Seysenbi, 10 Jeltoqsan 2019
Sañlaq 2274 1 pikir 21 Qaraşa, 2019 sağat 17:37

Qazaq boksşısı älem çempionı atağına talasadı

Japoniyalıq boksşı Kosey Tanaka (14-0, 8) eñ jeñil salmaqtağı WBO twjırımı boyınşa älem çempionı atağın qorğaytının mälimdedi. Üş salmaq därejesinde älem çempionı atanğan dañqtı boksşı jeltoqsan ayınıñ soñında şarşı alañğa şığadı.

Japon sportşısı Qıtayda tuıp-ösken qazaq boksşısı Wlan Töleuğazıwlımen (13-3-1,6 KO) jwdırıqtasqalı otır. Bwl jekpe-jek 2019 jıldıñ eñ soñğı küni Tokio qalasında ötedi.

Qıtaylıq aqparat qwraldarınıñ mälimetine sensek, japoniyalıq boksşı qazaq balasına özi wsınıs jasağan. Bwl keşte Tanaka WBO çempionı atağın üşinşi ret qorğağalı otır. Bwl onıñ toğızınşı çempiondıq jekpe-jegi. Al Wlan bwğan deyin älem çempionı atağı üşin kezdesu ötkizbegen. Onıñ üstine, 31 jeltoqanda Japoniya dästürli "Omisoka küni" merekesin toylaydı. Demek, Töleuğazıwlın ülken sın kütip twr degen söz.

Kosey Tanaka (14-0, 8)

Kosey Tanaka - 24 jastağı japon boksşısı. Ataqtı boxrec reytingisinde öz salmağında köş bastap twr. 18 jasınan bastap käsipqoy boksta jür. Sodan beri 14 jekpe-jek ötkizip, bärinde jeñiske jetken.

2015 jılı jası 20-ğa da tolmağan Tanaka bar bolğanı 5-şi jekpe-jeginde WBO twjırımınıñ eñ tömengi salmaqtağı (105 funt) älem çempionı atağın jeñip aldı.

Al 2016 jılı 31 jeltoqsanda (Omisoka küni) Moizes Fuentesti nokautpen jeñip, birinşi eñ jeñil salmaqta (108 funt) WBO twjırımı boyınşa älem çempionı atandı. Söytip, eki salmaqta älem çempionı atağına qol jetkizdi.

Tanaka bwnımen toqtağan joq. 2018 jılı 24 qırküyekte otandası Şo Kimuranı jeñip, WBO twjırımınıñ eñ jeñil salmaqtağı (112 funt) çempionı atağına ie boldı. Osılayşa, ol 12 jekpe-jekte üş salmaq sanatında älem çempionı atanğan Vasiliy Lomaçenkonıñ jetistigin qaytaladı.

Kosey Tanaka 2019 jılı Roiçi Taguçi men Djonatan Gonsalesti jeñip, eñ jeñil salmaqtağı çempiondıq beldigin eki märte qorğadı. Eger jıl soñında Wlan Töleuğazıwlın da jeñse, ekinşi eñ jeñil salmaq (115 funt) därejesine köterilip, törtinşi salmaqta çempiondıqqa talasudı josparlap otır eken.

Wlan Töleuğazıwlımen (13-3-1,6 KO)

Al Wlan Töleuğazıwlı käsipqoy boksqa 2015 jılı ayaq basqan. Biz aytqan boxrec reytingisinde öz salmağında 9-şı satıda twr. Qazirge deyin 13 ret jeñiske jetip, 3 märte jeñilgen. Biraq bwl 3 jeñilisi de alğaşqı 5 jekpe-jeginde orın alğan. Soñğı 12 jekpe-jeginde jeñilgen joq.

Wlannıñ mansap jolı dañğıl bolğan joq. Komandasınıñ älsizdigi, demeuşiniñ joqtığınan qiındıqtar boldı. Barınşa köp jekpe-jek ötkizu üşin 112-122 funt aralığında kez-kelgen salmaqta jwdırıqtasuğa mäjbür bolğan.

Al äuesqoy boksta jürgende Şinjañ öñiriniñ bes dürkin çempionı atanğan. Şinjañ pedagogika universitetin tämämdağan. 23 jasında memlekettik qızmetker bolu nemese magistratura oqu mümkindiginen uäz keşip, käsipqoy boksqa bet bwrğan.

Käsipqoy boksta Wlan Töleuğazıwlı eñ jeñil salmaqta WBC twjırımınıñ kümis belbeuin (WBC Silver Flyweight Title), WBO twjırımı boyınşa Aziya-Tınıq mwhit çempionı beldigin (WBO Asia Pacific Flyweight Title) jäne WBA twjırımı boyınşa halıqaralıq çempion (WBA International Flyweight Title) belbeuine qol jetkizgen.

Quanış Qappas

Abai.kz

1 pikir