Senbi, 7 Jeltoqsan 2019
1949 3 pikir 11 Qaraşa, 2019 sağat 11:29

Azat Peruaşev: Azamattarımızdıñ ömiri reseylikterden 10 ese arzan bolğanı ma?..

«Adamdardıñ ömirin bağalau kerek, bizdiñ azamattarımızdıñ ömiri reseylikterden arzan emes». Deputat Azat Peruaşev Mäjiliste ötken öndiristegi qauipsizdik turalı zañnıñ tanıstırıluı barısında osınday pikir bildirdi.

«Aq jol» partiyasınıñ jetekşisi memlekettik mekemelerde adamdar qaza tapqanda nemese olardıñ densaulığına ziyan keltirilgende tölenetin ötemaqınıñ mölşerin esepteudiñ birıñğay täsili joq ekenine nazar audardı.

«Resey Ükimeti qaytıs bolğan adamnıñ otbasına 1 mln rubl'den, al apattan zardap şekkenderge 500 mıñ rubl'den bastap ötemaqı töleydi. Al, bizde ärqalay. Key jerlerde 200 mıñ teñge, key jerlerde 500 mıñ, eñ köbi 1 mln teñge tölenedi. Sonda bizdiñ azamattarımızdıñ ömiri reseylikterden 10 ese arzan bolğanı ma? Ükimet nege ötemaqını esepteudiñ birıñğay täsilin engizbeydi?», dedi Azat Peruaşev.

«Bwl üşin bizdiñ frakciya adam qaza tapqanda onıñ bilimin, ekonomika men qoğamğa ülesi men ruhani qwndılıqtarın qosa eseptegende, memleket üşin ekonomika jağınan qanşalıqtı şığın ekenin esepteudi birneşe ret wsındı. Memleket apattar men zilzaladan keletin ekonomikalıq şığınnıñ auqımın bilgen kezde adamdardı bağalay bastaydı», dedi frakciya jetekşisi.

Sonımen qatar, Azat Peruaşev öndiris ornında 5 adamnan köp qaza tapqan jağdayda ğana apattı zertteu boyınşa memlekettik komissiya qwrılatının sınadı.

«Aq jol» partiyasınıñ jetekşisi Industriya ministrliginiñ zañ äzirleuşilerinen: «Nege 5 adamnan asqan jağdayda? Nege altı nemese bir adamnan köp qaytqanda emes? Bwl şart qaydan alınğan?», dep swradı.

«Konstituciya boyınşa adam jäne onıñ ömiri, qwqıqtarı men bostandığı memlekettiñ bastı qwndılığı bolıp tabıladı. Qılmıstıq zañnamada 2 jäne odan köp adam qaytıs bolğan jağdayda ğana erekşe jauapkerşilik tuındaydı. Sonda öndiris ornında tört-bes jwmısşı qaza tapsa, memlekettiñ qatısı joq bolğanı ma? Mwnday közqaraspen kelise almaymın!

Mısalı, resmi aqparattar boyınşa Çernobıl'de orın alğan alğaşqı örtte 1 adam qaza tapqan. Alayda, apattıñ auqımı bükilälemdik bolıp tanıldı. Sonda sizderdiñ oylarıñızşa osı apat boyınşa komissiya qwrudıñ qajeti joq bolğanı ma?

Bwl wstanımdı basqa deputattar da qoldadı. Deputat Ahmet Muradov: «Azat Twrlıbekwlınıñ pikirimen tolığımen kelisemin. Bir adamnıñ da qazası – jaqındarı üşin öte auır. Zardap şekkender sanın eseptegenşe, bar küşimizben mwnday jağdaylardıñ aldın alu kerek.

Mwnay önidirisiniñ bir auısımında 5 adam jwmıs isteydi. Memlekettiñ apat saldarın tekserui üşin bir auısım tolığımen qaza tabuı kerek pe?», dedi ol.

Talqılau nätijesinde «Aq jol» partiyasınıñ jetekşisi memlekettik organdardı aytılğan sındı nazarğa alu kerektigin aytıp, jwmıs tobına osı jäne basqa da swraqtar boyınşa özgertulerdi joldağanın mälimdedi.

Abai.kz

3 pikir