söylemderin estip, «ättegen-ay, bwlarda redaktor degen bolmauşı ma edi? Nege kemşilikterin tüzemeydi eken?» dep torsañdaymız. Biraq ta atı darday telearnalardıñ tilşileri men kommentatorları «boyauşı-boyauşı» degen sayın tiliniñ wşına kelgen söz iirimderin oñdı-soldı paydalana beretin boldı. Estip otırıp, eriksiz qınjılasıñ.
Telearnalarda sporttıq sayıs­tardıñ tikeley körsetilimi jii beriledi. Jazda Londonda ötken HHH Olimpiada oyındarın qızığa tama­şaladıq. Ärine, sol dübirli dodadağı sportşılarımızdıñ jeñisine üyimizdiñ törindegi kök jäşik arqılı kuä bolıp, börkimizdi aspanğa attıq. Jastardıñ namısı qayralıp, patriottıq ruhı asqaqtadı. Sport - kez kelgen eldiñ atın älemge tanıtatın qwdıretti öner. Bwğan düyim jwrttıñ közi bayağıda jetken. Alayda, älgindey sporttıq bäsekelerde bağın sınap jürgen sportşılarımız turalı äñgimeleytin kommentatorlardıñ birazı nege kejegesi keri tartıp, kökezulene beretinin tüsine almay dalmız. Äsirese orıstildi jurnalister qanday sport türi bolsın, qanday sportşı bolsın, äyteuir «Sovetskaya mektebiniñ tülekteri» degenin qoymaydı. Tipti janındağı sport taqırıbına etene jaqın mamandı «Master sporta Sovetskogo Soyuza» dep tanıstırıp jatadı. Bwl ne sonda? «Master sporta Sovetskogo Soyuza» ülken märtebe me, şen be? Nege biz kez kelgen jetistigimizdiñ şırqau basın keñestik kezeñnen izdeymiz? Qazaqstannıñ Täuelsizdigin alğanına 20 jıldan astı. Büginde egemendi elimizde qazaqtıñ töl sportşıları men sport şeberleri qalıptasıp ülgerdi. Jiırma jastağı sportşı talay biik şıñdardı bağındırdı. Kommentatorlar bwğan Keñestik kezeñniñ qanday qatısı bar ekenine nege köz jügirtpeydi? Älde, keñestik kezeñdegi sportşılardıñ jwrt tänti bolarlıq özindik erekşeligi boldı ma? Meniñşe, bwl jäy ğana qalıptasıp ketken söz. Sol kezde de qazaqtıñ işinen talay sportşılar top jarıp şıqtı. Qazir de elimiz sportqa jiti köñil bölude. Äsirese Olimpiadadan 7 altın oljalap kelgen otandıq sportşılarımızdıñ jeñisinen keyin jastar men jasöspirimderdiñ sportqa degen qwlşınısı erekşe arta tüsken. Qwdayğa şükir, olardı tärbieleytin sport şeberleri de barşılıq. Älgindey «Sovetskaya şkola», «Master sporta Sovetskogo Soyuza» dep aytudı ädetke aynaldırğan kommentatorlardıñ qwlağına altın sırğa! Jattandı äri jauır qılğan söz tirkesterinen qalıñ körermen äbden mezi boldı. Au, qwrdımğa ketken «keñestik mektepten» kimderdi ülgi twtıp jürmiz biz, aytıñızdarşı?! Sport kommentatorları keleşekte sözdiñ parqın tüsinip, söylese eken deymin. Bwl meniñ ğana emes, telearnağa telmirgen qanşama körermenniñ kökeyindegi oy. Al osınday öreskel qatelikke jol berip otırğan telearna basşıları mwnı nege añğarmay qaladı?! Osığan añ-tañmın.

Toğjan TÖLEGENQIZI

"Türkistan" gazeti

 

0 pikir