Jwma, 15 Qaraşa 2019
Talqı 1574 43 pikir 31 Qazan, 2019 sağat 18:53

Astana mektepterine arab şeyhtarınıñ atı beriledi

Iä, Astananıñ qos birdey mektebine arab şeyhtarınıñ atı beriledi. Bwl wsınıstı bas qalanıñ mäslihatı, ondağı däudey deputattar maqwldaptı.

Atap aytqanda, Nwr-Sqltan qalasındağı №84 mentep-liceyine şeyh Halifa ben Zaid äl-Nahayannıñ, al № 85 mektepke şeyh Tamim ben Hamada äl-Tanidıñ esimi beriledi eken.

Astanalıq onomastikalıq komissiya wzın-ırğası 12 mekemeniñ atauın qarap, aqıldasıp, maqwldasıptı. Ol mekemelerge endi Jwmabek Täşenovtiñ, Ahmet Baytwrsınovtıñ, Beyimbet Maylinniñ, Şäkärim Qwdayberdiwlınıñ, Mäşhür-Jüsip Köpeywlınıñ, İliyas Jansügirovtiñ, Mirjaqıp Dulatovtıñ, Älihan Bökeyhan men Säken Seyfullinniñ atı beriledi.

Sonday-aq, Nwr-Swltan qalalıq Oquşılar sarayı endi Äbu Nasır äl-Farabidiñ atımen ataladı.

Astana mektepterine arab şeyhtarınıñ atı berilui turalı aqparatqa Nwr-Swltan qalası, Mwrağat isteri jäne tilderdi damıtu basqarmasınıñ basşısı Tileugeldi Qışqaşbaev (Kişkaşbaev) pikir bildiripti.

"Mektep - bilim beru jüyesiniñ eñ mañızdı nısandardıñ biri. Qazirgi tañda astanamızda 87 mektep jwmıs istep twr. Onıñ işinde 10 mekemege Qazaqstannıñ dañqtı azamattarınıñ atı berilgen.

Ayta keteyik, Astananı damıtuda şeteldik investorlardıñ ölşeuli ülesi bar. Mısalı, arab şeyhtarınıñ atı beriletin mektepterdiñ qwrılısı sol şeteldik investorlardıñ qarjısına salınğan.

Halifa ben Zaid äl-Nahayan atındağı gumanitarlıq qor № 84 mektep-liceydiñ qwrılısın tolıq qarjılandırğan. 

Al № 85 mekteptiñ qwrılısına Katar memleketiniñ damu qorı qarjı audarğan. Atalğan bilim beru mekemeleri investorlar esebinen barlıq kerekti oqu qwraldarımen jabdıqtalğan", depti Qışqaşbaev.

Taqırıpqa twzdıq retinde aytayıq, ötkende ğana osı arab şeyhtarına sirek kezdesetin qwstardı aulauğa arnayı rwqsat bergen edi. Rwqsattı basqa-basqa emes, prem'er-ministrdiñ özi bergen.

Katar men Arab ämirliginiñ 4 şeyhına jılına 300-dey qws atuğa rwqsat etilgen. Arabtar atpaqşı qws - Qızıl kitapqa engen jiek duadaq nemese jorğa duadaq ekeni de belgili bolğan.

Älgi ätigörlerdi tipti "Ohotzooprom" inspektorları kölikpen alıp jüredi eken tağı. Oypırımoylarğa mwnşa bäyek bolatınday ne qwdıret dep şulağan jwrt. Sol kezde ministr Mağzwm Mırzalievtiñ özi terlep-tepşip tüsindirip edi.

Söytsek, qwsqwmar şeyhtar qazınağa qarjı qwyıptı-mıs. QR Ekologiya, geologiya jäne tabiği resurstar ministri Mırzağalievtiñ sözi, bwl: "Osı jolı bwlarğa 273 qwsqa rwqsat berdik. Degenmen qanşa şığatını belgisiz. Ol añşılıq qoy. 270 qwsqa 181 million teñge aqşa tüsedi".

Arab şeyhtarına sirek kezdesetin qwstardı atuğa rwqsat beretin Qaulını QR Ükimeti qabıldağan. Sayatşılıq 15 qaraşağa deyin sozılğan. Söytip, Qızıl kitaptağı qwstardı qwmarlıq üşin qıru qwqığı birneşe adamğa resmi berilgen. Olardıñ arasında jañağı Halifa ben Zaid äl-Nahayan da bar.

4 şeyh dedik qoy. Onıñ biri - Halifa ben Zaid äl-Nahayan. Oğan Arıs  qalasına qarastı aumaqta jäne Qaratau memlekettik qorığında 35 duadaq, sonday-aq, Oñtüstik Qazaqstan, Jambıl, Qızılorda oblıstarınıñ aumağındağı qorıqtarda 49 duadaqtı aulauğa rwqsat etilgen.

Halifa äl-Nahayan Birikken arab ämirliginiñ prezidenti. Eldiñ bwrınğı prezidenti Zayd ibn Swltan äl-Nahayyannıñ ülken wlı.

2004 jılı äkesi qaytıs bolğan soñ prezidenttik taqtı ielengen. Oğan deyin Äbu Dabidiñ ämiri bolğan. Älemdegi eñ däuletti milliarderlerdiñ biri. "Forbes" jurnalınıñ twjırımı boyınşa onıñ baylığı 15 milliard dollar dep esepteledi.

Al şeyh Hamád ben Halífa äl-Táni qazirgi uaqıtta Katar eliniñ ämiri. Bwl şeyh turalı türli äñgimeler bar. Ol 1995 jılı äkesi halifa ben Hamad Şveycariyada demalıp jatqan kezde elde qansız töñkeris jasap, äkesiniñ tağın basıp alğan. Aqparat qwraldarında jası 65-ke juıqtap qalğan ämirdiñ densaulığınıñ naşar ekendigi aytıladı. Sonımen birge ol 1996 jılı ataqtı «äl-Jazira» telekanalın qwrğan azamat retinde ataladı.

Mine, jañağı qwsqwmar arab ämirine endi bas qalanıñ mektebinen äydiktep at beretin boldıq.

Abai.kz

43 pikir