Düysenbi, 27 Qañtar 2020
Talqı 1377 12 pikir 4 Jeltoqsan, 2019 sağat 13:11

Memlekettik qızmetşilerdi qalay qısqartamız?

Osı taqırıptağı deputattıq saualımdı bügin bolğan Parlament Mäjilisiniñ jalpı otırısında Prem'er-Ministr Asqar Maminniñ atına joldadım. Onı äriptesterim Beybit Mamraev pen Baydildä Jılqışiev qoldap, qoldarın qoydı.

El Prezidenti Qasım-Jomart Toqaev saylaualdı bağdarlamasında qaytalanatın, artıq qızmet türlerin alıp tastap, memlekettik basqaru jüyesin oñtaylandıru qajettigin atap ayttı. Sonday-aq alğaşqı Joldauında kelesi jıldan bastap memlekettik qızmetşilerdiñ sanın birtindep qısqartuğa kirisip, ünemdelgen qarajattı neğwrlım paydalı qızmetkerlerdi ıntalandıruğa jwmsau jäne 2024 jılğa qaray memlekettik qızmetşilerdiñ sanın 25 payızğa qısqartu jöninde naqtı mindet qoyğanı mälim.

Osığan oray, Memleket basşısınıñ tapsırmasın wtımdı da tiimdi orındau maqsatında mınaday mäselelerge nazar audardıq:

Birinşiden, «İşki sayasi twraqtılıqtı qamtamasız etu jäne qazaqstandıq patriotizmdi nasihattau» byudjettik bağdarlamasınıñ äkimşisi bolıp Mädeniet jäne sport ministrligi bekitilgen. Osı bağdarlama ayasında jıl sayın respublikalıq patriottar forumı, Qazaqstan sayasattanuşılarınıñ kongresi wyımdastırılıp, memlekettik rämizderdi nasihattau jwmısı jürgiziledi. Al işki sayasi twraqtılıqtı qamtamasız etu jäne qazaqstandıq patriotizmdi nasihattau Aqparat jäne qoğamdıq damu ministrliginiñ bastı mindeti bolıp tabıladı. Mädeniet jäne sport ministrligine oğan tän emes oyın biznesi, lotoreya ötkizu jönindegi funkciyalar da berilgen.

Ekinşiden, ortalıq jäne jergilikti atqaruşı organdar birtwtas atqaruşı bilik bolıp tabılatındığına qaramastan, ministrlikterdiñ köpşiligi özderiniñ aumaqtıq qwrılımdarın qwrıp, olarğa baqılau-qadağalau funkciyasın bergen. Mısal üşin, oblıstıq äkimdikterdiñ Auıl şaruaşılığı, Veterinariya basqarmaları men Jer inspekciyaları bar bolğandıqtan, Auıl şaruaşılığı ministrliginiñ aumaqtıq inspekciyalarınıñ qanşalıqtı qajeti bar?

Oblıstıq äkimdikterdiñ Tabiği resurstar jäne tabiğattı paydalanudı retteu basqarmaları men Auıl şaruaşılığı ministrliginiñ orman şaruaşılığı jäne januarlar düniesi aumaqtıq inspekciyaları da birin-biri qaytalaytın qızmetterdi atqaradı.

Oblıstıq äkimdikterdiñ Bilim basqarmaları barda ministrleri auısqan sayın jaña reforma jasalatın Bilim jäne ğılım ministrliginiñ Bilim salasındağı baqılau departamentteriniñ qanday qajettiligi bar?

Oblıstıq äkimdikterdiñ Jwmıspen qamtudı üylestiru jäne äleumettik bağdarlamalar basqarmaları men Memlekettik eñbek inspekciyası basqarmaları azday, Eñbek jäne halıqtı äleumettik qorğau ministrliginiñ oblıstıq departamentterin qwru qanday qajettilikten tuındağan?

Sol siyaqtı oblıstıq Tekseru komissiyaları men Qarjı ministrliginiñ oblıstıq işki memlekettik audit departamentterin biriktiru qajettigi jöninde de köpten beri aytılıp keledi.

Üşinşiden, memlekettik apparattı oñtaylandıru kezinde birinşi kezekte bos lauazımdardı qısqartu wsınılıp otır. Qazir mwnday bos orındar sanı 8 mıñğa juıq birlikti qwraydı. Osığan oray keybir öñirlerde memlekettik qızmettiñ bos orındarına konkurs jariyalauğa moratoriy jariyalanğan. Bizdiñşe, bwl mäselede asığıstıq jasauğa bolmaydı. Öytkeni, qazirgi kezde halıqpen tikeley jwmıs isteytin audandıq äkimdikter men auıldıq okrugterde 600-ge juıq bas jäne jetekşi mamandar jetispeydi.

Törtinşiden, memlekettik qızmetşiler sanın kezeñ-kezeñmen qısqartu mäselesimen qazir Wlttıq ekonomika ministrligi aynalısu üstinde. Alayda, ol memlekettik qızmetti jañğırtumen aynalıspaydı. Bwl mäselemen Memlekettik qızmet isteri agenttigi tikeley aynalısadı.

Joğarıda bayandalğan jayttardıñ negizinde Prem'er-Ministrdiñ qarauına mınaday wsınıstardı engizdik:

- «İşki sayasi twraqtılıqtı qamtamasız etu jäne qazaqstandıq patriotizmdi nasihattau» byudjettik bağdarlamasınıñ äkimşisi etip Aqparat jäne qoğamdıq damu ministrligin belgileu kerek;

- Oyın biznesi, lotoreya ötkizu jönindegi funkciyalardı Wlttıq ekonomika ministrligine bergen jön;

- Ministrlikterdiñ aumaqtıq qwrılımdarı men oblıstıq basqarmalardıñ qwzıretteri men funkciyalarına taldau jürgizip, qaytalanuşılıq anıqtalğan jağdaylarda ortalıq atqaruşı organdardıñ aumaqtıq qwrılımdarın qısqartu kerek;

- Memlekettik qızmettiñ bos orındarın qısqartu barısında audandıq äkimdikter men auıldıq okrugterdiñ ştattarın qısqartudıñ negizdiligin mwqiyat zerttep, wtımdı şeşim qabıldau qajet;

- Memlekettik qızmetşiler sanın qısqartu mindetin memlekettik qızmet salasındağı uäkiletti organ bolıp tabılatın Memlekettik qızmet isteri agenttigine jükteu mäselesin qarağan jön.

Käribay Mwsırman,

Mäjilis deputatı.

Abai.kz

12 pikir