Seysenbi, 22 Qazan 2019
Jañalıqtar 2272 0 pikir 30 Mausım, 2009 sağat 21:51

Qambar AHMETOV. «Tentek» şahtasında tağı apat...

 

 

«Arselor Mittal Temirtau» kompaniyasına qarastı şahtalardıñ birinde tağı da apat boldı. Mausımnıñ 28-inde keşkisin «Tentek» şahtasındağı 193 D6-YU konveyerli ştrektiñ dayarlıq zaboyında kenetten kömir gazı atqılağan. «Oqiğa uaqıtında şahtada 94 adam bolğan» dep habarladı tötenşe jağdaylar qızmeti. Apattı zaboyda jwmıs istep jürgen üş kenşi qaytıs bolıp, bir adam auır jaraqat alğan.
Osınday apat däl osı şahtada bıltırğı jılı tura osı uaqıtta bolğan edi...
2008 jıldıñ 2 mausımında «Tentekte» «kenetten» atqılağan gaz ben kömir 5 kenşiniñ ömirin qidı. Sol uaqıta kompaniya basşıları endi mwnday oqiğanıñ qaytalanuına jol bermeu üşin ter tögip, qıruar qarjı audarıp jatqanın aytqan...
Osı jolı da apat ornına oblıs äkimimen birge jedel jetken kompaniyanıñ Bas direktorı Frank Pannir qarjı dağdarısına qaramastan, eñbek qauipsizdigine mol qarjı bölingenin tağı bir qaytaladı...
Tötenşe jağdaylar qızmeti ökilderiniñ habarlauınşa, sırtqa şığar esik pen apat bolğan zaboy aralığındağı 260 metr qaşıqtıqtıñ 100 metrin ken jınıstarı basıp qalğan. Äri bwl quısta metan gazı twnıp twr. «Qazir gazsızdandıru jwmıstarın jürgizip jatırmız. Apat ornı gazdan tazartılğan soñ, ken üyindisin arşuğa kirisemiz», – deydi qwtqaru qızmetiniñ ökilderi.
Tötenşe jağdaylar qızmetiniñ de, kompaniyanıñ baspasöz qızmetiniñ de äzirşe, «apat gazdıñ oqıstan atqılauınan boldı» degenge alıp-qosarı joq. «Nege atqıladı? Nege oqıstan?..» degen swraqtar äzirge jauapsız qaluda.
Keşe apat ornında Tötenşe jağdaylar vice-ministri general-mayor V.Petrov basqarğan komissiya öz jwmısın bastadı.
Sonday-aq keşe «Şahtadağı osı apatqa qatıstı Qılmıstıq kodekstiñ 245-babanıñ 2-böligi boyınşa qılmıstıq is qozğaldı» dep habarladı oblıstıq prokuraturanıñ baspasöz hatşısı Janqozı Naqışev. «Tentek» şahtasında bıltırğı jılı da apat boldı dedik joğarıda. Sol oqiğağa qatıstı qılmıstıq is uaqıtşa toqtatılğan. Keşe prokuraturanıñ baspasöz qızmeti sol is te qayta qozğalğanın habarladı.
– İs respublikalıq Bas prokuraturanıñ jedel-tergeu tobınıñ Resey Federaciyasınıñ bas prokuraturasına keşendi, komissiyalıq saraptama jürgizu turalı joldağan tapsırmasınıñ keşeuildeuine baylanıstı toqtatılğan edi. Saraptamanıñ qorıtındıları kelip tüsti. Endi tergeu amaldarı qayta jalğasa bastadı, – dedi J.Naqışev.
– Kömir departamentiniñ öndiruşi käsiporındarındağı jabdıqtardı almastıruğa jäne jañartuğa 2008 jılı AQŞ-tıñ 150 million dollarınan astam qarajat bölindi. Bwl ötken jıldarı jwmsalğan aqşamen salıstırğanda birneşe esege köp, – deydi kompaniyanıñ bas direktorı Frank Pannir. Onıñ aytuınşa, kompaniya dağdarısqa qaramastan qauipsizdikti qamtamasız etuge qarjı böludi toqtatpağan. Bıltırğı jıldan beri däl osı «Tentek» şahtasınıñ özinde talay jabdıq jañartılıp, tehnikalıq qauipsizdik küşeytile tüsken.... Endeşe, jıl ötpey jatıp baqıtsız oqiğanıñ däl osı şahtada tağı qaytalanuın qalay tüsinuge boladı?
Aytpaqşı, bıltır 30 kenşiniñ ömirin jalmağan «Abay» şahtasındağı apatqa baylanıstı qozğalğan qılmıstıq is uaqıtşa toqtatılğanın habarlağan bolatınbız. Biraz uaqıt bwrın (04.06.2008 «Jabulı şahta jabulı» qalatın siyaqtı»). Bas prokuraturanıñ jedel tergeu tobınıñ mälimdeuinşe, şahtanı jaqın uaqıtta aşu mümkin emes. Oqşaulanğan lavağa aua ense, metan tağı twtanıp, joyqın jarılıs tağı qaytalanuı mümkin eken. Alayda şahterlerdiñ jesirleri bwl aytılğanmen kelispey otır. Olar şahtanıñ aşıluın talap etude. Jaqında oblıs prokurorına kenşilerdiñ jesirleri arızdana keldi. Olar bwl şahtanıñ apattıq uçaskesinen sınama alıp jürgen adamdarğa senbeytinderin mälimdedi. Bir jarım jıl bwrın uçaske gipsti wstatqışpen twmşalanğan bolatın. Ђrt jartı jılda, äri ketse bir jılda özdiginen sönedi dep kütilgen. Alayda bir jarım jıl ötti. Lavanı eşkimniñ aşa qoyar türi joq. Qaytıs bolğandardıñ jesirleri bolsa jer astındağı ört bayağıda söngen degen mälimetterge qol jetkizgenderin aytadı. «Jesirlerdiñ arızı äli qarastırıluda» deydi prokuratura baspasöz hatşısı.
Mittaldıñ şahtaları jeti bastı ajdahağa aynalğanday. Kenşilerdi top-tobımen jwtıp jiberude. 2004 jıldıñ jeltoqsanında Şahtinsk şahtasındağı 23 şahterdiñ ömirin qiğan, 2006 jıldıñ qırküyeginde Lenin atındağı şahtada 41 şahterdiñ ömirin jalmağan joyqın jarılıstardıñ qasiret-qayğısı da wmıtıla qoyğan joq, äli. 2008 jılı «Abay» şahtasında 30 kenşi qaytıs bolsa, sonıñ 21-iniñ süyegi de tabılmadı. 2008 jılı «Tentektegi» apatta 5 adam köz jwmdı. Biılğısı mınau.

 

 

Qambar AHMETOV, Qarağandı
«Ayqın» gazeti 30 mausım 2009 jıl

0 pikir