Särsenbi, 20 Qaraşa 2019
Jastar jılı 623 8 pikir 7 Qaraşa, 2019 sağat 12:09

Ükimettiñ "Jastar jılındağı" is-qimılı sılbır

Keşe Parlament Mäjilisinde bolğan kezekti «Ükimet sağatında» Elbası jariyalağan Jastar jılınıñ alğaşqı qorıtındıların qaradıq.
Şının aytsaq, Twñğış Prezidentimizdiñ Jastar jılınıñ saltanattı aşılu räsiminde Ükimetke bergen tapsırmalarınıñ orındalu barısı köñil könşiterliktey bolmay şıqtı. Osı jöninde deputattar ötkir sın men orındı wsınıstar ayttı.

Mäselen, biılğı jılı jas mamandarğa Nwr-Swltan, Almatı, Şımkent qalalarında 3 mıñ päter beru közdelgen. Bwl maqsatqa el qazınasınan 21,6 milliard teñge bölindi. Qazirgi uaqıtta äkimdikter 7 twrğın üydiñ, yağni nebäri 330 päterdiñ qwrılısın jürgizude. Qalğan 2 mıñ 670 päterdi qaytalama narıqtan satıp alu josparlanğan. Qarjı da, swranıs ta bar. Alayda, büginge deyin jwmıs isteytin jastardıñ eşqaysısı baspanağa qol jetkizgen joq. Ükimet ökilderi ärkimniñ bosağasın sağalap jürgen ini-qarındastarımızdıñ qoldarı jalğa beriletin baspanağa qaraşa-jeltoqsan aylarında jetedi degen uäde berdi.

Ükimet «Diplommen – auılğa!» bağdarlaması boyınşa auıldıq eldi mekenderge jwmıs isteuge baratın jas mamandarğa birjolğı järdemaqı mölşerin 70 aylıq eseptik körsetkişten 100 aylıq eseptik körsetkişke deyin arttıru turalı tapsırmanı da tolıq orındamağan. Qajetti qaulını mamır ayınıñ soñında äreñ qabıldap, mäseleni jergilikti byudjetter esebinen şeşudi oblıstıq äkimdikterge tapsırğan. Alayda, oblıstıq äkimdikterdiñ köpşiligi bwl qaulını orındauğa qajetti qarjını äli tauıp bergen joq.

Elbasınıñ «Diplommen – auılğa!» bağdarlamasına engizilgen mamandıqtar tizbesin keñeytu jönindegi tapsırması da sozbaqqa salınıp otır. Al audandıq äkimdikter men auıldıq okrugterge qazir 600-dey bas jäne jetekşi mamandar jetispeydi.
Üstimizdegi jılı 15 mıñ jas käsipkerdiñ memlekettik grant alıp, öz isin aşuı josparlanğan edi. Qazirge deyin olardıñ 8 mıñdayı ğana osınday qoldau körgen.

Wzın sözdiñ qısqası, Ükimettiñ Jastar jılında alğa qoyılğan mindetterdi jüzege asırudağı is-qimılı sılbır. Osığan oray, biz Ükimettiñ janınan memlekettik jastar sayasatın iske asıru jönindegi vedomstvoaralıq komissiya qwru qajet dep tauıp, tiisti wsınıs jasadıq. Öytkeni, Jastar jılın ötkizuge jauaptı uäkiletti organ – Aqparat jäne qoğamdıq damu ministrliginiñ özge memlekettik organdardıñ basşıların «kilemge şaqırıp, şañdarın qağatınday» qwdireti joqtığı anıq.

Käribay Mwsırman

Abai.kz

8 pikir