Düysenbi, 17 Aqpan 2020
46 - söz 1347 10 pikir 20 Qañtar, 2020 sağat 13:45

Şekaraşı sarbazdıñ jalaqısı - 78 mıñ teñge ğana

Keyingi kezde Qazaqstan Respublikasınıñ memlekettik şekarasınan Qıtay Halıq Respublikasınıñ wltı qazaq azamattarınıñ zañsız ötu faktileri orın aluına baylanıstı qoğamda «Şekaraşılarımız bwğan nege jol berdi?» degen saual tuındap otır. Osı swraqqa jauap izdey kele, men tayauda Soltüstik Qazaqstan oblısı men Ombı oblısınıñ arasındağı Qazaqstan-Resey memlekettik şekarasına arnayı barıp-qayttım.
Tüygen pikirim: memlekettik şekaranı bwzuşılardı der kezinde wstay almağan Wlttıq qauipsizdik komiteti Şekara qızmetiniñ jauaptı qızmetkerleri men äskeri qızmetşilerin jauapqa tartumen şekteluge bolmaydı. Mäseleniñ tamırı tereñ.

Birinşiden, 1998 jılğa deyin şekara äskeri küzetken Qıtay Halıq Respublikasımen aradağı memlekettik şekaranıñ wzındığı 1783 kilometr bolğan jäne onı 20 mıñnan astam şekaraşı küzetken. Qazir küzetiletin memlekettik şekaranıñ wzındığı 8,5 esege juıq wlğayıp, 15132 kilometrge jetken. Onı 30 mıñnan astam şekaraşı küzetedi. Sondıqtan da, eñ aldımen, şekaraşılar sanın köbeytu qajet. Öytkeni memlekettik şekaranı küzetetin, kelisimşart boyınşa əskeri qızmet ötkerip jürgen əskeri qızmetşilerdiñ sanı jetkiliksiz bolğandıqtan, merzimdi äskeri qızmetke şaqırılğan jas sarbazdardı da şekaranı küzetuge tartuğa tura kelip otır. Al olardıñ täjiribesizdiginen ärtürli şalağaylıqtar orın alıp jatadı.

Ekinşiden, şekaraşılardıñ twraqtamauşılığı joğarı. 2018 jılı kelisimşart boyınşa qızmet etken 1037 sarbaz ben serjant qızmetten bosatılğan. Al 2019 jıldıñ ötken 10 ayında 759 sarbaz ben serjant qızmetten ketken. Mwnıñ sebebin swrastırsam, şekaraşılardıñ jalaqısı öte tömen bolıp şıqtı. Eldiñ şetinde, jeldiñ ötinde memlekettik şekaranı küzetip jürgen sarbazdıñ qolına tietin jalaqısı – 78 mıñ teñge ğana. Kelisimşart boyınşa şekara küzetetin sarbazdar sanınıñ jetkiliksizdiginiñ bastı sebebi de osında.

Osığan oray, bügin Prem'er-Ministrdiñ atına hat joldap, memlekettik şekaranı küzetude kelisimşart boyınşa əskeri qızmet ötkeretin əskeri qızmetşilerdiñ sanın köbeytu jäne olardıñ jalaqasın arttıru mäselesin qarauın swradım.

Käribay Mwsırmannıñ äleumettik jelidegi jazbasınan

Abai.kz

10 pikir